មិនមែនមានចេតនាបង្កាច់បង្ខូចកេរ្តិ៍ឈ្មោះឬធ្វើឱ្យអាប់ឱនដល់កិត្តិយស សេចក្តីថ្លៃថ្នូររបស់គ្រូពេទ្យដែលខិតខំបំពេញតួនាទីរបស់ខ្លួនទេ តែជារឿងបុគ្គលមួយចំនួនតូចប៉ុណ្ណោះដែលប្រព្រឹត្តខុសក្រមសីលធម៌ធ្វើឱ្យអាប់ឱន និងបាត់សេចក្តីថ្លៃថ្នូរក្នុងវិជ្ជាជីវៈរបស់ខ្លួន ហើយព័ត៌មាននេះចាត់ទុកជាបទពិសោធន៍មួយដើម្បីដាស់ស្មារតីឱ្យមានការទទួលខុសត្រូវខ្ពស់ និងប្រកាន់ខ្ជាប់នូវក្រមសីលធម៌ក្នុងវិជ្ជាជីវៈរបស់ខ្លួន ពេលកំពុងបំពេញការងារ ។
ពាក់ព័ន្ធនឹងបញ្ហានេះ យោងតាមប្រភពគេហទំព័រឆាយណាប៊ើស ចេញផ្សាយថ្ងៃទី១ សីហា ២០១២ បានឱ្យដឹងថា មានករណីគ្រូពេទ្យផ្នែកចាក់ថ្នាំស្ពឹកម្នាក់បានចាប់រំលោភស្ត្រីអ្នកជំងឺម្នាក់នៅក្នុងបន្ទប់វះកាត់ ខណៈដែលនាងមិនទាន់ដឹងខ្លួន ក្រោយពេលវះកាត់ ។
ប្រភពបន្តថា លោកគ្រូពេទ្យកំហូចរូបនោះឈ្មោះ ប៉ាន អាយុ៣៨ឆ្នាំ បម្រើការនៅមន្ទីរពេទ្យមួយក្នុងទីក្រុង Xiamen ខេត្ត Fujian ប្រទេសចិន ត្រូវសាធារណជនខឹងយ៉ាងខ្លាំង ក្រោយពេលឆែកនៅក្នុងកាមេរ៉ាសុវត្ថិភាពឃើញចាប់រំលោភស្ត្រីអ្នកជំងឺនៅក្នុងមន្ទីរពេទ្យ ខណៈនាងមិនទាន់ដឹងខ្លួន បន្ទាប់ពីចាក់ថ្នាំសន្លប់ដើម្បីវះកាត់ ។
យោងតាមប៉ូលិសក្នុងតំបន់បានឱ្យដឹងថា នារីរងគ្រោះឈ្មោះ វិនវិន (Wenwen) បានចូលធ្វើការវះកាត់នៅមន្ទីរពេទ្យ Xiamen Woman and Infant Health កាលពីថ្ងៃទី១៩ ខែមីនា ឆ្នាំ២០១២ ។ នៅវេលាម៉ោង៦និង៥០នាទីយប់ថ្ងៃដដែល ការវះកាត់បានរួចរាល់ ហើយអ្នកជំងឺបន្តនៅក្នុងបន្ទប់តាមដានមួយក្រោមការមើលថែពីគ្រូពេទ្យផ្នែកចាក់ថ្នាំស្ពឹក ដើម្បីរង់ចាំឱ្យនាងដឹងខ្លួន ។ ក្នុងពេលនោះ លោកគ្រូពេទ្យប៉ាន ឆក់ឱកាសពេលនាងមិនទាន់ដឹងខ្លួន ក៏ចាប់រំលោភនាងតែម្តង ។ ក្រោយពេលនាងវិនវិន ដឹងខ្លួនវិញ យល់ថាខ្លួនប្រាណ របស់នាងខុសប្រក្រតី ក៏បានទូរស័ព្ទទៅប៉ូលិស។
ប្រភពបន្តថា គ្រូពេទ្យកំហូចរូបនេះត្រូវប៉ូលិសក្នុងតំបន់ចាប់ខ្លួនភ្លាមៗ និងបញ្ជូនទៅកាត់ទោសដាក់ពន្ធនាគារ រយៈពេល២ឆ្នាំ និង២ខែ ដោយជាប់ចោទពីបទចាប់រំលោភសេពសន្ថវៈដោយបង្ខំទៅលើនារីរងគ្រោះ ។
អ្នកប្រើប្រាស់អ៊ីនធើរណេតជាច្រើន ពេលបានឃើញព័ត៌មាននេះហើយ បានស្រក់ទឹកភ្នែកអាណិតអាសូរដល់នារីរងគ្រោះ ហើយសុំឱ្យតុលាការដាក់ទោសជនកំហូចរូបនេះបន្ថែមទៀត និងសុំឱ្យមាននីតិវិធីបន្ថែមចំពោះករណីបទល្មើសបែបនេះ ៕
ចែករំលែកព័តមាននេះ