វិស័យព័ត៌មានវិទ្យាបច្ចុប្បន្នកាន់តែជឿនលឿន និងពេញនិយម ធ្វើឱ្យអ្នកប្រើប្រាស់ទាំងឡាយកាន់តែងាយស្រួលក្នុងការទំនាក់ទំនង ក៏ដូចជាស្រាវជ្រាវឯកសារផ្សេងៗ ។ ទន្ទឹមនឹងនេះប្រព័ន្ធព័ត៌មានវិទ្យា ប្រៀបដូចអាវុធមុខពីរអ៊ីចឹង វាមិនត្រឹមតែផ្តល់នូវគុណសម្បត្តិប៉ុណ្ណោះទេ ថែមទាំងផ្តល់នូវគុណវិបត្តិដល់យើងផងដែរ ។ ដូច្នេះយើងជាអ្នកប្រើប្រព័ន្ធព័ត៌មានវិទ្យា គួរគប្បីស្វែងយល់នូវប្រការមួយចំនួន មុននឹងឈានទៅការប្រើប្រាស់វា ។ តួយ៉ាងដូចជាការបង្កើត គណនេយ្យដំបូងនៅក្នុងបណ្តាញទំនាក់ទំនងសង្គមជាដើម ។ បើទោះបីជាលោកអ្នកមានមិត្តតែម្នាក់នៅក្នុងគេហទំព័របណ្តាញទំនាក់ទំនងសង្គមក៏ដោយ ក៏លោកអ្នកមិនគួរគប្បីសរសេរពីសាវតារពិតប្រាកដនៅក្នុងគណនេយ្យ(Account)របស់ខ្លួនដែរ ហើយព័ត៌មានផ្ទាល់ខ្លួនចាំបាច់មួយចំនួន លោកអ្នករឹងរឹតតែមិនគួរបង្ហាញនៅក្នុង Account ទៀតផង ព្រោះថាវាអាចមានជនខិលខូច (Hacker)ស្វែងរកទិន្នន័យតាមគណនេយ្យដើម្បីកំណត់អត្តសញ្ញាណរបស់យើង និងអាចឈានដល់ប្រើល្បិចកលក្នុងបទឧក្រិដ្ឋផ្សេងៗក៏ថាបាន ។
ខាងក្រោមនេះជាប្រការ១០យ៉ាងដែលលោកអ្នកមិនគួរគប្បីសរសេរ ឬបង្ហោះនៅលើបណ្តាញទំនាក់ទំនងសង្គម ៖
១- ថ្ងៃ-ខែ-ឆ្នាំ កំណើតរបស់អ្នក ៖
ការបង្ហាញឱ្យដឹងពីថ្ងៃខែឆ្នាំកំណើតពិតប្រាកដ គឺជារឿងគ្រោះថ្នាក់បំផុតសម្រាប់អ្នកដែលពាក់ព័ន្ធនឹងលុយកាក់ក្នុងធនាគារ ឬប្រើប្រាស់ប័ណ្ណឥណទាន (Credit Card) ផ្សេងៗ ព្រោះថាក្រុមជនខិលខូចអាចស្វែងរកទិន្នន័យផ្ទាល់ខ្លួនរបស់យើងតាមបណ្តាញទំនាក់ទំនងសង្គម នាំឱ្យយើងមានគ្រោះថ្នាក់ទៅថ្ងៃក្រោយ។
២-សំណួរសម្ងាត់នៅពេលបង្កើតគណនេយ្យដំបូង ៖
ចូរចាំថា គេហទំព័រមួយចំនួនទាមទារឱ្យយើងដាក់ជាសំណួរសម្ងាត់មួយសម្រាប់ពេលយើងភ្លេចលេខសម្ងាត់ (Passwords) និងតម្រូវឱ្យយើងចុះទិន្នន័យផ្ទាល់ខ្លួនមួយចំនួនទៀត ដើម្បីឈានទៅដំណើរការគណនេយ្យរបស់យើង ចូរប្រយ័ត្ននៅពេលលោកអ្នកភ្ជាប់(share) ជាមួយមិត្តភក្តិផ្សេងទៀត ។
៣- អាសយដ្ឋានរបស់លោកអ្នក ៖
លោកអ្នកមិនចាំបាច់ចែករំលែកព័ត៌មានពីអាសយដ្ឋានជាមួយមិត្តភក្តិ, អ្នកដែលស្គាល់, អ្នកដែលមិត្តភក្តិរបស់អ្នកស្គាល់ ឬមិត្តរួមការសិក្សានោះទេ ព្រោះថាចោរបច្ចុប្បន្នក៏ចេះប្រើបណ្តាញទំនាក់ទំនងសង្គមដែរ ហើយពួកគេស្វែងរកផ្ទះណាដែលអ្នកប្រើអ៊ីនធើរណេតបង្ហោះថា ពួកគេមិននៅផ្ទះ ឬចេញទៅក្រៅ ។ ពេលនោះពួកគេនឹងធ្វើសកម្មភាពផ្សេងៗក្នុងផ្ទះយើងមិនខាន ។
៤- ពេលធ្វើដំណើរទៅឆ្ងាយ ៖
ប្រសិនបើលោកអ្នកមានបំណងប្រាប់មិត្តភក្តិពីដំណើររបស់អ្នក ដាច់ខាតលោកអ្នកត្រូវតែប្រាកដថា ផ្ទះរបស់ខ្លួនមានប្រព័ន្ធការពារសុវត្ថិភាពដើម្បីប្រាប់ជាសញ្ញាដល់សមត្ថកិច្ចពេលមានអាសន្ន ព្រោះពេលអ្នកបង្ហោះនៅលើបណ្តាញទំនាក់ទំនងសង្គម មិនត្រឹមតែមិត្តរបស់អ្នកទេដែលដឹង ចោរក៏ដឹងថាផ្ទះរបស់អ្នកគ្មានមនុស្សនៅដែរ ។
៥-ចេញពីផ្ទះរយៈពេលខ្លី ៖
ប្រសិនបើអ្នកប្រាប់គេថា ពេលនេះអ្នកកំពុងនៅផ្សារទំនើប ឬកន្លែងហាត់ប្រាណ វាជាឱកាស ល្អមួយសម្រាប់ក្រុមចោរធ្វើសកម្មភាពចូលផ្ទះរបស់លោកអ្នកភ្លាម ។
៦-បង្ហោះរូបថតមិនសមរម្យ ៖
លោកអ្នកពិតជាបានអានព័ត៌មានមួយចំនួនរួចហើយទាក់ទងនឹងការបង្ហោះរូបថតមិនគប្បីចូលទៅក្នុងគេហទំព័របណ្តាញទំនាក់ទំនងសង្គម គឺអាចធ្វើឱ្យលោកអ្នកបាត់បង់ការងារធ្វើ និងអាចប្រឈមមុខនឹងច្បាប់ទៀតផង ។ ដូច្នេះចូរកុំធ្វើឱ្យសោះ ។
៧- ការរៀបរាប់ពីអ្វីមួយ ៖
ចូរកុំសរសេររៀបរាប់ប្រាប់បណ្តាញទំនាក់ទំនងសង្គម ប្រសិនបើលោកអ្នកខឹងចៅហ្វាយរបស់អ្នក, សេពគ្រឿងស្រវឹងក្នុងវ័យអនីតិជន, សេពគ្រឿងញៀន ឬនិយាយលេងផ្តេសផ្តាសពាក់ព័ន្ធនយោបាយជាដើម ។ ការរៀបរាប់ទាំងនោះអាចដឹងដល់ចៅហ្វាយរបស់អ្នក ឬត្រូវចាប់ខ្លួនពីបទអ្វីមួយមិនខាន ។
៨- លេខទូរស័ព្ទរបស់អ្នក ៖
ការបង្ហោះលេខទូរស័ព្ទរបស់អ្នកនៅក្នុងបណ្តាញទំនាក់ទំនងសង្គមអាចរំខានដោយអ្នកដែលយើងមិនស្គាល់ ឬពីមិត្តរបស់មិត្តភក្តិអ្នក ។
៩- រាប់ថយក្រោយជាមួយវិស្សមកាលរបស់អ្នក ៖
យកល្អលោកអ្នកគួរបង្ហាញពីសកម្មភាពក្រោយវិស្សមកាលរបស់អ្នកនៅលើបណ្តាញទំនាក់ទំនងសង្គម ប្រសើរជាងប្រាប់មុនពេលចាប់ផ្តើមវិស្សមកាល ព្រោះថាពេលអ្នកទៅវិស្សមកាល ផ្ទះរបស់លោកអ្នកពុំមានអ្នកនៅចាំទេ អាចជាឱកាសសម្រាប់ជនខិលខូច ។
១០- រូបថតខាងក្នុងផ្ទះរបស់លោកអ្នក៖
ការបង្ហោះរូបថតបង្ហាញនូវទិដ្ឋភាពក្នុងផ្ទះរបស់អ្នកឱ្យគេឃើញ វាមិនជាការប្រសើរឡើយ ព្រោះជាឱកាសដល់ក្រុមចោរដឹងថាផ្ទះរបស់អ្នកមានសម្ភារមានតម្លៃ ៕
ចែករំលែកព័តមាននេះ