រាជធានីភ្នំពេញ ៖ រដ្ឋមន្ត្រីក្រសួងទេសចរណ៍លោកថោង ខុន បានអំពាវនាវដល់ផលិតករទាំងអស់សរសេរស្លាកសញ្ញាជាភាសាខ្មែរនៅគ្រប់ផលិតផលដែលជាស្នាដៃរបស់ខ្មែរ ខណៈ ពេលដែលកន្លងមកនេះផលិតផលខ្មែរមួយចំនួនធំសរសេរស្លាកសញ្ញាជា
រាជធានីភ្នំពេញ ៖ រដ្ឋមន្ត្រីក្រសួងទេសចរណ៍លោកថោង ខុន បានអំពាវនាវដល់ផលិតករទាំងអស់សរសេរស្លាកសញ្ញាជាភាសាខ្មែរនៅគ្រប់ផលិតផលដែលជាស្នាដៃរបស់ខ្មែរ ខណៈ ពេលដែលកន្លងមកនេះផលិតផលខ្មែរមួយចំនួនធំសរសេរស្លាកសញ្ញាជាភាសាបរទេសលើផលិតផលរបស់ខ្លួន ។ ការអំពាវនាវនោះធ្វើឡើងក្នុងឱកាសដែលលោករដ្ឋមន្ត្រីអញ្ជើញចូលរួមក្នុងសិក្ខាសាលាស្តីពីការអភិវឌ្ឍយុទ្ធសាស្ត្រស្លាកសញ្ញា(យីហោ)ប្រកបដោយប្រសិទ្ធភាពសម្រាប់សិប្បកម្មទេសចរណ៍នៅកម្ពុជា ដែលបានប្រារព្ធធ្វើឡើងកាលពីថ្ងៃទី២៥ ខែមេសា ឆ្នាំ២០១២ នៅសណ្ឋាគារឡឺរ៉ូយ៉ាល់រាជធានីភ្នំពេញ ។
លោកថោង ខុន មានប្រសាសន៍ថា ការរៀបចំសិក្ខាសាលាស្តីពីការបង្កើតស្លាកសញ្ញា(យីហោ)សិប្បកម្មសម្រាប់ទេសចរណ៍គឺជាការបង្ហាញអំពីការយកចិត្តទុកដាក់គាំទ្រនិងការពង្រឹងឲ្យកាន់តែខ្លាំងថែមទៀតនូវប្រពៃណីបេតិកភណ្ឌវប្បធម៌កម្ពុជា ។ សិប្បកម្មគឺជាវត្ថុមួយក្នុងចំណោមវត្ថុដ៏តិចតួចមួយចំនួនដែលឆ្លុះបញ្ចាំងពីភាពជាលក្ខណៈដើមពិតប្រាកដ វប្បធម៌ម្ចាស់ស្រុកនៃគោលដៅនិងនៅក្នុងពិភពនៃសាកលភាវូបនីយកម្ម ដែលទេសចរកំពុងស្វែងរកនូវបទពិសោធន៍ដែលមានលក្ខណៈពិសេសបន្ថែមទៀត ។ ទេសចរកំពុងតែស្វែងរកវត្ថុដែលមានប្រភពនិងលក្ខណៈដើមសុទ្ធសាធដែលធ្វើឲ្យពួកគេមានការចងចាំល្អៗនៅពេលមកសម្រាកលំហែកំសាន្ត ។ ហេតុនេះ ហើយទើបវត្ថុទាំងនេះកាន់តែមានតម្លៃខ្ពស់ជាងប្រភេទវត្ថុអនុស្សាវរីយ៍ដទៃទៀត ហើយភ្ញៀវទេសចរមានឆន្ទៈចំណាយ និងឲ្យតម្លៃខ្ពស់ប្រសិនបើវត្ថុទាំងនេះមានគុណភាពល្អ ។
លោកថោង ខុន មានប្រសាស៍ថា បច្ចុប្បន្ននេះកម្ពុជា បានផលិតវត្ថុសិប្បកម្មប្រកបដោយគុណភាពខ្ពស់មួយចំនួន ។ ប៉ុន្តែប្រការដែលសំខាន់នោះ ផលិតផលទាំងអស់នេះទាមទារឲ្យមានការកែលម្អនិងធ្វើដើម្បីបន្តទាក់ទាញភ្ញៀវទេសចរឲ្យទិញកាន់តែច្រើនថែមទៀត ។ ទន្ទឹមនោះគប្បីត្រូវលើកតម្កើងផ្នែកជំនាញបច្ចេកទេស និងមុខវិជ្ជាជីវៈរបស់សិប្បករ រួមជាមួយនឹងការបង្កើតស្លាកសញ្ញាសិប្បកម្មសម្រាប់អ្នកទេសចរដែលទាំងអស់នេះ ទើបធ្វើឲ្យអនាគតសិប្បកម្មក្នុងស្រុកសម្រាប់ផ្គត់ផ្គង់ភ្ញៀវទេសចរកាន់តែមានគុណភាពសោភ័ណភាព និងភាពទាក់ទាញកាន់តែប្រសើរឡើងថែមទៀត ។
ពាក់ព័ន្ធនឹងស្លាកសញ្ញាផលិតផលនេះ លោករដ្ឋមន្ត្រីបានអំពាវនាវម្តងទៀតដល់សិប្បករទាំងអស់ឲ្យដាក់ស្លាកសញ្ញាភាសាខ្មែរលើផលិតផលរបស់ខ្លួន និងចៀសវាងសរសេរភាសាបរទេសលើផលិតផលដែលជាស្នាដៃរបស់ខ្មែរយើង ។ លោកទិត ចន្ថា អគ្គនាយកទេសចរណ៍ និងជាប្រធានក្រុមការងារអន្តរក្រសួងគ្រប់គ្រងគម្រោងJFPR ៩១៥៦ CAM បានឲ្យដឹងថា គម្រោងនេះជាហិរញ្ញប្បទានរបស់រាជរដ្ឋាភិបាលជប៉ុនសម្រាប់កាត់បន្ថយភាពក្រីក្ររបស់សហគមន៍មូលដ្ឋាន ពិសេសគាំទ្រសហគ្រាសខ្នាតតូច និងតូចបំផុតដែលដឹកនាំដោយស្ត្រីនៅភូមិគោលដៅចំនួន១១ នៅក្បែរ និងនៅជុំវិញតំបន់ប្រាសាទសំបូរព្រៃគុក ខេត្តកំពង់ធំ ។
សព្វថៃ្ងក្រសួងទេសចរណ៍កំពុងអនុវត្តគម្រោងនេះយ៉ាងសកម្មដោយដើរស្របគ្នា លើការបណ្តុះបណ្តាលជំនាញបច្ចេកទេសសម្រាប់ការផលិត ផលិតផលសិប្បកម្មនិងអាហារ ។ ទន្ទឹមនោះគម្រោងនេះនឹងកសាងហេដ្ឋារចនាសម្ពន្ធ័មជ្ឈមណ្ឌលលក់ផលិតផលសហគមន៍ និងសម្បទាទេសចរណ៍ផ្សេងៗទៀតដែលមានទីតាំងនៅតាមដងស្ទឹងអូគ្រូកែ ដែលមានចម្ងាយប្រមាណ៥០០គីឡូម៉ែត្រពីតំបន់ប្រាសាទសំបូរព្រៃគុក ។ មជ្ឈមណ្ឌលលក់ផលិតផលសហគមន៍នឹងជួយសម្រួលដល់ទេសចរឲ្យជាវផលិតផលដោយផ្ទាល់ពីសហគមន៍មូលដ្ឋាន ៕
ចែករំលែកព័តមាននេះ