ខេត្តកណ្តាល ៖ វល្លិចម្លែកដែលមានចលនារស់រវើកបត់បែន ពត់ពេនដូចសត្វពស់ ឬជន្លេន ពណ៌ក្រហមក្រមៅ ត្រូវព្រះចៅអធិការវត្តជម្ពូណារ៉ាម ហៅវត្តតាពុត ស្ថិតនៅភូមិព្រែកតាជ័រ ឃុំស្វាយប្រទាល ស្រុកស្អាង ប្រទះឃើញនៅក្បែរកុដិក៏រើសយកទៅរក្សាទុក ដើម្បីចែកជូនពុទ្ធបរិស័ទ និងប្រជាពលរដ្ឋមើល ដោយសារតែវល្លិនោះចម្លែកខុសពីវល្លិធម្មតា ។
នៅថ្ងៃទី២៤ មេសា មានពុទ្ធបរិស័ទ និងប្រជាពលរដ្ឋជាច្រើននាំគ្នាទៅសុំមើលវល្លិចម្លែក និងនាំគ្នាសុំទឹកមន្តដើម្បីសុំសេចក្តីសុខចម្រើន ។
ព្រះចៅអធិការវត្តជម្ពូណារ៉ាម ហៅវត្តតាពុត ព្រះនាមសូត្រ សុខចាន់ ព្រះជន្ម៣៧ឆ្នាំ មានថេរដីកាឱ្យដឹងថា វល្លិចម្លែកត្រូវព្រះអង្គប្រទះឃើញកាលពីម៉ោង៨ព្រឹក ថ្ងៃទី១២ មេសា មុនថ្ងៃចូលឆ្នាំមួយថ្ងៃនៅជិតកុដិព្រះអង្គគង់នៅក្បែរអាងទឹក ។ នៅពេលព្រះអង្គបោសសម្រាមលើផ្ទៃចាក់សាបប្រទះឃើញមានចលនារវើកៗ ហើយក៏បោសយកទៅក្បែរអាងទឹកកន្លែងមានសំណើម ស្រាប់តែវារឹតតែមានចលនារស់រវើកខ្លាំងឡើង ។
ពីដំបូងឡើយព្រះអង្គស្មានតែជាសត្វអ្វីមួយ ពេលរើសយកទៅពិនិត្យមើលឱ្យច្បាស់ទើបដឹងថា ជាវល្លិចម្លែក ដែលពីមុនព្រះអង្គមិនដែលប្រទះឃើញទាល់តែសោះ ។ ក្រោយពីប្រទះឃើញ ព្រះតេជគុណសូត្រ សុខចាន់ យកវល្លិចម្លែកទៅទុកក្នុងដបទឹកសុទ្ធមួលគំរបបិទជិត ដើម្បីរក្សាទុកព្រោះជាប់រវល់បុណ្យចូលឆ្នាំខ្មែរ លុះចប់បុណ្យចូលឆ្នាំ ព្រះអង្គយកទៅរក្សាទុកក្នុងផ្តិលខាត់ដាក់ទឹក ដើម្បីឱ្យពុទ្ធបរិស័ទមើល ។ ព្រះអង្គមានថេរដីកា ថាវល្លិនោះលូតវែងពីមួយថ្ងៃទៅមួយថ្ងៃ ពេលនេះមានប្រវែងប្រហែល៤តឹក ទំហំប៉ុនជើងធូប មានពណ៌ក្រហមក្រមៅដូចពណ៌ស្ពាន់ និងមិនមានថ្នាំង ស្លឹកទេ ។ នៅក្បែរវត្តជម្ពូណារ៉ាមមិនមានវល្លិបែបនោះដុុះទេ ។ មិនដឹងថា វាប៉ើងតាមខ្យល់ពីណាមកទេ ព្រោះនៅវេលាយប់ថ្ងៃទី១១ មេសា មានខ្យល់ និងភ្លៀងខ្លាំង លុះព្រឹកឡើងប្រទះឃើញតែម្តង ។ តាអាចារ្យ និងពុទ្ធបរិស័ទ ដែលទៅមើលពីដំបូងឡើយមិនជឿថាជាវល្លិទេ ព្រោះមានចលនាបត់បែន ពត់ពេនដូចសត្វមានជីវិត ប៉ុន្តែបើទុកវានៅលើគោកយូរវានឹងរួញ និងមិនសូវមានចលនាទេ តែបើទុកនៅក្នុងទឹកមានចលនារស់រវើក ។
ព្រះតេជគុណសូត្រ សុខចាន់មានថេរដីកាទៀតថា បើសិនជាសត្វមានជីវិត ពេលព្រះអង្គយកទៅទុកនៅក្នុងដបទឹកសុទ្ធហើយមួលគម្របបិទជិតរយៈពេល៧ថ្ងៃនោះប្រាកដជាងាប់មិនខានឡើយ តែរយៈពេល៧ថ្ងៃពេលយកមកត្រាំទឹក ស្រាប់តែមានចលនាឡើងវិញ រស់រវើក ។ ព្រះអង្គមិនមានជំនឿថា ជាវត្ថុស័ក្តិសិទ្ធិអ្វីទេគ្រាន់តែយល់ថា ជារុក្ខជាតិចម្លែកមិនធ្លាប់ប្រទះឃើញពីមុនមក ក៏រើសយកទៅរក្សាទុកឱ្យប្រជាពលរដ្ឋមើលប៉ុណ្ណោះ ។
ទោះជាយ៉ាងណាក្តី ប្រជាពលរដ្ឋមួយចំនួនទៅមើលឃើញចម្លែកក៏អុជធូបសុំទឹកមន្តពីវល្លិនោះ ដើម្បីសុំសេចក្តីសុខ ប៉ុន្តែមិនដឹងថា អ្នកសុំទឹកមន្តនោះទទួលភាពស័ក្តិសិទ្ធិមែនឬយ៉ាងណាទេ ។ ពីមួយថ្ងៃទៅមួយថ្ងៃដំណឹងនេះដឹងតៗគ្នាដល់ប្រជាពលរដ្ឋក៏នាំគ្នាទៅសុំមើលវល្លិចម្លែកកាន់តែច្រើនឡើង។ ព្រះតេជគុណសូត្រ សុខចាន់ មានថេរដីកាទៀតថា កន្លងមកព្រះអង្គធ្លាប់ស្តាប់ព័ត៌មានដឹងថា មានវល្លិចម្លែកបែបនេះ ត្រូវគេប្រទះឃើញនៅខេត្តកំពតដែរ ៕
ចែករំលែកព័តមាននេះ