រាជធានីភ្នំពេញ ៖ កញ្ញា ឡេង ជូលីអ្នកចម្រៀងវ័យ២៨ឆ្នាំ ក្នុងទឹកមុខស្រស់ស្រាយប្រកបដោយរូបសម្ផស្សស្រស់ស្អាតនិយមស្លៀកពាក់ជាលក្ខណៈនារីខ្មែរមួយរយៈចុងក្រោយ នេះ មានឱកាសបានឡើងច្រៀងជាកិត្តិយសនៅលើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍នានា ដែលនេះជាការបង្ហាញមុខ បង្ហាញសមត្ថភាព និងទឹកដមសំឡេង ឱ្យប្រិយមិត្តទស្សនិកជនបានឃើញ បានស្តាប់សំនៀងរបស់នាងជាសា ធារណៈរាល់សប្តាហ៍ដូចជាស្ថានីយទូរទស្សន៍ CTN អាស៊ីអាគ្នេយ៍ ប៉ុស្តិ៍លេខ៣ ប៉ុស្តិ៍អប្សរា ជាពិ សេសទូរទស្សន៍ប៉ុស្តិ៍បាយ័ន ក្នុងកម្មវិធីនាទី«យុទ្ធជន» កម្មវិធីតន្ត្រីស្រុកស្រែ ឬកម្មវិធីប្រជុំតារាជាដើម ។
តែទោះបីជា កញ្ញា ឡេង ជូលី ហាក់មានរាសីបង្ហាញពីភាពជោគជ័យក្នុងវិស័យសិល្បៈចម្រៀងយ៉ាងណាក៏ដោយ កន្លងមកនាងធ្លាប់ជួបនូវរឿងរាវស្នេហាបរាជ័យ ហើយបានផ្លាស់ប្តូរចិត្តពីនិយមស្លៀកពាក់បែបស៊ិចស៊ីមកជាស្លៀកពាក់បែបប្រពៃណីខ្មែរវិញម្តង ហើយបទចម្រៀងទៀតសោតនាងជ្រើសរើសតែបទបែបមនោសញ្ចេតនាស្នេហាព្រាត់ប្រាស់ និងបទប្រពៃណី បទប្រជាប្រិយ រាំវង់ រាំក្បាច់ សារ៉ាវ៉ាន់ ឡាំ លាវតែប៉ុណ្ណោះ ឯបទសប្បាយៗហាក់ដូចជារសាត់ឆ្ងាយពីនាងទៅហើយក៏មិនដឹង ។ ជា មួយគ្នានេះ កញ្ញា ជូលី បានអះអាងថា ក្រោយពីជួបស្នេហាបរាជ័យដោយនាងធ្លាប់មានសង្សារស្រឡាញ់គ្នាខុសក្បួនតម្រាមិនបានរៀបនោះមក ពេលនេះនាងអះអាងថាមិនមានជាប់ពាក់ព័ន្ធស្នេហាជាមួយបុរសណាម្នាក់នៅឡើយទេ ។ មានបុរសជាច្រើនទាំងអ្នកមានប្រពន្ធកូនហើយ ពោះម៉ាយ កម្លោះក្មេងៗតាមញ៉ែសុំស្នេហាពីនាងដែរ តែនាងបានបដិសេធមិនទទួលយកទេ ព្រោះស្នេហារបៀបឆក់កណ្តៀតនេះមិនបានយូរទេ គឺជាស្នេហាបោកប្រាស់ ដែលនាងធ្លាប់ឆ្លងកាត់ម្តងរួចមកហើយ ពេលនេះស្ទើតែស្មាលាទៀតផង ។ ទោះបីជាយ៉ាងណារឿងស្នេហានាងបានសម្រេចចិត្តរួចហើយថា ទុកឱ្យព្រហ្មលិខិតជាអ្នកសម្រេចទៅចុះ ។ នាងនិយាយថា «ពេលនេះនាងខ្ញុំកំពុងតែកសាងកេរ្តិ៍ឈ្មោះនៅក្នុងពិភពសិល្បៈចម្រៀងឱ្យមានការគាំទ្រពីមហាជនឱ្យកាន់តែច្រើនកើនឡើង ដើម្បីដណ្តើមកេរ្តិ៍ឈ្មោះល្បី»។
កញ្ញា ឡេង ជូលី បានចាប់អាជីពជាអ្នកចម្រៀងតាំងពីឆ្នាំ២០០១ មកម៉្លេះតែទើបនឹងលេចធ្លោប៉ុន្មាន៥ឆ្នាំចុងក្រោយនេះ នៅលើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍នានា ។ ក្រៅពីនេះ កញ្ញា ឡេង ជូលី បានច្រៀងឱ្យផលិតកម្មក្រៅប្រទេសមួយចំនួនទៀតផង និងសម្តែងថតស្ប៉តអប់រំពីបរិស្ថាននិងស្ប៉តពាណិជ្ជកម្មផ្សេងៗឱ្យក្រុមហ៊ុននានាជាច្រើនដែរ ។ កញ្ញា ឡេង ជូលី បានឱ្យដឹងថា នាងមានគម្រោងចេញទៅសម្តែងនិងច្រៀងនៅឯ ប្រទេសបារាំង តែមិនទាន់ដឹងច្បាស់ថា ចេញទៅថ្ងៃណាខែណានោះទេ ៕
ចែករំលែកព័តមាននេះ