ខេត្តព្រះសីហនុ ៖ សាច់ជ្រូកព្រៃចំនួន១៨គីឡូក្រាម ក្នុងចំណោម៥០គីឡូក្រាម ដែលលោកនាយសង្កាត់រដ្ឋបាលព្រៃឈើ ស្រុកស្រែអំបិល ចាប់ពីប្រជាពលរដ្ឋ ហើយបម្រុងដឹកទៅលក់នៅផ្សារវាលរេញស្រុកព្រៃនប់ ត្រូវបានកម្លាំងប៉េអឹមស្នាក់ការ៤០១ សហការជាមួយរដ្ឋបាលព្រៃឈើខេត្តកោះកុងស្ទាក់ចាប់បានកាលពីវេលាម៉ោង៨និង៣០នាទីព្រឹកថ្ងៃទី២៩ មីនា ២០១២ នៅចំណុចមុខវត្តគិរីវ័ន ស្ថិតក្នុងឃុំស្ទឹងឆាយ ស្រុកកំពង់សិលា ខេត្តព្រះសីហនុ។
យោងតាមប្រភពពីប្រជាពលរដ្ឋម្នាក់បានឱ្យដឹងថា មន្ត្រីរដ្ឋបាលព្រៃឈើដែលចាប់សាច់ជ្រូកព្រៃពីប្រជាពលរដ្ឋហើយមានបំណងដឹកទៅលក់ខ្លួនឯងនោះឈ្មោះព្រំ ចាន់ធី ជានាយសង្កាត់រដ្ឋបាលព្រៃឈើស្រុកស្រែអំបិល។ ប្រភពពីស្រ្តីម្នាក់ដែលអះអាងថា ជាម្ចាស់សាច់ជ្រូកព្រៃបានប្រាប់ឱ្យដឹងថា គាត់បានទិញសាច់នេះ ពីអ្នកដាក់អន្ទាក់ព្រៃតែពេលដឹកចេញពីព្រៃក៏មានមនុស្ស២នាក់ ជិះរថយន្តកាមរីគូទហើមពណ៌ស្លែ អះអាងថា ខ្លួនជាមេព្រៃបានស្ទាក់ចាប់នៅចំណុចស្ពានត្រពាំងអំហែក ស្រុកស្រែអំបិល ខេត្តកោះកុង វេលាម៉ោង៧ព្រឹកថ្ងៃទី២៩ មីនា ហើយក៏បានលើកសាច់ទំាងនោះដាក់ក្នុងគូទរថយន្តបើកចេញបាត់ទៅ។
លោក ឌី សុខុម នាយរដ្ឋបាលព្រៃឈើខេត្តព្រះសីហនុបាននិយាយថា សាច់ជ្រូកព្រៃដែលកម្លាំងប៉េអឹម៤០១ ចាប់បាន នឹងត្រូវដុតចោលនៅថ្ងៃទី៣០ មីនា ២០១២នេះ។ ឯចំណាត់ការទៅលើមន្ត្រីរដ្ឋបាលព្រៃឈើដែលបង្រ្កាបបានបែរជាយកទៅធ្វើអាជីវកម្មខ្លួនឯងនោះលោកមិនបានបញ្ជាក់ប្រាប់យ៉ាងណានោះទេ៕
ចែករំលែកព័តមាននេះ