ខេត្តពោធិ៍សាត់ ៖ ករណីឃាតកម្មកាប់សម្លាប់ដ៏សាហាវនៅភូមិក្របៅជ្រុំ ឃុំបាក់ចិញ្ចៀន ស្រុកភ្នំក្រវាញ កាលពីយប់ថ្ងៃទី១២ កុម្ភៈ ២០១២ កន្លងមកនេះ ត្រូវសមត្ថកិច្ចចុះស្រាវជ្រាវឃាត់ខ្លួនបក្សពួកជនដៃដល់បានម្នាក់ក្នុងចំណោម៤នាក់ ដែលរត់គេចខ្លួន ។
លោកអនុសេនីយ៍ឯក សូ សាហុង អធិការរងនគរបាលស្រុកភ្នំក្រវាញ បានឱ្យដឹងថា បន្ទាប់ពីមានករណីឃាតកម្មនោះមកសមត្ថកិច្ចបានស្រាវជ្រាវរហូតនៅថ្ងៃទី១៦ កុម្ភៈ ២០១២ ទើបឃាត់ខ្លួនក្រុមជនដៃដល់បានម្នាក់ឈ្មោះឈិន វុទ្ធី ភេទប្រុស អាយុ២៤ឆ្នាំ នៅភូមិកំពែង ឃុំព្រងិល ស្រុកភ្នំក្រវាញ ។ ប្រភពបន្តថា នៅចំពោះមុខសមត្ថកិច្ចជនសង្ស័យបានឆ្លើយសារភាពថា ខ្លួនមិនមែនជាជនដៃដល់ទេ គ្រាន់តែរួមដំណើរជាមួយគ្នាប៉ុណ្ណោះ ឯជនដៃដល់នោះ គឺឈ្មោះជឿន ហាន់ ដែលរត់គេចខ្លួនបាត់ទៅហើយ ។ ជនសង្ស័យបានរៀបរាប់ថា កាលពីយប់ថ្ងៃកើតហេតុខ្លួន និងបក្សពួក៣នាក់ទៀត ១-ឈ្មោះជឿន ហាន់ ភេទប្រុស អាយុ២៥ឆ្នាំ ជាជនដៃដល់ ២-ឈ្មោះលីន ចិត្រា ភេទប្រុស អាយុ២៣ឆ្នាំ និង៣-ឈ្មោះហុង ចន្ធី ហៅឡុង ភេទប្រុស អាយុ២៤ឆ្នាំ ទាំងអស់គ្នារស់នៅភូមិកំពែង ឃុំព្រងិល ស្រុកភ្នំក្រវាញ បាននាំគ្នាទៅមើលគេរាំធុងបាស ដោយម្នាក់ៗមានកាន់កាំបិតកកុក ពូថៅ និងកាំបិតរណារច្នៃ ក្នុងបំណងទៅកាប់ពួកក្របៅជ្រុំ ឃុំបាក់ចិញ្ចៀន ពិសេសឈ្មោះពៅ និងឈ្មោះលុច ព្រោះពួកនេះធ្លាប់មានរឿងជាមួយពួកខ្លួនកន្លងមក ។
ប្រភពឱ្យដឹងទៀតថា ខណៈមកដល់ម៉ោងប្រហែល១១យប់ ឈ្មោះជឿន ហាន់ ក៏ចូលទៅកាប់ឈ្មោះឃឿម ភក្តី ជាជនរងគ្រោះ ដែលកំពុងដេកលើគ្រែក្រោមផ្ទះមួយកាំបិតកកុកចំ.ករួចនាំគ្នារត់ឆ្លងស្ទឹងមកផ្ទះវិញរៀងៗខ្លួន ។ លុះនៅថ្ងៃទី១៦ កុម្ភៈ ២០១២ ស្រាប់តែសមត្ថកិច្ចស្រុកភ្នំក្រវាញ មកឃាត់ខ្លួនតែម្តង ឯជនដៃដល់ និងបក្សពួក២នាក់ទៀតដឹងដូច្នេះក៏នាំគ្នារត់គេចខ្លួនបាត់អស់ ៕
ចែករំលែកព័តមាននេះ