រាជធានីភ្នំពេញ ៖ តារាប្រចាំផលិតកម្មរស្មីហង្សមាស គឺលោកសាពូន មីដាដា ប្រាប់កោះសន្តិភាពថា លោកមិនចង់ឱ្យសារព័ត៌មានរំលឹករឿងអតីតកាលរបស់លោកទេ ព្រោះវាជារឿងកន្លងហួសទៅហើយ អ្វីដែលត្រូវគិតនោះគឺអនាគតកាល ។
សាពូន មីដាដា ធ្លាប់ត្រូវបានទស្សនាវដ្តីក្នុងស្រុកមួយចំនួនចុះផ្សាយថា លោកមានទំនាក់ទំនងស្នេហាយ៉ាងស្អិតរមួតជាមួយស្ត្រីអាណិកជនម្នាក់រស់នៅអាមេរិក មុនពេលលោករៀបអាពាហ៍ពិពាហ៍ជាមួយតារាភាពយន្តសឿ សុធារ៉ា ។ តាមសារព័ត៌មានចុះផ្សាយចំណងស្នេហ៍រវាងសាពូន មីដាដា ជាមួយស្ត្រីអាណិកជននោះគឺមិនធម្មតាឡើយ ហើយពេលដែលសាពូន មីដាដារៀបអាពាហ៍អាពាហ៍ស្ត្រីអាណិកជននោះបានទម្លាយអាថ៌កំបាំងនៃទំនាក់ទំនងស្នេហារវាងនាងនិងសាពូន មីដាដា ទៀតផង ។
ផ្តល់បទសម្ភាសន៍ជាមួយកោះសន្តិភាពតារាចម្រៀងសាពូន មីដាដា បានបង្ហាញនូវការមិនសប្បាយចិត្តចំពោះសារព័ត៌មានដែលបានចុះផ្សាយរឿងរ៉ាវអតីតកាលរបស់លោក ។ ជាមួយនោះលោកបានបដិសេធចំពោះការចុះផ្សាយកន្លងមកថាជាការចុះផ្សាយព័ត៌មានមិនពិត និងប្រាសចាកពីក្រមសីលធម៌វិជ្ជាជីវៈ ។ ដោយចាត់ទុកសារព័ត៌មានកោះសន្តិភាពជាសារព័ត៌មានឈានមុខនិងទទួលបានការគាំទ្រពីសាធារណជននោះ សាពូន មីដាដា បានផ្ញើសារដល់សារព័ត៌មានទាំងអស់កុំសរសេរព័ត៌មានមិនពិត ឬព័ត៌មានបំផ្លើសដែលនាំឱ្យប្រជាពលរដ្ឋបាត់បង់ជំនឿ ។
ពាក់ព័ន្ធរឿងរ៉ាវផ្ទាល់ខ្លួន សំខាន់បញ្ហាទំនាក់ទំនងស្នេហានោះសាពូន មីដាដា បញ្ជាក់ថា លោកសុំឱ្យសារព័ត៌មានភ្លេចរឿងរ៉ាវអតីតកាលដែលរឿងរ៉ាវទាំងនោះមិនពិតទេ ។ ចំណែកអ្វីដែលពិតនិងភស្តុតាងជាក់ស្តែងនោះគឺ លោកបានរៀងអាពាហ៍ពិពាហ៍ស្របច្បាប់រហូតមានបុត្រមួយជាចំណងដៃថែមទៀត ។
សាពូន មីដាដា បានលើកឡើងថា បុគ្គល ម្នាក់ៗសំខាន់សិល្បករ សិល្បការិនី ទម្រាំកសាងខ្លួនបានដូចសព្វថ្ងៃនេះ គឺត្រូវឆ្លងកាត់ការលំបាកយ៉ាងច្រើនរាប់មិនអស់ និងប្រើរយៈពេលយូរណាស់ ។ ដូច្នេះគ្មានអ្នកណាចង់ឱ្យមានបញ្ហាអាក្រក់មកពាក់ព័ន្ធនឹងបញ្ហាជីវិតទេ ។ យ៉ាងណាក៏ដោយតារាចម្រៀងដ៏ល្បីល្បាញរូបនេះនៅតែមានជំនឿលើសារព័ត៌មានកោះសន្តិភាពថា ជាស្ថាប័នសារព័ត៌មានប្រកបដោយវិជ្ជាជីវៈ និងទទួលការគាំទ្រច្រើនជាងគេនៅកម្ពុជា។ ហេតុនេះតាមរយៈសារព័ត៌មានមានកោះសន្តិភាពសាធារណជន នឹងបានដឹងការពិតពីជីវិតរបស់លោករួមទាំងគ្រួសារលោកមិនខាន ។
ពាក់ព័ន្ធនឹងការងារសិល្បៈសាពូន មីដាដា បញ្ជាក់ថា លោកកំពុងត្រៀមចេញបទចម្រៀងថ្មីៗបន្ថែមទៀតសំខាន់បទចម្រៀងសម្រាប់ ការប្រគំតន្ត្រី Best of The Best ដែលគ្រោងរៀបចំធ្វើនៅថ្ងៃទី១៤ ខែកុម្ភៈ ឆ្នាំ២០១២ ៕
ចែករំលែកព័តមាននេះ