រាជធានីភ្នំពេញ ៖ ស្ត្រីម្នាក់ត្រូវបានអាជីវករលក់ហូលផាមួងចាប់ខ្លួនប្រគល់ ឱ្យបូ៉លិសប៉ុស្តិ៍ទឹកល្អក់ទី១ ខណ្ឌទួលគោក កាលពីវេលាម៉ោង១០និង៣០នាទីព្រឹក ថ្ងៃទី៣ មករា ឆ្នាំ២០១២ នៅពេលដែលស្ត្រីរូបនោះធ្វើជាចូលទៅទិញហូលផាមួង ហើយបន្លំលួចយកហូលផាមួងលាក់ក្នុងអាវតែត្រូវអស់លក្ខណ៍ដោយសារ ម្ចាស់ហាងមើលតាមកាមេរ៉ាឃើញ ។
រាជធានីភ្នំពេញ ៖ ស្ត្រីម្នាក់ត្រូវបានអាជីវករលក់ហូលផាមួងចាប់ខ្លួនប្រគល់ឱ្យបូ៉លិសប៉ុស្តិ៍ទឹកល្អក់ទី១ ខណ្ឌទួលគោក កាលពីវេលាម៉ោង១០និង៣០នាទីព្រឹក ថ្ងៃទី៣ មករា ឆ្នាំ២០១២ នៅពេលដែលស្ត្រីរូបនោះធ្វើជាចូលទៅទិញហូលផាមួង ហើយបន្លំលួចយកហូលផាមួងលាក់ក្នុងអាវតែត្រូវអស់លក្ខណ៍ដោយសារម្ចាស់ហាងមើលតាមកាមេរ៉ាឃើញ ។ ការលួចនេះគឺជាលើកទី៣ ហើយតែលើកចុងក្រោយទំនងជាញ៉ាមក៏មកបន្លំលួចម្តងទៀត ទើបត្រូវអស់លក្ខណ៍បែបនេះ ។
ស្ត្រីសង្ស័យលួចហូលផាមួងត្រូវប៉ូលិសឱ្យដឹងថា ឈ្មោះឃ្លោក វ៉ៃ អាយុ៤៤ឆ្នាំ មានទីលំនៅភូមិបោះអង្កាញ់ ឃុំប្រធាតុ ស្រុកកំពង់ត្របែក ខេត្តព្រៃវែង ។ ចំណែកម្ចាស់ហូលផាមួងឈ្មោះតាំង ហ៊ួយលាង ភេទប្រុស អាយុ៤៥ឆ្នាំ មានទីលំនៅផ្ទះលេខ៥ ផ្លូវលេខ២៥៣ សង្កាត់ទឹកល្អក់ទី១ ខណ្ឌទួលគោក ដែលជាផ្ទះលក់ហូលផាមួង និងក្រណាត់ប៉ាក់ ។
តាមមន្ត្រីប៉ូលិសឱ្យដឹងថា ស្ត្រីសង្ស័យត្រូវបានអាជីវករលក់ហូលផាមួងចាប់ខ្លួនប្រគល់ឱ្យសមត្ថកិច្ចនៅពេលស្ត្រីនោះធ្វើសកម្មភាពបន្លំចូលទៅក្នុងហាងអាជីវករខាងលើលួចហូលផាមួងចំនួន៣លើកមានចំនួន៣៤ក្បិន និងក្រណាត់ប៉ាក់ចំនួន៣ដុំ សរុបមានតម្លៃ៨.០៣២ដុល្លារ ។ ទោះបីយ៉ាងណាស្ត្រីរូបនោះបានសារភាពថា លួចបានតែចំនួន១៧ក្បិនប៉ុណ្ណោះ ។
តាមមន្ត្រីប៉ូលិសឱ្យដឹងទៀតថា កាលពីថ្ងៃទី៨-២០ និង២៩ ធ្នូ ឆ្នាំ២០១១ ស្ត្រីសង្ស័យបានចូលទៅក្នុងហាងលក់ហូលផាមួង និងក្រណាត់ប៉ាក់របស់ឈ្មោះតាំង ហ៊ួយលាង ហើយបន្លំធ្វើជាអ្នកទៅរកទិញហូលផាមួង និងក្រណាត់ប៉ាក់។ នៅក្នុងរយៈពេល៣ថ្ងៃនោះម្ចាស់ហាងបានបាត់បង់ហូលផាមួងចំនួន៣៤ក្បិន និងក្រណាត់ប៉ាក់ចំនួន៣ដុំ។ ដោយមានការសង្ស័យម្ចាស់ហាងបានពិនិត្យមើលកាមេរ៉ាសុវត្ថិភាពក៏បានឃើញស្ត្រីសង្ស័យឈ្មោះឃ្លោក វ៉ៃ ជាអ្នកលួច ទើបមានការប្រុងប្រយ័ត្ន និងចាំឃ្លាំមើលស្ត្រីដៃឆើតនោះក្រែងត្រឡប់មកម្តងទៀត។ នៅវេលាម៉ោង១០និង៣០នាទីព្រឹកថ្ងៃទី៣ មករា ឆ្នាំ២០១២ ស្រាប់តែឃើញស្ត្រីនោះត្រឡប់មកម្តងទៀតមែន ក៏ឃាត់ខ្លួនប្រគល់ឱ្យប៉ូលិសតែម្តង ។
នៅចំពោះមុខប៉ូលិសស្ត្រីរូបនោះបានសារភាពថា ខ្លួនពិតជាបានធ្វើសកម្មភាពលួចប្រាកដមែន ដោយលួចចំនួន៣លើក បានហូលផាមួងចំនួន១៧ក្បិន ហើយនៅពេលលួចបានយកទៅលក់នៅផ្សារចាស់បាន១ក្បិន៥០ដុល្លារ ៕ ជលធា
ចែករំលែកព័តមាននេះ