រាជធានីភ្នំពេញ ៖ រថយន្តទួរីសប្រភេទ១២កៅអី ម៉ាកស្តារិច ពណ៌ទឹកប្រាក់ ពាក់ស្លាកលេខ ក្រុងព្រះសីហនុ 2A-0569 បានឆាបឆេះសន្ធោសន្ធៅចេញពីកាបូ (ក្បាល) ខ្ជាក់ផ្សែងខ្មៅហុយទ្រលោមបង្កឱ្យមានការភ័យភ្ញាក់ផ្អើល ហៅរថយន្តពន្លត់អគ្គិភ័យមកជួយបាញ់ទឹកពន្លត់ កាលពីវេលាម៉ោង៥និង៣០នាទីល្ងាចថ្ងៃទី២១ ធ្នូ ២០១១ លើកំណាត់មហាវិថីសហព័ន្ធរុស្ស៊ី ត្រង់ចំណុចភ្លើងស្តុបមុខព្រលានយន្តហោះអន្តរជាតិភ្នំពេញ ស្ថិតក្នុងភូមិក្បាលដំរី សង្កាត់កាកាប ខណ្ឌដង្កោ ។
នារីអ្នកបើកបររថយន្តនេះឈ្មោះហេង ស្រីនាង អាយុ២៥ឆ្នាំ មិនត្រូវបានគេដឹងថា មានទីលំនៅឯណាទេ និងធ្វើការនៅកន្លែងណាក៏មិនដឹងដែរ ព្រោះពេលរថយន្តឆេះផ្អើល នាងមានអាការភ័យស្លេកស្លាំង ហើយនិយាយជាមួយអ្នកដំណើរបានបន្តិចបន្តួច ក៏គេចខ្លួនបាត់ទៅ…។ តាមប្រភពព័ត៌មានពីអ្នកដឹងរឿងហេតុខ្លះៗ បានប្រាប់ថា មុនពេលកើតហេតុ រថយន្តប្រភេទ១២កៅអីនេះត្រូវបាននារីអ្នកបើកបរយកចេញពីយានដ្ឋានជួសជុល (ឡានទើបជួលជុលហើយ) មួយកន្លែងក្នុងសង្កាត់ចោមចៅ ហើយបើកចូលមករាជធានីភ្នំពេញ លុះពេលយប់ភ្លើងស្តុបមុខព្រលានយន្តហោះអន្តរជាតិភ្នំពេញ ស្រាប់តែមានចំហេះឆាបឆេះហុយផ្សែងទ្រលោម និងអណ្តាតភ្លើងសន្ធោឡើងតែម្តង។
ការឆេះនេះបានធ្វើឱ្យអ្នកផងទាំងឡាយភ័យឆោឡោផងដែរ ដោយខ្លាចវាឆាបឆេះរាលដាលធំឡើងបង្កឱ្យមានគ្រោះថ្នាក់ធ្ងន់ធ្ងរ ព្រោះនៅមុខព្រលានយន្តហោះផង ក៏ប្រញាប់រាយការណ៍ប្រាប់សមត្ថកិច្ច ។ ជាបន្ទាន់រថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញ ដែលប្រចាំការនៅសាលាខណ្ឌដង្កោ បានចេញទៅបាញ់ទឹកពន្លត់យ៉ាងញាប់ដៃញាប់ជើង ដែលមិនបានប៉ុន្មាននាទីផង សមត្ថកិច្ចបានបង្ក្រាបឱ្យភ្លើងរលត់ទាំងស្រុង។
មូលហេតុនៃការឆាបឆេះនេះត្រូវបានគេសន្និដ្ឋានថា អាចបណ្តាលមកពីទុស្សេខ្សែភ្លើងនៅក្នុងម៉ាស៊ីន ឬអាចថា គេយកខ្សែភ្លើងធម្មតាមកតភ្ជាប់នៅកន្លែងណា ទើបបណ្តាលឱ្យឆាប់រលួយឆេះ ព្រោះខ្សែភ្លើងធម្មតាមិនស៊ូនឹងកំដៅដូចខ្សែភ្លើងសម្រាប់ប្រើប្រាស់ជាមួយរថយន្តទេ៕ ចោមចៅ
ចែករំលែកព័តមាននេះ