ខេត្តស្វាយរៀង ៖ យ៉ាងហោចណាស់ សង្ឃកំហូច៣អង្គត្រូវបានព្រះមេគណៈខេត្តផ្សឹកទាំងយប់ក្រោយពីមានភាពតានតឹងប្រទាញប្រទង់គ្នារវាងសមត្ថកិច្ចរួមជាមួយអាជ្ញាធរ និងចៅអធិការវត្តជម្ពូព្រឹក្សា ជាព្រះមេគណខេត្ត ព្រមទាំងអនុគណស្រុក ក្រុង ព្រះវិន័យធរ ក្នុងការអនុវត្តតួនាទីព្រះពុទ្ធសាសនា តួនាទីរបស់សមត្ថកិច្ចនគរបាល និងតុលាការយ៉ាងតឹងតែងអស់រយៈពេលពេញ១ថ្ងៃ អត់បាយក្រហាយទឹក រួមទាំងប្រជាពលរដ្ឋពុទ្ធបរិស័ទចាស់ក្មេងជាង២០០នាក់ ដែលជាពុទ្ធបរិស័ទចំណុះជើងវត្តនាំគ្នាមកព័ទ្ធឃ្លាំមើលអត់បាយក្រហាយទឹកដូចគ្នា រហូតដល់ម៉ោង៧យប់ ទើបសមត្ថកិច្ចសំណូមពរឱ្យប្រជាពលរដ្ឋ និងអ្នកសារព័ត៌មាន ទូរទស្សន៍ចាកចេញពីបរិវេណកុដិ និងចេញទៅក្រៅវត្ត ។
ទាក់ទិនករណីដ៏តានតឹងនេះ លោកវរសេនីយ៍ត្រីកុយ សុភាព នាយរងការិយាល័យព្រហ្មទណ្ឌកម្រិតធ្ងន់ស្នងការដ្ឋាននគរបាលខេត្តមានប្រសាសន៍ថា ដោយពេលយប់ងងិត សមត្ថកិច្ច ពិបាកការពារជនសង្ស័យ ក៏សុំឱ្យភាគីព្រះសង្ឃ ធ្វើលិខិតធានាដោយផ្តិតមេដៃធានាថា មិនឱ្យបាត់សង្ឃទាំង៥អង្គដែលកុមារីរងគ្រោះ២នាក់ចង្អុលបង្ហាញ និងចោទប្រកាន់ថា បានរួមគ្នា ចាប់រំលោភ មិនឱ្យបាត់ពីកុដិ ។ បើបាត់សង្ឃណាមួយត្រូវតែទទួលខុសត្រូវនៅចំពោះមុខច្បាប់ ជាធរមាន ហើយព្រះសង្ឃទាំងអស់ ក៏មានការអល់អែក ។
លោកបន្តទៀតថា លុះដល់ម៉ោង៧ និង១០នាទីក្រោយពីដឹងថា អ្នកសារព័ត៌មាន និងប្រជាពលរដ្ឋពុទ្ធបរិស័ទចាកចេញពីវត្តអស់ព្រះមេគណខេត្តក៏យល់ព្រមធ្វើពិធីផ្សឹកសង្ឃ៣អង្គនាពេលនោះទៅ ។ រីឯសង្ឃ២អង្គទៀតពិនិត្យឃើញមិនពាក់ព័ន្ធទេ គ្រាន់តែជាសាក្សី ទើបឱ្យរួចខ្លួន ។ ពិធីផ្សឹកសង្ឃ៣អង្គបានចប់នៅវេលាម៉ោង៧ និង២០នាទីយប់ ថ្ងៃទី១១ វិច្ឆិកា រួចបានប្រគល់អន្ទិតទាំង៣នាក់ឱ្យច្បាប់ចាត់ការ ដោយក្រុមសមត្ថកិច្ចបានចាប់វាយខ្នោះដៃភ្លាមៗរួចបណ្តើរចុះពីលើកុដិឡើងរថយន្តប៉ូលិសចាកចេញប្រញាប់ប្រញាល់បញ្ជូនទៅកាន់ស្នងការដ្ឋាននគរបាលខេត្ត ។ រីឯអ្នកសារព័ត៌មានក៏បានចូលមកថតរូបភាព ចំណែកប្រជាពលរដ្ឋបានឈរចាំនៅថ្នល់ជាតិខាងមុខក្លោងទ្វារវត្ត តែមិនអាចចូលជិតរថយន្តបានទេ ដោយមានក្រុមសមត្ថកិច្ចនគរបាល និងកងរាជអាវុធហត្ថខេត្ត-ក្រុងនៅការពាររហូតរថយន្តចាកចេញផុតពីហ្វូងប្រជាពលរដ្ឋ ។
មានការកត់សម្គាល់ថា ពេលផ្សឹកអន្ទិតទាំង៣នាក់នោះមានការបិទភ្លើងអគ្គិសនីក្នុងវត្តងងិត ឈឹង គួរឱ្យកត់សម្គាល់រហូតដល់ម៉ោង៧ និង៣០នាទីយប់ ទើបប្រជាពលរដ្ឋបំបែកគ្នាទៅផ្ទះរៀងៗខ្លួន ។ នៅថ្ងៃទី១២ វិច្ឆិកា វេលាម៉ោង៧ព្រឹក សមត្ថកិច្ចបានធ្វើការសាកសួរអន្ទិតកំហូចទាំង៣នាក់មានការកត់សម្គាល់ថា ទាំង៣នាក់បានសារភាពថា ក្រោយផឹកស្រាបៀររូបដំរី អស់១កេសកន្លះ មក ក៏ស្រវឹងហើយដើរចេញទៅមើលគេរាំ តែមិនហ៊ានទៅជិតទេ ក៏ដើរតាមកែងព្រះវិហារ ក៏ឃើញក្មេងស្រីទាំងពីរឈរលេងនៅខាងត្បូងព្រះវិហារ ក៏ដើរទៅនិយាយលេង ហើយក៏ឈានដល់ការត្រេកត្រអាលទើបចាប់ក្មេងទាំងពីរនៅមុខចេតិយខាងកើតព្រះវិហារ ។ ទន្ឌិតឌុន សុខគារ ចាប់កុមារីម្នាក់ រំលោភនៅខាងកើតព្រះវិហារជាមួយអន្ទិតឈ្មោះនៅទុត ។ រីឯអន្ទិតខាត់ វណ្ណៈ ចាប់កុមារីទៅខាងជើងចេតិយរំលោភនៅទីនោះ ដោយកុមារីរើបំរះពេក ទើបគេយកខ្សែអុត្តខុក (ខ្សែចង្កេះ) ចងដៃទៅក្រោយរួចរំលោភម្នាក់ឯងបាន២ដង ។ រីឯឌុន សុខគា រំលោភ រួចក៏មិនឱ្យនាងទៅណាដែរ ទុករំលោភម្តងទៀត តែមិនទាន់បានម្តងទៀតផង ត្រូវឪពុកកុមារីចុចភ្លើងពិលចំក៏នាំគ្នារត់ចេញទៅ ។
សមត្ថកិច្ចបានប្រាប់ឱ្យដឹងទៀតថា បានសាកសួរកុមារីរងគ្រោះទាំងពីរប្រាប់ថា មានសង្ឃ៤អង្គចាប់រំលោភពួកនាង និងសង្ឃ២អង្គទៀតជាអ្នកមើលផ្លូវ ទើបព្រះរាជអាជ្ញាឱ្យសមត្ថកិច្ចស្រាវជ្រាវសាកសួរសង្ឃ៦អង្គ ។ ហេតុការណ៍ទាំងអស់នោះហើយ ដែលខាងព្រះសង្ឃរារាំង និងមានការប្រទាញប្រទង់គ្នាជាមួយសមត្ថកិច្ចក្នុងការអនុវត្តតួនាទីចំពោះព្រះសង្ឃ ខ្លាចចាប់មនុស្សខុស ។ ពេលសួរអន្ទិតទាំង៣នាក់គេបញ្ជាក់ថា គឺធ្វើសកម្មភាពរំលោភតែ៣នាក់ទេ គឺអន្ទិតខាត់ វណ្ណៈ រំលោភ២ដង ម្នាក់ឯង និងឌុន សុខគា រួមជាមួយនៅ ទុត បានម្នាក់ម្តង និងទុករំលោភម្តងទៀតទើបក្មេងស្រីគិតថា ៤នាក់ ។ ពេលរត់ចេញទៅឃើញសង្ឃគង់កណ្តាលផ្លូវ២អង្គទៀតក៏ចោទថា សង្ឃ២អង្គចាំមើលផ្លូវ ។ ទោះបីជាបែបណា សមត្ថកិច្ចបន្តស្រាវជ្រាវរឿងក្តីនេះទៀត ឯលទ្ធផលយ៉ាងណា គង់តែបានឃើញអ្នកប្រព្រឹត្តត្រូវតែទទួលទោស ។
អន្ទិតទាំង៣នាក់ត្រូវលោកព្រះរាជអាជ្ញាចេញដីកាឃុំខ្លួនបណ្តោះអាសន្ននៅពន្ធនាគារខេត្តនៅវេលាម៉ោង១រសៀលថ្ងៃទី១២ វិច្ឆិកា ។ រីឯកូនសិស្សលោកម្នាក់ដែលជាអ្នកទៅយកស្រាបៀរ និងគ្រឿងក្លែមឱ្យសង្ឃឆាន់ និងផឹកជាមួយសង្ឃត្រូវសមត្ថកិច្ចចាប់មកសាកសួរ ហើយបានធ្វើការអប់រំ រួចបានដោះលែងវិញហើយ ដោយយល់ឃើញថា ក្មេងកំព្រាលោកប្រើឱ្យទៅយកស្រាបៀរក៏ទៅយកឱ្យផឹកជាមួយគ្នាទៅ ។ ពេលស្រវឹងក៏ទៅដេកលក់មិនដឹងរឿងអ្វី លុះព្រឹកឡើងទើបដឹង ដោយសារប៉ូលិសចាប់ខ្លួន ទើបសមត្ថកិច្ចដោះលែងនៅល្ងាចថ្ងៃទី១២ វិច្ឆិកា ។
ចំពោះកុមារីទាំងពីរនាក់ ត្រូវអង្គការកូនក្មេង «KK» យកទៅមណ្ឌលអង្គការ KK ដើម្បីគាំពារ ។ រីឯបណ្តាញកុមារ និងមាតាបិតាសិស្សនៅក្រុងស្វាយរៀងម្នាក់ៗមានទឹកមុខក្រៀមក្រំ និងអាណិតអាសូរកុមារីរងគ្រោះទាំងពីរជាខ្លាំងដោយពួកគេនិយាយថា កុមារីទាំងពីរជានារីល្អ ស្លូតបូត និងជាកុមារីគំរូក្នុងបណ្តាញ ការពារកុមារក្រុងស្វាយរៀង ។ កុមារីទាំងពីរធ្លាប់បានធ្វើសកម្មភាពមិត្តអប់រំមិត្តឱ្យកុមារចៀសឆ្ងាយគ្រឿងញៀន ឱ្យកុមារខំរៀនសូត្រ ធ្វើកុមារល្អ កូនល្អ សង្ឃល្អ ហើយកុមារីទាំងពីរក៏ធ្លាប់បានសម្តែងរឿងចំនួន២លើក នៅមហោស្រពក្រុងស្វាយរៀង គឺរឿងអំពើហិង្សាលើកុមារ និងគ្រួសារ។ ក្នុងរឿងនេះគឺលើកយករឿងពិតរបស់កុមារីគ.ន ដែលមានជីវភាពក្រីក្រ ដោយមានឪពុកស្រវឹងខួបបានប្រើអំពើហិង្សាទៅលើ ម្តាយនាង ព្រមទាំងកូនៗដោយវាយធ្វើបាបមិនបានទៅរៀនទៀងទាត់ ទើបបណ្តាញកុមារអង្គការ KK និពន្ធរឿងពិតរបស់នាង ដើម្បីអប់រំដល់មាតាបិតាសិស្សផ្សេងទៀត និងជាសារសម្រាប់ក្មួយៗកុមារនេះតស៊ូមតិ និងតស៊ូក្នុងជីវិតចូលរួមចងក្រងបណ្តាញការពារកុមារនៅសហគមន៍៕
ចែករំលែកព័តមាននេះ