រាជធានីភ្នំពេញ ៖ ចំណងស្នេហ៍រវាងតារាចម្រៀងសុគន្ធ នីសា និងលោកសុខ ជំនោរ ដែលបានកសាងភាពផ្អែមល្ហែមរយៈពេលជាង៨ឆ្នាំមកនោះ ឥឡូវនេះឈានដល់ផ្លូវបំបែកហើយ ហើយលោកសុខ ជំនោរ ក៏បានចេញមុខបកស្រាយការពិតអំពីបញ្ហានេះដែរ។
អ្នកសិល្បៈរួមក្រុមបាននិយាយថា សុគន្ធ នីសា និងលោកសុខ ជំនោរ បានចាប់ផ្តើមឃ្លាតឆ្ងាយពីគ្នាបន្តិចម្តងៗចាប់តាំងពីសុគន្ធ នីសា ចេញទៅសម្តែងនៅប្រទេសអូស្រ្តាលី កាលពីខែសីហាមកម៉្លេះ ប៉ុន្តែលោកសុខ ជំនោរ តែងតែចេញមុខបកស្រាយរាល់ពាក្យចចាមអារ៉ាមទាំងឡាយពាក់ព័ន្ធនឹងការបែកបាក់របស់ពួកគេថា ជារឿងមិនពិត។ ឥឡូវនេះពាក្យចចាមអារ៉ាមបានក្លាយជាការពិត ខណៈពេលដែលលោកសុខ ជំនោរ ខ្លួនឯងចេញមកសារភាពថា ចំណងស្នេហ៍ពួកគេពិតជាបែកបាក់មែន ។
ជួបសម្ភាសន៍ជាមួយកោះសន្តិភាពលោកសុខ ជំនោរ និយាយថា រវាងលោក និងសុគន្ធ នីសា ប្រាកដជាបែកបាក់ប្រាកដមែន ប៉ុន្តែអាស្រ័យដោយបានភ្ជាប់ពាក្យជាមួយគ្នារួចហើយនោះ ការចែកផ្លូវ ឬលែងលះ គឺត្រូវអនុវត្តតាមផ្លូវតុលាការ ព្រោះមកដល់ពេលនេះអ្នកទាំងពីរក៏មានទ្រព្យសម្បត្តិរួមគ្នាមួយចំនួនធំដែរ ។
លោកសុខ ជំនោរ បញ្ជាក់ថា ទាំងរូបលោក និងសុគន្ធ នីសា គឺសុទ្ធសឹងមានមេធាវីរៀងៗខ្លួន សម្រាប់ដំណើរក្តីចែកផ្លូវគ្នា ប៉ុន្តែលោកមិនទាន់ដឹងទេថា តើតុលាការនឹងសម្រេចយ៉ាងណានោះ។
ពាក់ព័ន្ធនឹងសំណួរថា ក្នុងពេលលោកនិងសុគន្ធ នីសា ស្ថិតក្នុងផលិតកម្មតែមួយ តើទំនាក់ទំនងការងាររវាងអ្នកទាំង ពីរជួបការលំបាកយ៉ាងណានោះ លោកសុខ ជំនោរ និយាយថា ពួកយើងមិនមានទំនាស់អ្វីធំដុំជាមួយគ្នាទេ។ យើងចែកផ្លូវគ្នាមែន តែទំនាក់ទំនងជាធម្មតាទាំងក្នុងការងារ និងទំនាក់ទំនងផ្សេងទៀត គឺនៅរក្សាដដែល ។
លោកសុខ ជំនោរ មិនបានលើកឡើងអំពីមូលហេតុសំខាន់ដែលនាំឱ្យចំណងស្នេហ៍ត្រូវបែកបាក់ទេ ប៉ុន្តែលោកគ្រាន់តែបញ្ជាក់ថា មិនមានអ្នកទី៣ ណាម្នាក់មកជ្រៀតជ្រែកចំណងស្នេហ៍របស់លោកទេ ហើយបើមានការនិយាយថា សុគន្ធ នីសាមានអ្នកទី៣ នោះក៏លោកមិនជឿដែរ ព្រោះលោកស្គាល់ចិត្តស្គាល់ថ្លើមសុគន្ធ នីសាច្បាស់ណាស់ ។
លោកសុខ ជំនោរ ប្រាប់ថា ពេលដែលការដោះស្រាយតាមផ្លូវច្បាប់បានចប់សព្វគ្រប់ហើយនោះ លោកនឹងរៀបចំធ្វើសន្និសីទសារព័ត៌មានមួយពាក់ព័ន្ធនឹងការបែកបាក់រវាងលោក និងសុគន្ធ នីសា ដើម្បីឱ្យសាធារណជនបានដឹងការពិត និងលែងមានការសង្ស័យបន្តទៀត ។
ការលើកឡើងរបស់លោកសុខ ជំនោរ ពាក់ព័ន្ធ ការបែកបាក់រវាងលោក និងសុគន្ធ នីសានោះមើលទៅហាក់ដូចជាមិនទាន់សមហេតុផល ឬធ្វើឱ្យសាធារណជនលែងមន្ទិលទេ ។
តាមព័ត៌មានដែលទទួលបានកន្លងមក គឺនៅពេលសុគន្ធ នីសា វិលមកពីការសម្តែងនៅអូស្ត្រាលីវិញ នាងមិនដែលបង្ហាញមុខលើវេទិកាផ្សេងៗដូចពេលមុនទេ ខណៈដែលព័ត៌មានតាមហ្វេសប៊ុកសុគន្ធ នីសាបានលុបចោលព័ត៌មានអំពីការភ្ជាប់ពាក្យជាមួយលោកសុខ ជំនោរ ហើយប្តូរពីពាក្យមានគូដណ្តឹងមកនៅលីវវិញ រហូតលេចព័ត៌មានបែកបាក់នេះតែ ម្តង ។
រឿងរ៉ាវស្នេហា អ្នកណាចង គឺអ្នកនោះត្រូវតែស្រាយ ។ ចំណែកសាធារណជនគ្រាន់តែចង់ដឹងខ្លះៗអំពីមូលហេតុនៃការបែកបាក់គ្នាប៉ុណ្ណោះ ព្រោះគូស្នេហ៍វ័យក្មេងមួយគូនេះស្ថិតក្នុងជួរអ្នកសិល្បៈ៕
ចែករំលែកព័តមាននេះ