ខេត្តពោធិ៍សាត់ ៖ គូស្នេហ៍វ័យក្មេងសញ្ជាតិខុសគ្នាដែលទើបស្រឡាញ់គ្នាបានមួយខែ ក៏ឈានទៅនែបនិត្យយ៉ាងផ្អែមល្ហែមចាប់មិនឈ្នះដែរ ប៉ុន្តែគេថា សប្បាយប៉ុនណាទុក្ខក៏ប៉ុននោះដែរ។ ម្តាយខាងស្រីដោយសារតែកំហឹងសុំលុយមួយលានរៀលដើម្បីរៀបចំសែនផ្ដាច់ខ្មោចមិនបាន ក៏ប្ដឹងសមត្ថកិច្ចឲ្យចាប់ខ្លួនតួប្រុសតែម្ដង ដោយអះអាងថា កូនស្រីរបស់គាត់ ទើបតែមានអាយុ១៣ឆ្នាំប៉ុណ្ណោះ។ ពេលឃើញតួប្រុសត្រូវប៉ូលិសចាប់ខ្លួន ស្ថិតនៅក្នុងទ្រុងសារិកាកែវ តួស្រីបានរត់ទៅតាមខ្លាចក្រែងគេធ្វើបាបប្រុសស្នេហ៍បណ្ដូលចិត្ត ហើយប្រាប់សមត្ថកិច្ចថា ពួកគេទាំងពីរនាក់ស្រឡាញ់គ្នាដោយស្មោះស្ម័គ្រ ពុំមានអ្នកណាបង្ខំអ្នកណាទេ ហើយនាងក៏មានអាយុ១៩ឆ្នាំហើយដែរ មិនមែន១៣ឆ្នាំដូចម៉ែថា នោះទេ។
លោកអនុសេនីយ៍ទោហង្ស ប៊ុនធឿន នាយប៉ុស្តិ៍នគរបាលកំពង់លួងឲ្យដឹងថា ករណីនេះបានកើតឡើងកាលពីថ្ងៃទី៧ តុលា ឆ្នាំ២០១១ វេលាម៉ោង៨និង៣០នាទីយប់ នៅភូមិទី៥ ឃុំកំពង់លួង ស្រុកក្រគរ។ តួស្រីអាយុ១៩ឆ្នាំ ជាជនជាតិខ្មែរ ឯតួប្រុសដែលក្លាយជាអ្នកទោសស្នេហានោះឈ្មោះង្វៀង យ៉ាំងបួយ អាយុ២០ឆ្នាំ ជាជនជាតិវៀតណាម នៅភូមិទី៥ ឃុំកំពង់លួង ជាមួយគ្នា។ យុវជនរូបនេះត្រូវបានឃាត់ខ្លួនតាមពាក្យបណ្ដឹងរបស់ម្ដាយខាងស្រីដែលចោទប្រកាន់ថា កាលពីយប់ថ្ងៃទី៧ តុលា ឆ្នាំ២០១១ ឈ្មោះង្វៀង យ៉ាំងបួយ បានលួងលោមចាប់កូនស្រីគាត់ដែលទើបមានអាយុ១៣ឆ្នាំ ទៅរំលោភនៅផ្ទះលើទឹករបស់គេមួយយប់បានសម្រេចចំនួន២លើក។
នៅចំពោះមុខសមត្ថកិច្ច គូស្នេហ៍ថ្មីថ្មោងនេះបានសារភាពថា ពួកគេស្រឡាញ់គ្នារយៈពេលមួយខែមកហើយ ព្រមទាំងបានរួមរ័កជាមួយគ្នាចំនួន៤ទៅ៥លើកឯណោះ មិនមែនទើបតែលើកទី១ទេ។ រាល់ការរួមរ័កសុទ្ធតែព្រមព្រៀងគ្នា ពុំមានអ្នកណាចាប់បង្ខំអ្នកណាទេ ហើយខ្លួននាងខាងស្រីកើតនៅឆ្នាំ១៩៩២ មកដល់ពេលនេះមានអាយុ១៩ឆ្នាំហើយមិនមែន១៣ឆ្នាំដូចម៉ែអះអាងទេ។ ម្ដាយខាងស្រីបានទារលុយពីខាងប្រុសចំនួនមួយលានរៀល ដើម្បីរៀបចំសែនផ្ដាច់ខ្មោចយកគ្នាជាប្ដីប្រពន្ធ ប៉ុន្តែដោយសារពុំទាន់មានលុយគ្រប់ប្រគល់ជូន ទើបគាត់ប្ដឹងសមត្ថកិច្ចតែម្ដង។
លោកវរសេនីយ៍ត្រី ហៀង ស៊ីថា នាយការិយាល័យនគរបាលប្រឆាំងការជួញដូរមនុស្ស និងការពារអនីតិជននៃស្នងការដ្ឋានខេត្តមានប្រសាសន៍ថា ទោះបីសាមីខ្លួនទាំងពីរសារភាពថា ពួកគេស្រឡាញ់គ្នាស្មោះស្ម័គ្រគ្មានអ្នកណាបង្ខំអ្នកណា ហើយអះអាងថា កើតនៅឆ្នាំ១៩៩២ មានអាយុ១៩ឆ្នាំក៏ដោយ ប៉ុន្តែផ្អែកតាមសៀវភៅអត្រានុកូលដ្ឋាន និងសំបុត្រកំណើតជាភស្តុតាង គឺនាងទើបមានអាយុតែ១៣ឆ្នាំប៉ុណ្ណោះ ព្រោះកើតនៅឆ្នាំ១៩៩៨។ ដូច្នេះខាងស្រីស្ថិតនៅជាអនីតិជន ដែលតាមច្បាប់ត្រូវតែមានទោសដាច់ខាតពីបទលួងលោមរួមភេទជាមួយក្មេងស្រីអាយុក្រោម១៥ឆ្នាំ។ លោកឲ្យដឹងថា តួប្រុសត្រូវបានបញ្ជូនទៅតុលាការនារសៀលថ្ងៃទី៩ តុលា ឆ្នាំ២០១១ ឯតួស្រីក៏ទៅតាមដែរដែលមិនដឹងថា ជាចុងក្រោយតុលាការសម្រេចយ៉ាងណានោះទេ៕
ចែករំលែកព័តមាននេះ