ខេត្តរតនគិរី ៖ បុរសម្នាក់ដែលចាប់រំលោភក្មេងស្រីជាក្មួយប្អូនថ្លៃស្រី នៅស្រុកលំផាត់ កាលពីថ្ងៃទី២៧ កញ្ញា ឆ្នាំ២០១១ បានត្រូវកម្លាំងប៉ូលិសព្រហ្មទណ្ឌកម្រិតធ្ងន់ សហការជាមួយកម្លាំងអធិការដ្ឋានស្រុកលំផាត់ ចាប់ខ្លួនបាននាល្ងាចថ្ងៃទី៣ តុលា នៅចំណុចផ្ទះជួលមួយនាវេលាម៉ោង៤និង៣០នាទីរសៀល ក្នុងភូមិ៣ សង្កាត់ឡាបានសៀក ក្រុងបានលុង និងកសាងសំណុំរឿងបញ្ជូនទៅសាលាដំបូងខេត្ត។
លោកសំ វណ្ណៈ នាយរងការិយាល័យប៉ូលិសព្រហ្មទណ្ឌកម្រិតធ្ងន់ខេត្ត បានឱ្យដឹងថា ក្មេងស្រីរងគ្រោះមានអាយុ១៦ឆ្នាំ ជាក្មេងកំព្រាឪពុកម្តាយ ស្នាក់នៅជាមួយម្តាយមីងក្នុងឃុំប៉ាតាង ស្រុកលំផាត់។ ឯជនសង្ស័យឈ្មោះហួត ឆាយ អាយុ៤៦ឆ្នាំ មុខរបរធ្វើចម្ការ មានស្រុកកំណើតនៅភូមិកុមាររាជ ឃុំបឹងណាយ ស្រុកព្រៃឈរ ខេត្តកំពង់ចាម តែបានមកស្នាក់នៅជាមួយប្អូន នៅផ្ទះកើតហេតុខាងលើ។ លោកនាយរងការិយាល័យព្រហ្មទណ្ឌកម្រិតធ្ងន់រូបនេះបានបន្តទៀតថា ករណីរំលោភសេពសន្ថវៈកើតឡើងនៅយប់ថ្ងៃទី២៧ កញ្ញា តែរហូតដល់ថ្ងៃទី៣០ កញ្ញា ទើបជនរងគ្រោះ និងម្តាយមីងមកប្តឹងប៉ូលិស ហើយប៉ូលិសអធិការដ្ឋានស្រុកលំផាត់ បញ្ជូនសំណុំរឿង និងជនរងគ្រោះមកកាន់ការិយាល័យព្រហ្មទណ្ឌកម្រិតធ្ងន់ ដើម្បីចាត់ការតាមនីតិវិធីច្បាប់ ព្រោះជនសង្ស័យបានគេចខ្លួនពីស្រុកលំផាត់មកស្នាក់នៅផ្ទះជួលមួយកន្លែងស្ថិតក្នុងភូមិ៣ សង្កាត់ឡាបានសៀក ក្រុងបានលុង ក្រោយពេលធ្វើសកម្មភាពរំលោភរួច។
តាមការរៀបរាប់របស់ក្មេងស្រីរងគ្រោះបានឱ្យដឹងថា នាយប់ថ្ងៃទី២៧ កញ្ញា នាងនៅចាំផ្ទះឱ្យម្តាយមីងជាមួយនឹងជនសង្ស័យ លុះម៉ោងប្រហែល៨យប់ជនសង្ស័យបានគំរាមសម្លាប់ ហើយចាប់នាងរំលោភរហូតបានសម្រេច ព្រោះនៅយប់នោះម្តាយមីង និងប្តីរបស់គាត់ដែលត្រូវជាប្អូនបង្កើតរបស់ជនសង្ស័យឈ្មោះហួត ឆាយនេះ បានទៅដេកចាំចម្ការចម្ងាយប្រហែល៥០០ម៉ែត្រពីផ្ទះ។ លុះស្អែកឡើង នាងបាននិយាយរឿងរ៉ាវប្រាប់ម្តាយមីងអំពីសកម្មភាពចាប់រំលោភរបស់ជនសង្ស័យ ប៉ុន្តែម្តាយមីងមិនជឿទេ ហើយក៏ទុកឱ្យនាងដេកនៅចាំផ្ទះមួយយប់ទៀតគឺយប់ថ្ងៃទី២៨ កញ្ញា រួចជនសង្ស័យនោះបានធ្វើសកម្មភាពរំលោភម្តងទៀត នៅម៉ោងប្រហែល៧និង៣០នាទីយប់។ នៅយប់ថ្ងៃទី២៩ កញ្ញា នាងបានរត់ទៅដេកនៅផ្ទះចាំចម្ការជាមួយម្តាយមីង រួចរៀបរាប់អំពីសកម្មភាពនោះប្រាប់ម្តាយមីងជាថ្មី ប៉ុន្តែម្តាយមីងនៅតែមិនជឿ ប៉ុន្តែដោយសារមានឈាមហូរខ្លាំងមិនឈប់ ទើបរឿងនេះបែកការណ៍ឡើង ប្តឹងប៉ូលិសឱ្យជួយរកយុត្តិធម៌៕
ចែករំលែកព័តមាននេះ