ខេត្តកំពង់ចាម ៖ បុរសចំនួន៤នាក់ បានព្យាយាមជិះម៉ូតូឌុបចំនួន៣គ្រឿង បម្រុងនឹងឡើងជិះរថយន្តទៅធ្វើជាអ្នកនេសាទអូសបង្គានៅប្រទេសថៃ តែត្រូវបានសមត្ថកិច្ចឃាត់ខ្លួននៅនឹងចំណុចមុខអធិការដ្ឋាននគរបាលស្រុកក្រូចឆ្មារ កាលពីវេលាម៉ោង៩ព្រឹកថ្ងៃទី៣ តុលា ២០១១ ហើយបានបញ្ជូនមកសួរនាំរួមជាមួយនឹងអ្នករត់ម៉ូតូឌុប៣នាក់ទៀតផងដែរ។ នៅក្នុងការឃាត់ខ្លួនពួកគេទាំង៤នាក់នោះ គឺយោងទៅតាមបណ្តឹងរបស់ឪពុកម្តាយអ្នករងគ្រោះ។
តាមការឱ្យដឹងពីលោកវរសេនីយ៍ត្រីឡាយ ងួន អធិការនគរបាលស្រុកក្រូចឆ្មារ ប្រាប់ឱ្យដឹងថា ក្នុងពេលដែលសមត្ថកិច្ចចេញប្រតិបត្តិការនេះបានឃាត់បុរសចំនួន៤នាក់ ក្នុងនោះរួមមាន ១-ឈ្មោះស្មាន កើត អាយុ៣៣ឆ្នាំ រស់នៅភូមិទ្រាទី២ ឃុំទ្រា ស្រុកក្រូចឆ្មារ ២-ឈ្មោះម៉ាន ស្លេះ ហៅម៉ាត់ សុះ អាយុ២៤ឆ្នាំ រស់នៅភូមិទ្រាទី៣ ឃុំទ្រា ៣-ឈ្មោះម៉ាន ស្លេះ អាយុ២០ឆ្នាំ រស់នៅភូមិទ្រាទី២ ឃុំទ្រា និង៤-ឈ្មោះសុះ អឹមរ៉ន អាយុ៣៣ឆ្នាំ រស់នៅភូមិទ្រាទី៣ ឃុំទ្រា រួមទាំងអ្នករត់ម៉ូតូឌុបចំនួន៣នាក់ទៀត ហើយបានដកហូតម៉ូតូបានចំនួន៣គ្រឿងផងដែរ។
លោកវរសេនីយ៍ត្រីឡាយ ងួន បានប្រាប់បន្តថា មុននឹងឈានដល់ការឃាត់ជនសង្ស័យទាំង៤នាក់ខាងលើនេះ គឺដោយសារតែបានទទួលពាក្យបណ្តឹងពីឪពុករបស់អ្នករងគ្រោះ ទី១ និងទី៣ ភ្លាមៗនោះ លោកក៏បានធ្វើការឃាត់ខ្លួនពួកគេទាំងនោះ នៅពេលដែលកំពុងជិះម៉ូតូឌុបចេញពីភូមិទី៥ ឃុំស្វាយឃ្លាំង ស្រុកក្រូចឆ្មារ ហើយថែមទាំងមិនឱ្យឪពុកម្តាយបានដឹង ដោយមានមេខ្យល់ជាអ្នកនាំចូលទៅប្រទេសថៃមិនស្របច្បាប់ថែមទៀតផង ៕
ចែករំលែកព័តមាននេះ