រាជធានីភ្នំពេញ ៖ ហ៊ុល ដារ៉ា មកពីក្លឹប សាលវ័ន្តកីឡា បានសន្លប់ក្រោមកណ្តាប់ដៃ ធា រិទ្ធី មកពីក្លឹបអេភូថងកីឡានៅត្រឹមទឹកទី២ ក្នុងការប្រកួតដណ្តើមខ្សែក្រវាត់ភេសជ្ជៈខារ៉ាបាវប្រភេទទម្ងន់៥៤គីឡូក្រាម នៅលើសង្វៀន CTN កាលពីរសៀលថ្ងៃសុក្រ ទី១៩ សីហា កន្លងមក ឯអ៊ឹង បូរ៉ា មកពីក្លឹបសិង្ហកីឡាបានធ្វើឱ្យរាជសីហ៍ បាបា មកពីក្លឹបសម្រែករាជសីហ៍
រាជធានីភ្នំពេញ ៖ ហ៊ុល ដារ៉ា មកពីក្លឹប សាលវ័ន្តកីឡា បានសន្លប់ក្រោមកណ្តាប់ដៃ ធា រិទ្ធី មកពីក្លឹបអេភូថងកីឡានៅត្រឹមទឹកទី២ ក្នុងការប្រកួតដណ្តើមខ្សែក្រវាត់ភេសជ្ជៈខារ៉ាបាវប្រភេទទម្ងន់៥៤គីឡូក្រាម នៅលើសង្វៀន CTN កាលពីរសៀលថ្ងៃសុក្រ ទី១៩ សីហា កន្លងមក ឯអ៊ឹង បូរ៉ា មកពីក្លឹបសិង្ហកីឡាបានធ្វើឱ្យរាជសីហ៍ បាបា មកពីក្លឹបសម្រែករាជសីហ៍ បង្ក្រាបគ្រឿងញៀនសន្លប់នៅត្រឹមទឹកទី២ដូចគ្នា ។ ហ៊ុល ដារ៉ា ត្រូវធា រិទ្ធី ទាត់១កែងចំកញ្ចឹង.កនៅក្នុងទឹកទី២យ៉ាងធ្ងន់ដួលក្រោកលែងរួចតែម្តង ។ នៅក្នុងពូល A ហ៊ុល ដារ៉ា ប្រកួតបាន៣លើកឈ្នះ១ ចាញ់២ មាន៥ពិន្ទុ ចំណែកធា រិទ្ធីវិញ ប្រកួតបាន២លើក ឈ្នះ១ ចាញ់១ មាន៤ ពិន្ទុ ។
អ៊ឹង បូរ៉ា ក្លាយជាអ្នកដែលមានពិន្ទុនាំមុខគេនៅក្នុងពូល ដោយការប្រកួតទាំង៣លើក កន្លងមកនេះ អត់ដែលចាញ់ មាន៩ពិន្ទុ ហើយគេនៅសល់១ប្រកួតទៀត ឯសម្រាប់ការប្រកួតលើកក្រោយនេះបើទោះបីជាចាញ់ ឬឈ្នះក៏គេមិន ខ្វល់ដែរ ។ ចំណែកគូប្រកួតមិត្តភាព ម៉ន វីរៈ មកពីក្លឹបព្រែកឯងកីឡា ប្រកួតឈ្នះពិន្ទុពេជ្រ សាម៉ុន មកពីក្លឹបវីអាយភី ចំការមន ។ រីឯការប្រកួតរវាងសេរី រតនា និងវង្ស គង់រាជ មកពីក្លឹបបុរីនាគរាជ ដោយសារតែមានបញ្ហាបន្តិចបន្តួចនៅពេលប្រកួត អាជ្ញាកណ្តាលក៏សម្រេចផ្អាកការប្រកួតសិន ដោយលើកពេលទៅលើកក្រោយវិញ ។
ចំពោះលទ្ធផលនៃការប្រកួតដណ្តើមខ្សែក្រវាត់ស្រាហ្គោលរីជេន វគ្គជម្រុះនៅលើសង្វៀនស្ថានីយទូរទស្សន៍ប៉ុសិ៍្តលេខ៣ ក្នុងប្រភេទទម្ងន់៦៥គីឡូក្រាម កាលពីថ្ងៃសៅរ៍ ទី២០ សីហា SHEY MON ជនជាតិប្រេស៊ីល មានឱកាសបានឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រជាបន្តទៀត បន្ទាប់ពីបានយកឈ្នះហេង សំរាំង មកពីក្លឹបព្រៃទទឹងដោយពិន្ទុ ។ SHEY MON ដែលធ្លាប់មានប្រវត្តិខ្លាំងនៅកម្ពុជាពីមុនមកនោះលើកនេះ គេបានបន្តប្រើស្នៀតកណ្តាប់ដៃវាយយកឈ្នះហេង សំរាំង យ៉ាងងាយបំផុត ចាប់តាំងពីទឹកទី១ មកម្ល៉េះ ។ សំរាំង បង្កើនការវាយលុកទៅលើ SHEY MON បានតែ២ទឹកប៉ុណ្ណោះ គឺនៅទឹកទី៤ និងទី៥ ប៉ុន្តែសម្រាប់២ទឹកចុងក្រោយដែលសំរាំងមានប្រៀបលើ SHEY MON ក៏មិនអាចសង្គ្រោះការបរាជ័យរបស់គេបានឡើយ ។
ពេជ្រ សីហា មកពីក្លឹបប្រដាល់ក្រសួងការពារជាតិ និងឡុង សុភី មកពីក្លឹបសាលវ័ន្តកីឡា មានឱកាសបានឡើងទៅធ្វើការប្រកួតនៅវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រជាបន្តទៀត បន្ទាប់ពីយកឈ្នះគូប្រកួតរៀងៗខ្លួន ។ សីហា បានប្រើស្នៀតជើងទាត់យ៉ាងពេញទំហឹងចំកំភួនដៃខាងឆ្វេងរបស់កីឡាករ ANVA ជនជាតិអ៊ូស បេគីឱ្យមានរបួសយ៉ាងធ្ងន់រហូតដល់ថ្នាក់ប្រកួតលែងកើត ។ ចំណែកឡុង សុភី យកឈ្នះ ABASS AMADI ជនជាតិអ៊ីរ៉ង់ដោយពិន្ទុ ។ ពេជ្រ សីហា នឹងត្រូវឡើងទៅជួបកីឡាករ LEOARDO Monteiro Silva ប្រេស៊ីល រីឯឡុង សុភី ត្រូវជួប SHEY MON។
ចំណែកប្រកួតមិត្តភាពវិញ មៀច សុខរ៉ា មកពីក្លឹបតាព្រហ្មមានជ័យ យកឈ្នះសិង្ហ សាវ៉ន មកពីក្លឹបសិង្ហកីឡាដោយពិន្ទុ ។ ឯការប្រកួតសាកលអាជីពដណ្តើមខ្សែក្រវាត់ក្នុងប្រភេទទម្ងន់៦៥គីឡូក្រាម ផល សុផាត មកពីក្លឹបកងរាជអាវុធហត្ថរាជធានីភ្នំពេញ បានយកឈ្នះភុំ សារ៉ាយ មកពីក្លឹបអាជ្ញាធរជាតិអាវុធគីមីដោយពិន្ទុធ្វើឱ្យភុំ សារ៉ាយ ត្រូវហាលខោនៅត្រឹមវគ្គនេះបាត់បង់ឱកាសក្នុងការឡើងទៅប្រកួតនៅវគ្គពាក់កណ្តាលផ្តាច់ព្រ័ត្រជាបន្តទៀតទាល់តែបាន ។
សេក គឹមផាន មកពីក្លឹបសឹករងខេត្តសៀមរាប យកឈ្នះពិន្ទុ សូយ ភិរម្យ មកពីក្លឹបអូដឹមកីឡាទាំងវេទនាក្នុងការប្រកួតនៅលើសង្វៀនស្ថានីយទូរទស្សន៍បាយ័ននាថ្ងៃសៅរ៍ ទី២០ សីហា នោះដែរ ។ គូនេះ មានផ្លែកែង និងជង្គង់ល្អដូចគ្នា ហើយចាប់ពីទឹកទី១ ដល់ទឹកទី៣ ទាំងសងខាងបានបង្ហាញសមត្ថភាពរៀងៗខ្លួនវាយសម្រុកមិនដកថយ ។ ភិរម្យ ចាញ់កម្លាំងគឹម ផាន បន្តិចនៅទឹកទី៤ និងទី៥ ប៉ុន្តែគឹមផាន ក៏ត្រូវភិរម្យ ទាត់សន្ធាប់មិនប្រណីនៅចុងទឹកទី៥ តែទីបំផុតនៅតែមិនអាចទៅរួច ។
កន ចន្ថា មកពីក្លឹបអាជ្ញាធរជាតិអាវុធគីមី យកឈ្នះម៉ាប់ ឆៃយ៉ា មកពីក្លឹបបក្សីស្លាបដែក ដោយពិន្ទុទាំងរងការរិះគន់ពីអ្នកទស្សនា ។ ចន្ថា ត្រូវបានគេមើលឃើញថា មានចេតនាមិនល្អក្នុងទឹកទី៣ ដោយសារតែការវាយចេញមិនអស់ពីសមត្ថភាព ប៉ុន្តែក្រោយពីការព្រមានរបស់អាជ្ញាកណ្តាលរួចមក ធ្វើឱ្យស្ថានភាពប្រកួតបានល្អ ប្រសើរដូចធម្មតាឡើងវិញ ។ ឆៃយ៉ា ព្យាយាមស្តារស្ថានភាពមិនល្អនៅទឹកទី៤ និងទី៥ តែទី បំផុតនៅតែមិនអាចគេចផុតពីការបរាជ័យបានឡើយ ។ សួង សុវណ្ណថា មកពីក្លឹបកីឡាប្រដាល់ក្រសួងការពារជាតិ ប្រកួតចាញ់ពិន្ទុ ផាន់ គ្រាន់មកពីក្លឹបគជសារកីឡា ។ នឿន សាវឌី មកពីក្លឹប អេភូថង ឈ្នះពិន្ទុយ៉ាម ផានិត មកពីក្លឹបរស្មីកុមារកំព្រា ៕
ចែករំលែកព័តមាននេះ