សម្តេចតេជោ អបអរសាទរ និងកោតសរសើរ ជូរី ល្អហួស ក្រោយឈ្នះវគ្គ People’s Choice Award
- ភ្នំពេញ
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភា បានចូលរួមអបអរសាទរ និងលើកសរសើរទៅកាន់យុវតី ជូរី ល្អហួស ដែលបានឈ្នះនៅក្នុងវគ្គអ្នកពេញចិត្តបោះឆ្នោត ( People’s Choice Award) នៃការប្រកួតបវរកញ្ញាកម្មវិធី Miss Teen Icon International 2026 ដែលរៀបចំធ្វើឡើងនៅប្រទេសឥណ្ឌូនេស៊ី។
តាមរយះសំណេរបង្ហោះលើបណ្តាញសង្គម សម្តេចតេជោ ប្រធានព្រឹទ្ធសភា បានលើកឡើងថា អបអរសាទរនិងកោតសរសើរចៅស្រីល្អហួស ដែលបានខិតខំរហូតសម្រេចបានអ្នកពេញចិត្តបោះឆ្នោតឲ្យជាង៤៥លាននាក់ ដោយឈរលេខ១ ក្នុងចំណោម៥នាក់មកពី៥ប្រទេស។
ជូនពរចៅស្រីបន្តនាំមុខរហូតដល់ចប់ការប្រកួត។
សម្តេចបញ្ជាក់ថា ប្រជាជនកម្ពុជាជាង១៨លាននាក់ គាំទ្រដល់ការខិតខំរបស់ចៅ។
ក្រោយឃើញសម្តេចតេជោ បង្ហោះសំណេរអបអរខាងលើនេះ យុវតី ជូរី ល្អហួស បានសម្តែងនូវក្តីរំភើបយ៉ាងខ្លាំង តាមរយៈការបង្ហោះសំណេររបស់នាងនៅលើបណ្តាញសង្គមថា ចៅរំភើបឡើងស្រក់ទឹកភ្នែក Samdech Hun Sen of Cambodia ។
ចៅស្រីសូមគោរពថ្លែងអំណរគុណយ៉ាងជ្រាលជ្រៅបំផុតចំពោះសម្តេចតេជោ ហ៊ុន សែន ដែលបានផ្តល់ការកោតសរសើរ និងការលើកទឹកចិត្តដ៏មានតម្លៃចំពោះនាងខ្ញុំជូរី ល្អហួស។
ប្រសាសន៍ដ៏ថ្លៃថ្លារបស់សម្តេច មិនត្រឹមតែជាកម្លាំងចិត្តប៉ុណ្ណោះទេ ប៉ុន្តែជាកិត្តិយសដ៏ធំធេង និងជាកម្លាំងជំរុញឱ្យនាងខ្ញុំកាន់តែមានឆន្ទៈក្នុងការលើកស្ទួយកិត្តិយសជាតិលើឆាកអន្តរជាតិ។
នាងខ្ញុំសូមគោរពជូនពរសម្តេច មានសុខភាពល្អបរិបូរណ៍ អាយុយឺនយូរ និងជួបប្រទះតែសេចក្តីសុខចម្រើនជានិច្ច។
ចៅសូមសន្យាថានឹងយកភាពជោគជ័យជូនជាតិមាតុភូមិរបស់យើងវិញឲ្យទាល់តែបាន។
ជាការកត់សម្គាល់ទន្ទឹមគ្នានេះ មហាជនកម្ពុជាច្រើនក៏បានចូលរួមអបអរសាទរទៅកាន់ ជូរី ល្អហួស ផងដែរ ខណៈពេលគេរំពឹងថា យុវតីតំណាងកម្ពុជារូបនេះនឹងឈានទៅគ្រងម្កុដនៅក្នុងកម្មវិធីមួយនេះផងដែរ។
ជាការកត់សម្គាល់ ក្រៅពីសម្តេចតេជោដែលបានលើកសសើរពីការខិតខំរបស់ ជូរី ល្អហួស នៅក្នុងការប្រកួត ជាពិសេសការបង្ហាញឈុតតំណាងជាតិ នៅមានមហាជន និងអ្នកសិល្បៈជាច្រើនក៏បានលើកសសើរ និងសម្តែងការស្ងប់ស្ងែងទៅកាន់យុវតីរូបនេះផងដែរ ។
ជាមួយនឹងការលើកសសើរនេះ មហាជន អ្នកសិល្បៈ ជាពិសេសបណ្តាម្ចាស់ប្រ៊េនល្បីៗក៏បានពួតដៃគ្នាចំណាយថវិកាផ្ទាល់ខ្លួន ដើម្បីបោះឆ្នោតគាំទ្រទៅកាន់ ល្អ ហួស ផងដែរ រហូតធ្វើអោយនាងទទួលបានជ័យជំន: នៅក្នុងវគ្គនេះ ។
គួរបញ្ជាក់ថា ក្នុងវគ្គបង្ហាញឈុតតំណាងជាតិដែលបានធ្វើឡើងនៅថ្ងៃទី១១ ខែវិច្ឆិកា ឆ្នាំ២០២៦ ជូរី ល្អ ហួស បានបញ្ចេញឈុត នារីកសិករនៃដែនដីមាស និងអប្សរាមហានគរ ក្នុងពេលតែមួយ ដែលនោះបានធ្វើឲ្យមហាជនមានការភ្ញាក់ផ្អើល និងស្ញប់ស្ញែងយ៉ាងខ្លាំងទៅលើយុវតីកម្ពុជារូបនេះ ។
មហាជនជាច្រើនបានកោតសសើរទៅដល់ ល្អ ហួស ដោយសារតែក្នុងវគ្គបង្ហាញឈុតតំណាងជាតិនោះនាងបានប្រើឈុតពីរផ្សេងគ្នាក្នុងពេលតែមួយ ហើយរូបនាងអាចធ្វើទៅបានក្នុងរយៈពេលខ្លីប៉ុណ្ណោះ ហើយថែមទាំងធ្វើបានយ៉ាងល្អថែមទៀតផង ។
ទោះបីជាយ៉ាងណា មហាជនកម្ពុជារំពឹងថា តាមរយៈការបង្ហាញខ្លួនបានយ៉ាងល្អពីមួយវគ្គទៅមួយវគ្គប្រកបដោយភាពលេចធ្លោ និងទាក់ទាញរបស់ ជូរី ល្អហួស នោះនាងនឹងអាចគ្រងម្កុដនៅក្នុងកម្មវិធីប្រកួតបវរកញ្ញាអន្តរជាតិមួយនេះនៅក្នុងវគ្គផ្តាច់ព្រ័ត្រ ដែលប្រព្រឹត្តទៅនៅថ្ងៃទី១៣ ខែវិច្ឆិកា នេះ ៕
ចែករំលែកព័តមាននេះ