ព្រះកាយ ច័ន្ទ បារម្ភពីការធ្លាក់ចុះសីលធម៌សង្គម និងជំរុញឱ្យរួមគ្នាអប់រំគុណធម៌
- ភ្នំពេញ
រាជធានីភ្នំពេញ ៖ តារាសម្តែង ព្រះកាយ ច័ន្ទ បានសម្តែងក្តីព្រួយបារម្ភចំពោះការធ្លាក់ចុះនៃសីលធម៌ក្នុងសង្គមនាពេលបច្ចុប្បន្ន ខណៈពេលដែលនាងបានស្នើឲ្យទាំងអស់គ្នាគួរមានការចាប់អារម្មណ៍ និងចូលរួមកែលម្អ នៅមុនពេលដែលវាក្លាយទៅជាបញ្ហាកាន់តែធំនៅក្នុងសង្គមរបស់យើង ។
តារាស្រីរូបនេះបញ្ជាក់ថា តម្លៃនៃសុជីវធម៌ ការគោរពគ្នា ការយោគយល់ និងការទទួលខុសត្រូវ ហាក់ដូចជាកំពុងបាត់បង់បន្តិចម្ដងៗ ដែលទាមទាឲ្យយើងទាំងអស់គ្នាយកចិត្តទុកដាក់ និងចូលរួមកែលម្អឲ្យបានច្រើនជាងមុន ។
ព្រះកាយ ច័ន្ទ បានលើកឡើងតាមរយៈសំណេរបង្ហោះលើបណ្តាញសង្គមថា ខ្ញុំពិតជាមានការព្រួយបារម្ភចំពោះការធ្លាក់ចុះនៃសីលធម៌ក្នុងសង្គមមនុស្សបច្ចុប្បន្ន តម្លៃនៃសុជីវធម៌ ការគោរពគ្នា ការយោគយល់ និងការទទួលខុសត្រូវ ហាក់ដូចជាកំពុងបាត់បង់បន្តិចម្ដងៗ នេះជារឿងដែលយើងគ្រប់គ្នាគួរតែចាប់អារម្មណ៍ និងចូលរួមកែលម្អ មុនពេលវាក្លាយជាបញ្ហាកាន់តែធំក្នុងសង្គម ។
សង្ឃឹមថាបងប្អូនយើងនឹងចាប់ផ្ដើមយកចិត្តទុកដាក់លើការអប់រំសីលធម៌ និងគុណធម៌ ឱ្យបានច្រើនជាងមុន ព្រោះសង្គមមួយដែលល្អ មិនមែនកើតចេញពីមនុស្សដែលមានចំណេះដឹងតែមួយមុខនោះទេ តែត្រូវការមនុស្សដែលមានសីលធម៌ មនសិការ និងចេះគោរពតម្លៃរបស់គ្នាទៅវិញទៅមកផងដែរ។
ជាការកត់សម្គាល កន្លងមកតារាសម្តែង ព្រះកាយ ច័ន្ទ ក្នុងនាមជាគ្រូបង្រៀនរបាំបុរាណ ធ្លាប់បានលើកឡើង និងសង្កត់ធ្ងន់ជាញឹកញាប់អំពីតម្លៃនៃសីលធម៌សង្គម និងការអភិរក្សវប្បធម៌ខ្មែរ ជាពិសេសគឺការជ្រើសរើសអ្នកសិល្បៈដែលចេញពីសាលាត្រឹមត្រូវ ជំនួសឱ្យការប្រើប្រាស់ប្រជាប្រិយភាពតាមបណ្តាញសង្គមដែលកើតចេញពីការបង្កើតរឿងអាស្រូវ ជេរប្រមាថ ឬវីដេអូបំពុលសង្គម ។
តារាសម្តែងរូបនេះបញ្ជាក់ថា ចំពោះនាង សម្រាប់ព្រះកាយច័ន្ទ ក្លឹប នាងមិនត្រឹមតែបង្រៀនជំនាញសិល្បៈ និងក្បាច់របាំប៉ុណ្ណោះទេ ប៉ុន្តែថែមទាំងផ្សារភ្ជាប់ការអប់រំសីលធម៌ គុណធម៌ និងការចេះគោរពប្រពៃណីដល់សិស្សានុសិស្សផងដែរ។
ដោយឡែកពាក់ព័ន្ធបញ្ហាខាងលើនេះដែរ កន្លងមកក្រសួងវប្បធម៌ និងវិចិត្រសិល្បៈ ក៏ធ្លាប់បានចេញការណែនាំឱ្យបញ្ឈប់ជាបន្ទាន់ ក៏ដូចជាទប់ស្កាត់ចំពោះការផលិតវីដេអូបែបកម្សាន្តគ្រប់ទម្រង់ដែលប៉ះពាល់ដល់វប្បធម៌ ប្រពៃណីជាតិ ព្រមទាំងតម្លៃស្ត្រីខ្មែរ និងកុមារ ។
ការណែនាំរបស់ក្រសួងវប្បធម៌បានធ្វើឡើង បន្ទាប់ពីមានអ្នកផលិតវីដេអូ អ្នកបង្កើតមាតិកាកម្សាន្ត និងអ្នកសម្តែងតាមបណ្តាញទំនាក់ទំនងសង្គមមួយចំនួន បានផលិតវីដេអូខ្លីៗដែលមានរូបភាព និងខ្លឹមសារប្រាសចាកពីក្រមសីលធម៌ ដែលបង្កឱ្យប៉ះពាល់យ៉ាងធ្ងន់ធ្ងរដល់វប្បធម៌ ទំនៀមទម្លាប់ប្រពៃណីជាតិ ពិសេសតម្លៃស្ត្រីខ្មែរ និងកុមារ។
ក្រសួងក៏បានព្រមានដែរថា បើបុគ្គលឬក្រុមណាមួយនៅតែបន្តប្រព្រឹត្តសកម្មភាពអវិជ្ជមានទាំងអស់នេះ ក្រសួងនឹងសហការជាមួយស្ថាប័នពាក់ព័ន្ធ ដើម្បីចាត់វិធានការម៉ឺងម៉ាត់ ស្របតាមបទបញ្ញត្តិច្បាប់ដែលមានជាធរមាន៕





ចែករំលែកព័តមាននេះ