ផ្ទុះការកោតសរសើរពេញហ្វេសប៊ុក ! វីដេអូប៉ូលិសចរាចរណ៍ជិះម៉ូតូបើកផ្លូវ ក្រោយម្ចាស់រថយន្តស្នើសុំព្រោះប្រពន្ធឈឺពោះឆ្លងទន្លេ
- ភ្នំពេញ
ផ្ទុះការកោតសរសើរចំពោះទឹកចិត្តមន្ត្រីនគរបាលចរចរណ៍ដែលជិះម៉ូតូសារ៉ែនបើកផ្លូវជូនរថយន្តមួយគ្រឿង ខណៈស្ថានភាពចរាចរណ៍កំពុងស្ទះណែនតាន់តាប់ ចាប់ពីចោមចៅរហូតដល់មន្ទីរកាល់ម៉ែត និងសម្រាលដោយសុវត្ថិភាព ។
«បង! ជួយសម្រួលខ្ញុំមួយ ប្រពន្ធខ្ញុំឈឺកើតកូន» ជាពាក្យមួយឃ្លាដែលបុរសម្នាក់ក្នុងនាមជាប្តី ដាច់ចិត្តនិយាយស្នើសុំដោយចៃដន្យទៅកាន់មន្ត្រីនគរបាលចរាចរណ៍មួយរូប ដែលកំពុងតែបើកម៉ូតូសារ៉ែនមួយគ្រឿង នៅលើដងផ្លូវក្បែរឡានរបស់ខ្លួន ។
ភ្លាមៗត្រឹមពេលតែប៉ុន្មានវិនាទី ក្រោយបានយល់ពីស្ថានភាពអាសន្នដែលត្រូវប្រណាំងប្រជែងនឹងពេលវេលា ខណៈចរាចរណ៍ស្ទះណែនតាន់តាប់ស្រាប់នោះ មន្ត្រីនគរបាលចរាចរណ៍រូបនេះ មិនបង្អែបង្អង់យូរឡើយ ហើយបានចាប់ផ្តើមសកម្មភាពផ្តល់ជំនួយតាមការស្នើសុំភ្លាមៗ រហូតក្លាយជាវីរៈបុរសសម្រាប់ក្រុមគ្រួសារដ៏តូចមួយ ដែលអាចឱ្យស្ត្រីនៅក្នុងរថយន្តបានទៅដល់មន្ទីរពេទ្យទាន់ពេល និងឆ្លងទន្លេដោយសុវត្ថិភាពទាំងម្តាយទាំងកូន ។
រឿងរ៉ាវជាកាដូដើមខែថ្មី នាំមហាជនផ្ទុះការកោតសរសើរ និងរំភើបចិត្តដោយក្តីមោទនភាពចំពោះមន្ត្រីនគរបាលចរាចរណ៍ខាងលើនេះ ត្រូវបានបង្ហោះដោយសាមីខ្លួនផ្ទាល់តាមរយៈគណនីហ្វេសបុក Jx Tsuki គឺប្អូនប្រុស រុន សុវណ្ណវុត្ថា កាលពីថ្ងៃទី០១ ខែកញ្ញា ឆ្នាំ២០២៦ ។ ប្អូនប្រុស រុន សុវណ្ណវុត្ថា បានរៀបរាប់ទាំងស្រុងយ៉ាងដូច្នេះថា « ស្រលាញ់ គោរព នគរបាលល្អបែបនេះណាស់ ។ ព្រឹកមិញនេះ ប្រពន្ធខ្ញុំឈឺពោះសម្រាលកូន ត្រូវធ្វើដំណើរពីចោមចៅ ទៅកាន់មន្ទីរកាល់ម៉ែត ។ ដូចដឹងចឹង ផ្លូវសហពន្ធ័រុហ្សីនៅពេលព្រឹក គឺស្ទះខ្លាំងណាស់ លុះមកដល់មុខព្រលានយន្តហោះចាស់ បានឃើញបងនគរបាលដែលកំពុងធ្វើដំណើរតាមផ្លូវផងនោះក៏ខ្ញុំដាច់ចិត្តសុំជំនួយពីគាត់អោយជួយសម្រួលចរាចរណ៍ ព្រោះស្ថានភាពប្រពន្ធគាត់ឈឺខ្លាំង ។
បងនគរបាលគាត់ពិតជាមាន ស្មារតីខ្ពស់ ក្នុងការជួយដោះស្រាយណាស់ គួរអោយគោរពខ្លាំងណាស់ និងមានភាពកក់ក្តៅ រំភើបក្នុងនាមជាប្រជាពលរដ្ឋម្នាក់ គ្រួសាររបស់ខ្ញុំបានសម្រាលកូនជោគជ័យ និងមានសុខភាពល្អទាំងម្តាយ និងកូន ហើយតាំងនាមតំណាងគ្រួសារ ខ្ញុំសូមលើកដៃគោរពដល់ការលះបង់ទាំងកម្លាំងកាយ ចិត្ត ពេលវេលា របស់បងនគរបាល 1A-1514 ។»
ទោះមិនបានស្គាល់ឈ្មោះបង តែខ្ញុំនឹងចង់ចាំនូវគំរូវីរៈភាពរបស់បង និងសូមជូនពរបងអោយបានជោគជ័យលើការងារ ឡើងបុណ្យសក្តិ សុខភាពល្អ សំណាងល្អ ។!» ក្រៅពីសារថ្លែងអំណរគុណរួមទាំងវីដេអូ និងរូបភាពដែលផ្ទុះការចែករំលែកខាងលើនេះ ឈានមកដល់ថ្ងៃទី០២ ខែកញ្ញា ប្អូនប្រុស រុន សុវណ្ណវុត្ថា បានបង្ហោះរូបភាពកូន និងប្រពន្ធម្តងទៀតជាមួយសារយ៉ាងដូច្នេះថា « អូនៗជេដេន (Jaden) សូមអរគុណដល់លោកប៉ា អ្នកម៉ាក់ អ៊ុំៗ ពូមីង បងប្អូន ទាំងអស់គ្នាដែលបានជូនពរ ផ្តាំសួរសុខទុក្ខ ជាពិសេសអរគុណពូប៊ូលិសដែលបានជួយអូនអោយបានសុវត្ថិភាព អ្នកគ្រូពេទ្យប្រាប់ថា អូនសុខភាពល្អណាស់ ហើយបានជួបមនុស្សល្អទៀត ។ A Hero who was appeared in my born day»៕
ចែករំលែកព័តមាននេះ