តារាចម្រៀង ខាន់ ជេម ទម្លាយមូលហេតុ ធ្លាប់ហាមឃាត់ភរិយាមិនឱ្យលក់នំបញ្ចុក
- ភ្នំពេញ
រាជធានីភ្នំពេញ៖ តារាចម្រៀងលោក ខាន់ ជេម បានទម្លាយរឿងដែលលាក់ទុកជាច្រើន ឆ្នាំ គឺលោកធ្លាប់ហាមឃាត់ភរិយាមិនឱ្យលក់នំបញ្ចុកទេ ។ តើហេតុអ្វីបានជាលោកហាមលក់?
កាលពីពេល ថ្មីៗកន្លងមកតារាចម្រៀងលោក ខាន់ ជេម ឱ្យដឹងថា «១៥ឆ្នាំដែលខ្ញុំធ្លាប់ហាមប្រពន្ធមិនឱ្យបើកហាងនំបញ្ចុក ព្រោះខ្ញុំគិតច្រើនពីភាពជាតារារបស់ខ្ញុំ តែចុងក្រោយទើបដឹងថា អ្នកដែលរារាំងក្តីស្រមៃគាត់ គឺខ្ញុំ ហើយយើងក៏ខាតពេលអស់១៥ឆ្នាំ» ។
ដោយឡែកបើយោងតាមការអះអាងពីភរិយារបស់លោកខាន់ ជេម តាមរយៈវីដេអូបង្ហោះលើបណ្តាញសង្គមឱ្យដឹងថា មុខរបរលក់ «នំបញ្ចុកទឹកម្ហិច» នេះ អ្នកនាងបានសុំលោក ខាន់ ជេម ជាច្រើនឆ្នាំ ប៉ុន្តែលោកមិនឱ្យលក់ ដោយសារពេលនោះនាងក៏ជាប់ដៃមើលថែកូន ។
លុះក្រោយមកអ្នកនាងសាកល្បងលក់នំបញ្ចុកនេះតាមអនឡាញ។ លក់រយៈពេល១ខែគឺការមានការគាំទ្រខ្លាំង ទើបអ្នកនាងសម្រេចចិត្តរកទីតាំង ដើម្បីបើកហាងសម្រាប់លក់រហូតមកដល់សព្វថ្ងៃ មានរយៈពេល៦ឆ្នាំហើយ ។
កន្លងមកលោកខាន់ ជេម ហាក់មិនសូវបានបង្ហាញមុខ និងកូនជាសាធារណៈទេ ក្នុងពេលលោកកំពុងល្បីឈ្មោះក្នុងវិស័យសិល្បៈចម្រៀង ។ លោកទើបតែបង្ហាញមុខភរិយា និងកូនជាសាធារណៈក្នុងអំឡុងពេលប៉ុន្មានឆ្នាំចុងក្រោយនេះ ។
ក្រោយបើកបង្ហាញគ្រួសារនោះមក លោក ខាន់ ជេម ក្រៅពីបង្ហាញសកម្មភាពការងារសិល្បៈ ក៏តែងតែជួយផ្សព្វផ្សាយពីមុខរបរលក់នំបញ្ចុកទឹករបស់ភរិយាតាមបណ្តាញសង្គមផងដែរ ៕
ចែករំលែកព័តមាននេះ