ក្រុមគ្រួសារនាយ តាក់ ស៊ី ចេញមុខបដិសេធការចោទប្រកាន់ពីមហាជននូវរឿងមួយ ខណៈស្ថានភាពជំងឺទឹកនោមផ្អែមឈានដល់ការកា.ត់ជើងម្ខាង
- ភ្នំពេញ
រាជធានីភ្នំពេញ ៖ រហូតមកទល់នាពេលនេះ ស្ថានភាពជំងឺទឹកនោមផ្អែមរបស់តារាសម្តែងនាយ តាក់ស៊ី កាន់តែធ្ងន់ធ្ងរខ្លាំង ដោយលោកត្រូវកាត់ជើងម្ខាងបន្ថែមទៀត ទៅលើការកាត់ម្រាមដៃ ម្រាមជើង ដោយសារតែមេរោគនៃជំងឺមួយនេះ បានរាលដាលកាន់តែខ្លាំង ។
ទន្ទឹមនឹងភាពញាំញឺដោយសារជំងឺនាពេលនេះ នាយ តាក់ ស៊ី បែរជាត្រូវមហាជនមួយចំនួនបានធ្វើការចោទប្រកាន់មកលើរូបលោកថា ជាការសម្តែង ដើម្បីចង់បានជំនួយពីសប្បុរសជននានាទៅវិញ ។
យ៉ាងណា ជុំវិញការចោទប្រកាន់ខាងលើ ក្រុមគ្រួសារនាយ តាក់ ស៊ី បានចេញមុខមកបដិសេធ និងស្នើសុំឲ្យមហាជនមួយចំនួនដែលចូលខមមិននៅពីក្រោមរូបភាពដែលតារាកំប្លែងរូបនេះបង្ហោះតាមបណ្តាញសង្គម បង្ហាញពីស្ថានភាពជំងឺនាពេលបច្ចុប្បន្ន ឲ្យប្រើប្រាស់ភាសាសមរម្យ ដ្បិតលោកកំពុងធ្លាក់ខ្លួនឈឺជាទម្ងន់ពិតប្រាកដមែន ។
តាមរយៈវីដេអូដែលបានបង្ហោះលើបណ្តាញសង្គម តារាកំប្លែងនាយ តាក់ ស៊ី ត្រូវបានក្រុមគ្រូពេទ្យកាត់ជើងម្ចាងទៀតហើយ បន្ទាប់ពីលោកទើបតែវះសាច់កំភួនជើងកាលពីពេលថ្មីៗនេះ ដោយសារជំងឺទឹកនោមមានការរីករាលដាល ។
យ៉ាងណា ក្រោយការវះកាត់ជើងម្ខាងហើយនោះ នាយ តាក់ស៊ី ក៏បានចេញពីបន្ទប់សង្គ្រោះបន្ទាន់ មកសម្រាកព្យាបាលនៅក្នុងបន្ទប់អ្នកជំងឺធម្មតាវិញហើយ ហើយក៏ផ្តល់ឱកាសឲ្យក្រុមគ្រួសារ សាច់ញាតិ និងមិត្តភក្តិទាំងក្នុងក្រៅសិល្បៈ អាចចូលសួរសុខទុក្ខលោកបានជាធម្មតា ។
តារាកំប្លែងនាយ តាក់ ស៊ី បានលើកឡើងថា អំឡុងពេលនេះ លោកបានចេញពីបន្ទប់ ICU ហើយ ដោយនៅសម្រាកបន្ទប់ធម្មតា បន្ទាប់ពីលោកបានចូលបន្ទប់សង្គ្រោះបន្ទាន់ ដោយធ្វើការវះកាត់សាច់ និងជើងដោយសារមេរោគជំងឺទឹកនោមផ្អែម ។
លោកបញ្ជាក់ថា ស្ថានភាពនាពេលនេះ គឺអាចឲ្យក្រុមគ្រួសារ និងសាច់ញាតិ ជាពិសេសក្រុមការងាររបស់លោកអាចមកសួរសុខទុក្ខលោកបាន ដោយនៅពេលនេះលោកកំពុងសម្រាកព្យាបាលនៅក្នុងមន្ទីរពេទ្យលោកសង្ឃជាន់ទី៦ ។
ដោយឡែក ទន្ទឹមគ្នានេះដែរ ភរិយារបស់នាយ តាក់ ស៊ី ក៏ឆ្លៀតឱកាសឆ្លើយតបទៅកាន់មហាជនមួយចំនួនដែលបានចោទប្រកាន់មកលើស្វាមីថា ជាការសម្តែងពាក់ព័ន្ធនឹងស្ថានភាពជំងឺរបស់ស្វាមីរបស់អ្នកនាងនាពេលនេះ ។
ភរិយានាយ តាក់ ស៊ី បានបញ្ជាក់ថា ស្ថានភាពជំងឺរបស់ស្វាមីអ្នកនាងនាពេលនេះ មិនមែនជាការសម្តែងនោះឡើយ ដោយពេលនេះ ស្វាមីអ្នកនាងបានកាត់ជើងមួយចំហៀងបន្ថែមទៀត បន្ទាប់ពីកាត់ម្រាមជើង ម្រាមដៃ សរុបដៃទាំងសងខាងនៅសល់តែម្រាម៥ប៉ុណ្ណោះ ៕
ចែករំលែកព័តមាននេះ