តារាចម្រៀង អ៊ីវ៉ា បង្ហាញមុខគូស្នេហ៍ និងបង្ហើបគម្រោងរៀបការ
- ភ្នំពេញ
រាជធានីភ្នំពេញ ៖ តារាចម្រៀងនាង អ៊ីវ៉ា និងគូស្នេហ៍ បានបង្ហើបគម្រោងប្រាប់មហាជនថា អ្នកទាំងពីរនឹងចូលរោងការនៅឆ្នាំក្រោយនេះ បន្ទាប់ពីអ្នកទាំងពីរបានស្វែងយល់ចិត្តគ្នាអស់រយះពេលប៉ុន្មានឆ្នាំចុងក្រោយនេះ ខណះពេលដែលស្នេហារបស់ពួកនាងក៏មានការវិវឌ្ឍន៍ទៅមុខយ៉ាងល្អផងដែរ ។
ការបង្ហើបគម្រោងរៀបការពីសំណាក់តារាចម្រៀងរូបនេះ និងគូស្នេហ៍ធ្វើឡើង ក្រោយពីអ្នកទាំងពីរ បានបណ្តើរគ្នាយ៉ាងបើកចំហរ ក្នុងការចូលរួមពិធីមង្គលការមិត្តភក្តិកាលពីពេលថ្មីៗនេះ ។
អ៊ីវ៉ា បានបញ្ជាក់តាមរយះសំណេរបង្ហោះលើបណ្តាញសង្គមថា ថ្ងៃនេះការគេ ថ្ងៃក្រោយការខ្ញុំវិញហើយសន្យាឆ្នាំក្រោយ ក្នុងពេលដែលគូស្នេហ៍របស់នាងក៏បានបញ្ចេញសំណេរដូចគ្នានេះផងដែរ ។
យ៉ាងណាទោះជាដំណឹងនេះជាការពិតឬមិនពិត គេឃើញទស្សនិកជន ជាពិសេសបណ្តាអ្នកគាំទ្រ អ៊ីវ៉ា ជាច្រើនបានចូលទៅធ្វើការខំមិន ដោយម្នាក់ៗបានចូលរួមអបអរ និងគាំទ្រប្រសិនបើការអះអាងខាងលើរបស់តារារូបស្រីនេះក្លាយជាការពិតមែន ។
ជាការកត់សម្គាល់ មួយរយះចុងក្រោយនេះ តារាចម្រៀងនាង អ៊ីវ៉ា បានចាប់ផ្តើមបណ្តើរគ្នាយ៉ាងត្រសងជាមួយគូស្នេហ៍យ៉ាងបើកចំហរ ដោយមិនមានការលាក់លៀមដូចពីពេលកន្លងទៅនោះឡើយ ក្នុងពេលដែលគូស្នេហ៍របស់នាងក៏ចង់បង្ហាញពីទំនាក់ទំនងស្នេហារបស់ពួកគេជាសាធារណៈដូចគ្នា ។
គូស្នេហ៍របស់តារាស្រីរូបនេះត្រូវបានគេស្គាល់ថា ជាបុរសវ័យក្មេងរូបសង្ហាមួយរូប ដែលមានមុខជំនួញផ្ទាល់ខ្លួន និងក៏ជាម្ចាស់ក្លឹបបាល់ទាត់ដ៏ល្បីឈ្មោះមួយប្រចាំខេត្តសៀមរាបផងដែរ ខណះពេលដែលអ្នកទាំងពីរបានភ្ជាប់ចំណងស្នេហ៍ជាមួយគ្នាអស់ជាច្រើនមកហើយដែរ ។
យ៉ាងណាបើទោះបីជាភ្ជាប់ទំនាក់ទំនងស្នេហ៍ជាមួយគ្នាអស់ជាច្រើនឆ្នាំ និងក្រោមការដឹងលឺពីចាស់ទុំទាំងសងខាងក៏ដោយ ប៉ុន្តែគេនៅមិនទាន់លឺថា តារាស្រីរូបនេះបញ្ជាក់ពីដំណឹងច្បាស់លាស់នៃការចូលរោងការនៅពេលណានៅឡើយទេ ក្នុងពេលដែលការកំណត់ពេលចូលរោងការនៅឆ្នាំក្រោយរបស់តារាចម្រៀងនាង អ៊ីវ៉ា នាពេលនេះក៏អាចនិយាយបានថា ទំនងជាមិនអាចច្បាស់លាស់១០០%នៅឡើយដែរ ។
ទោះជាយ៉ាងណា កន្លងមក តារាចម្រៀងនាង អ៊ីវ៉ា ធ្លាប់បានអះអាងប្រាប់អ្នកសារព័ត៌មានក្នុងស្រុកថា នាងនឹងមានគម្រោងគ្រងឈុតកូនក្រមុំដូចមិត្តរួមអាជីពដែរពេលនាងមានអាយុ៣០ ឆ្នាំ ដែលនោះហើយគឺជាពេលវេលាដែលសមស្របឲ្យនាងអាចរៀបការមានស្វាមី ៕
ចែករំលែកព័តមាននេះ