ខឹងជេរប្រមា.ថរឿងខ្ចីម៉ូតូ ដា.ល់៣ដៃ សងវិញ៤ពូថៅ ម្នាក់ដេកពេទ្យ ម្នាក់ទៀតជាប់ខ្នោះ
- កំពង់ស្ពឺ
ខេត្តកំពង់ស្ពឺ៖ បុរសម្នាក់ត្រូវបានកម្លាំងនគរបាលស្រុកសាមគ្គីមុនីជ័យធ្វើការឃាត់ខ្លួនភ្លាមៗ ខណៈបុរសជាជនរងគ្រោះ បានខ្ចីម៉ូតូគេជិះ(ជនសង្ស័យដៃដល់) ជេរប្រមាថហើយថែមទាំងវាយម្ចាស់ម៉ូតូចំនួន៣ដៃទៀត ធ្វើឱ្យជនសង្ស័យដៃដល់ជាម្ចាស់ម៉ូតូទ្រាំលែងបានស្ទុះទៅទាញពូថៅកាប់សន្ធប់ចំនួន៤ពូថៅ បណ្តាលធ្លាយខួររងរបួសធ្ងន់ធ្ងរ សល់តែដង្ហើមចង្រិត ជនរងគ្រោះដេកពេទ្យ ជនដៃដល់ត្រូវបានសមត្ថកិច្ចឃាត់ខ្លួន។
ករណីហិង្សាដោយចេតនាវាយ៣ដៃទៅ កាប់ចំនួន៤ពូថៅ ខឹងរឿងខ្ចីម៉ូតូជិះបានភ្ញាក់ផ្អើលឡើងកាលពីវេលាម៉ោង៧និង៣០នាទីយប់ថ្ងៃទី២៤ ខែកក្កដា ឆ្នាំ២០២៦ នៅចំណុចភូមិក្រាំងតាសោម ឃុំជំពូព្រឹក្ស ស្រុកសាមគ្គីមុនីជ័យ ខេត្តកំពង់ស្ពឺ ។
នគរបាលស្រុកសាមគ្គីមុនីជ័យបាននិយាយឲ្យដឹងថា មានករណីហិង្សាដោយចេតនាមួយកើតឡើង ដែលបង្កឡើងដោយជនសង្ស័យម្នាក់ មានឈ្មោះ ផេង ដាលីន ភេទប្រុស អាយុ៣០ឆ្នាំ រស់នៅក្នុងភូមិអូរក្រពើ ឃុំបឹងល្វា ស្រុកសន្ទុក ខេត្តកំពង់ធំ បច្ចុប្បន្នធ្វើការងារជាងផ្សារដែកនៅចំណុចភូមិក្រាំងតាសោម ឃុំជំពូព្រឹក ស្រុកសាមគ្គីមុនីជ័យ ខេត្តកំពង់ស្ពឺ។
បានធ្វើសកម្មភាពយកពូថៅកាប់ទៅលើជនរងគ្រោះដែលជាអ្នកធ្វើការងារជាងផ្សារដែកជាមួយគ្នា ចំនួន៤ពូថៅ បណ្ដាលឲ្យរងរបួសធ្ងន់ ត្រូវស្លឹកត្រជៀកខាងឆ្វេង១កន្លែង ត្រូវចំក្បាលពីក្រោយ១កន្លែង ត្រូវចំកញ្ចឹងក១កន្លែង និងត្រូវចំស្មារខាងឆ្វេងចំនួន១កន្លែងថែមទៀតផង។
ចំណែកជនរគ្រោះមានឈ្មោះ កែន គន្ធា ភេទប្រុស អាយុ៤៤ឆ្នាំ ទីកន្លែងកំណើតរស់នៅក្នុងភូមិមហារាជ្យ ឃុំបឹងត្រាញ់ខាងត្បូង ស្រុកសំរោង ខេត្តតាកែវ បច្ចុប្បន្នមកធ្វើការងារជាងផ្សារដែកនៅចំណុចភូមិក្រាំងតាសោម ឃុំជំពូព្រឹក្ស ស្រុកសាមគ្គីមុនីជ័យ ខេត្តកំពង់ស្ពឺ ។
នគរបាលស្រុកសាមគ្គីមុនីជ័យបានបន្តឲ្យដឹងថា នៅមុនពេលកើតហេតុជនរងគ្រោះបានខ្ចីម៉ូតូដើម្បីជិះ ហើយជនរងគ្រោះបានជេរប្រមាថនូវពាក្យអសុរោះទៅលើជនដៃដល់ហើយថែមទាំងវាយទៅលើជនដៃដល់ជាម្ចាស់ម៉ូតូចំនួន៣ដៃថែមទៀតផង។ ដោយទ្រាំនូវទង្វើរបស់ជនរងគ្រោះលែងបានជនសង្ស័យដៃដល់ជាម្ចាស់ម៉ូតូបានស្ទុះទៅទាញពូថៅកាប់សន្ធាប់ទៅលើជនរងគ្រោះ បណ្ដាលឱ្យរងរបួសបង្កឲ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ច។
នគរបាលស្រុកសាមគ្គីមុនីជ័យបានបន្តឲ្យដឹងទៀតថា÷ ក្រោយកើតហេតុសមត្ថកិច្ចបានចុះទៅដល់ទីតាំងកន្លែងកើតហេតុនិងបានធ្វើការឃាត់ខ្លួនជនសង្ស័យខាងលើយកមកសាកសួរ ដោយរូបគេបានឆ្លើយសារភាពថារូបគេពិតជាបានធ្វើសកម្មភាពយកពូថៅកាប់ទៅលើជនរងគ្រោះពិតប្រាកដមែន។មូលហេតុដោយសារតែជនរងគ្រោះបានខ្ចីម៉ូតូរបស់ខ្លួនរួចហើយនិយាយមើលងាយជេរដៀលប្រមាថ នូវពាក្យអសុរោះ និងវាយមកលើរូបខ្លួនចំនួន០៣ដៃ ទើបរូបគេខឹងក៏បានស្ទុះទៅយកពូថៅកាប់ទៅលើជនរងគ្រោះចំនួន៤ពូថៅវិញទៅ ។
ជនរងគ្រោះបានរងរបួសធ្ងន់ធ្ងរត្រូវបានដឹកបញ្ចូនយកទៅសង្គ្រោះព្យាបាលនៅមន្ទីរពេទ្យបង្អែកខេត្តកំពង់ស្ពឺ ។ ក្រោយកើតហេតុនគរបាលបានធ្វើការដកហូតវត្ថុតាង ពូថៅចំនួន១ដើម ទូរស័ព្ទដៃ១គ្រឿង ម៉ាកOPPO ពណ៌ខៀវផងដែរ។
នគរបាលស្រុកសាមគ្គីមុនីជ័យបានបញ្ជាក់ឲ្យដឹងថា ក្រោយឃាត់ខ្លួនជនសង្ស័យដៃដល់រួមជាមួយនឹងវត្ថុតាងនគរបាលបានកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្តតាមផ្លូវច្បាប់៕
ចែករំលែកព័តមាននេះ