ខេត្តក្រចេះ ៖ ទំនាស់រឿងផឹកស៊ីស្រវឹងចាក់ចម្រៀងខារ៉ាអូខេថ្លង់រំខានដំណេកពេលយប់ដំណាក់រាំង ស្រុកឧដុង្គ ធ្វើឱ្យគ្រួសារកសិករមួយបានរងគ្រោះបាត់បង់ទ្រព្យសម្បត្តិ លុយកាក់មួយ ចំនួនធំ និងសល់តែសំបកផ្ទះ ។
មន្ត្រីកងរាជអាវុធហត្ថស្រុកឧដុង្គ បានរៀបរាប់ឱ្យដឹងថា នៅវេលាម៉ោង១១និង១៥នាទីយប់ ថ្ងៃទី៧ សីហា មានក្រុមចោរពុំស្គាល់មុខចំនួន៥នាក់ ប្រដាប់ដោយអាវុធអាកាកាត់ស្នូកមួយដើម ស្លៀកពាក់ខោអាវស៊ីវិល បានធ្វើសកម្មភាពប្លន់ផ្ទះរបស់ឈ្មោះអោ លីវ និងប្រពន្ធឈ្មោះតាំង ឡាយ អាយុ៤៧ឆ្នាំ ។ នាយប់នោះក្រោយពេលរាំងភ្លៀងពុំទាន់ដាច់គ្រាប់ផង ស្រាប់តែមានជន៥នាក់បានឡើងលើផ្ទះធាក់ទ្វារខាងមុខចូលក្នុងផ្ទះ ហើយវាយប្តីឈ្មោះអោ លីវ មួយដំបងឫស្សី រួចឱ្យដេកផ្កាប់មុខជាមួយកូនប្រុសច្បង ដោយយកភួយស្តើងទៅចងដៃ ហើយភ្ជង់គំរាមប្រពន្ធឈ្មោះតាំង ឡាយ ឱ្យប្រគល់មាសប្រាក់ឱ្យខ្លួនទាំងអស់ ពុំដូចនោះទេ នឹងសម្លាប់ទាំងប្តីប្រពន្ធ និងកូនមួយសំបុកគ្មានសល់ទេ ។ ក្រុមចោរប្រមូលយកមាសប្រាក់អស់ ពុំទាន់ចេញពីក្នុងផ្ទះភ្លាមៗទេ ដោយសារមានស្នូរជួងស្នូរគោះត្រដោកផ្អើលឆោឡោពេញទាំងភូមិប្រមូលគ្នាជួយជនរងគ្រោះ ។
ទោះបីជាបែបណា ក្រុមចោរបានបាញ់គំរាមចំនួន៣គ្រាប់ ហើយក៏ចាកចេញទៅបាត់ស្រមោលដែរ។ ម្ចាស់ផ្ទះរងគ្រោះបានរាយការណ៍ថា ក្នុងហេតុការណ៍នេះ ចោរប្លន់ប្រមូលអស់ខ្សែ.កប្លាទីន១ខ្សែ ទម្ងន់២ជីកន្លះ ខ្សែ.កមាស១ខ្សែទម្ងន់៥ជី ចិញ្ចៀនត្រាមួយវង់ទម្ងន់១តម្លឹង លុយចំនួន៥០០ដុល្លារ និង៣លានរៀល ទូរស័ព្ទចំនួន២គ្រឿង។ ម្ចាស់ផ្ទះបាននិយាយប្រាប់សមត្ថកិច្ចថា ពេលនេះលុយកាក់ និងមាសប្រាក់ទាំងប៉ុន្មានដែលគាត់ខំសន្សំទុកចែកកូនចៅបានអស់រលីងហើយ ប៉ុន្តែបានគង់វង្សជីវិតពុំមានអ្នកណាម្នាក់រងរបួសធ្ងន់ធ្ងររហូតដល់ចូលមន្ទីរពេទ្យទេ ។
នៅកន្លែងកើតហេតុសមត្ថកិច្ចកងរាជអាវុធហត្ថខេត្ត និងនគរបាល រកឃើញសំបកគ្រាប់ធុនអាកា៤៧ចំនួន៣ បន្សល់ទុកនៅក្នុងបរិវេណផ្ទះជនរងគ្រោះ ។ ក្រោយពីកើតហេតុ សមត្ថកិច្ចក៏បានចុះធ្វើការពួនស្ទាក់ទាំងយប់ផងដែរ ប៉ុន្តែពុំឃើញស្រមោលចោរទាំងនោះទេ ៕
ចែករំលែកព័តមាននេះ