ថៃ៖ គ្រោះថ្នាក់ចរាចរណ៍ដ៏រន្ធត់មួយបានកើតឡើងទាំងកណ្តាលថ្ងៃត្រង់នៅប្រទេសថៃ ក្រោយរថយន្ត Pickup មួយគ្រឿងរេចង្កូតជ្រុលទៅបុកក្រុមព្រះសង្ឃកំពុងនិមន្តធុដុង្គនៅខេត្តមុកដាហាន បណ្តាលឱ្យព្រះសង្ឃសុគត៨អង្គ និង១៣អង្គទៀតរងរបួសធ្ងន់ខណៈមន្ទីរពេទ្យអំពាវនាវឱ្យប្រជាពលរដ្ឋបរិច្ចាគឈាមជាបន្ទាន់ ។
បណ្តាសារព័ត៌មានថៃបានរាយការណ៍ថា ហេតុការណ៍ដ៏រន្ធត់នេះ បានកើតឡើងនៅវេលាម៉ោងប្រមាណ១១ និង៣០នាទីព្រឹកថ្ងៃទី២ ខែកក្កដា ឆ្នាំ២០២៦ លើផ្លូវក្នុងភូមិឡាវលំ ឃុំណាស៊ីនឿន ស្រុកមឿង ខេត្តមុកដាហាន ។
ក្បួននិមន្តធុដុង្គនេះមាន ព្រះសង្ឃសរុប៣៤អង្គ និងពុទ្ធបរិស័ទ៥នាក់ ដែលបានចេញដំណើរពីខេត្តមុកដាហាន ឆ្ពោះទៅកាន់ខេត្តអ៊ូប៊ុន រ៉ាតឆាថានី (Ubon Ratchathani) ដែលជាខេត្តជាប់ព្រំដែនកម្ពុជា ហើយគោលដៅរបស់ព្រះសង្ឃទាំងនេះ អាចឆ្ពោះមកកាន់ តំបន់ភ្នំ៣៥០ ដែលស្ថិតក្នុងតំបន់អានសេះទឹកដីកម្ពុជា ដែលយោធាថៃទើបតែដណ្តើមកាន់កាប់ ព្រោះនៅលើភ្នំ៣៥០នេះ មានព្រះសង្ឃថៃជាច្រើនអង្គបានចូលរួមយ៉ាងសកម្មក្នុងការសាងសង់ហេដ្ឋារចនាសម្ពន្ធ័នានា ដូចជាតម្លើងជញ្ជាំងបេតុង ចាក់ផ្លូវបេតុង សាងសង់រូបចម្លាក់ជាច្រើន ទាំងរូបទាហាន រូបអតីតស្តេច និងព្រះពុទ្ធរូបជាដើម ហើយថែមទាំងប្រារព្ធពិធីសាសនាផ្សេងៗជាដើម។
ប្រភពព័ត៌មានបានឱ្យដឹងថា រថយន្តភីកអាប់មួយគ្រឿងដែលកំពុងបើកបរក្នុងល្បឿនលឿន បានរេចង្កូតជ្រុលទៅបុកក្រុមព្រះសង្ឃដែលកំពុងនិមន្តនៅតាមចិញ្ចើមផ្លូវ ធ្វើឱ្យព្រះសង្ឃ និងពុទ្ធបរិស័ទរត់គេចស្ទើរមិនទាន់ ខណៈអ្នកខ្លះត្រូវរថយន្តបុកខ្ទាតហោះប៉ើងទៅឆ្ងាយ ហើយដេកដួលស្លាប់របួសរាយប៉ាយទាំងលើដងផ្លូវ និងចិញ្ចើមផ្លូវ ។
ភ្លាមៗក្រោយកើតហេតុ សមាគមសង្គ្រោះរួមចិត្តខេត្តមុកដាហាន រួមជាមួយក្រុមសង្គ្រោះពីបណ្តាអង្គភាពផ្សេងៗ បានចល័តកម្លាំងជាច្រើនចុះជួយអន្តរាគមន៍ ធ្វើការសង្គ្រោះបឋម និងដឹកអ្នករងរបួសទៅកាន់មន្ទីរពេទ្យប្រចាំខេត្តមុកដាហាន។
របាយការណ៍ប៉ូលិសបញ្ជាក់ថា ព្រះសង្ឃ ៥អង្គសុគតនៅកន្លែងកើតហេតុ ខណៈ ៣អង្គទៀតបានសុគតនៅមន្ទីរពេទ្យ បន្ទាប់ពីក្រុមគ្រូពេទ្យព្យាយាមសង្គ្រោះអស់ពីសមត្ថភាព។ ចំណែកព្រះសង្ឃ ១៣អង្គផ្សេងទៀត កំពុងស្ថិតក្នុងដំណាក់កាលសង្គ្រោះបន្ទាន់ ។ ដោយសារអ្នករងរបួសមានច្រើន មន្ទីរពេទ្យខេត្តមុកដាហានក៏បានអំពាវនាវឱ្យប្រជាពលរដ្ឋចូលរួម បរិច្ចាគឈាមជាបន្ទាន់។
ជាបឋម សមត្ថកិច្ចថៃបានឃាត់ខ្លួនអ្នកបើកបររថយន្តរួចហើយ។ យោងតាមការស៊ើបអង្កេតបឋម ជនបង្កគឺជាកុមារអាយុ ១១ឆ្នាំម្នាក់ ដែលមានជាកុមារពិសេស (អូទីហ្សឹម)។ សមត្ថកិច្ចបានរកឃើញថា កុមាររូបនេះបាន លួចយករថយន្ត Pickup ម៉ាក Isuzu របស់ឳពុកម្តាយមកបើកបរពីស្រុកដនតាន់ ឆ្ពោះទៅស្រុកមឿង មុននឹងរេចង្កូតបង្កគ្រោះថ្នាក់ដ៏រន្ធត់នេះ។ ទោះជាយ៉ាងណា មូលហេតុពិតប្រាកដដែលបណ្តាលឱ្យរថយន្តបាត់បង់ការគ្រប់គ្រងនៅមិនទាន់ត្រូវបានបញ្ជាក់នៅឡើយ ខណៈប៉ូលិសខេត្តមុកដាហានកំពុងបន្តស៊ើបអង្កេត ដើម្បីចាត់វិធានការតាមផ្លូវច្បាប់ ៕
ចែករំលែកព័តមាននេះ