បន្ទាយមានជ័យ ៖ កំពុងតែផ្ទុះការភ្ញាក់ផ្អើល និងចែករំលែកតៗគ្នាយ៉ាងព្រោងព្រាតពេញបណ្តាញសង្គម នូវរូបភាពជាច្រើនសន្លឹកនៃផ្ទះបណ្តោះអាសន្នរបស់ជនភៀសសឹកមួយខ្នង ដែលត្រូវបានរៀបចំឡើងយ៉ាងមានសណ្តាប់ធ្នាប់ និងពោរពេញទៅដោយរុក្ខជាតិបៃតង ស្រស់បំព្រង ។
រូបភាពទាំងនេះ ត្រូវបានបង្ហោះដោយគណនីហ្វេសប៊ុកឈ្មោះ Bong Mony កាលពីថ្ងៃទី០៥ ខែមិថុនា ឆ្នាំ២០២៦ កន្លងទៅនេះ ។ ម្ចាស់គណនីខាងលើបានរៀបរាប់ទាំងក្តីរំភើបថា ៖ «ផ្ទះឪពុកម្ដាយខ្ញុំ ដែលស្រស់ស្អាតបែបធម្មជាតិ ហើយក៏ជាផ្ទះគំរូរបស់ផ្ទះជនភៀសសឹក៣,០០០ ខ្នងផងដែរ (ផ្ទះលេខ៣០៧ ផ្លូវលេខ៥) ។ ជួយស៊ែរម្នាក់មួយៗផងពុកម៉ែបងប្អូនទាំងអស់គ្នា ដើម្បីឱ្យជាប់ចំណាត់ថ្នាក់ផ្ទះដែលស្អាតបែបធម្មជាតិ គេនឹងមានរង្វាន់ជូនដល់ពួកគាត់» ។
ភ្លាមៗក្រោយការបង្ហោះ អត្ថបទ និងរូបភាពទាំងនេះ បានទាក់ទាញការចាប់អារម្មណ៍យ៉ាងខ្លាំងពីអ្នកលេងបណ្តាញសង្គម ដោយមានការចូលមកបញ្ចេញមតិ គាំទ្រ និងលើកទឹកចិត្តរាប់រយ ។ គណនីមួយចំនួនបានលើកឡើងថា ការនាំគ្នាដាំផ្កា ដំណាំ និងចិញ្ចឹមសត្វបែបនេះ គឺជារឿងល្អបំផុតក្នុងការជួយកាត់បន្ថយជំងឺបាក់ទឹកចិត្ត និងការនឹកស្រុក ព្រមទាំងជួយកាត់បន្ថយ ការចំណាយបានមួយកម្រិតធំផងដែរ ។
មហាជនបានពោលសរសើរថា ៖ «មនុស្សមានគំនិត ទៅដល់ណាក៏មិនខ្វះហូបដែរ… មិនយកពេលវេលាដែលបាក់ទឹកចិត្តទៅបោះចោលឥតប្រយោជន៍» និង«ពូជល្អ ដាំលើថ្មក៏ដុះដែរ» ។ មតិភាគច្រើនបានលាន់មាត់សរសើរចំពោះភាពហ្មត់ចត់ និងការចេះរៀបចំទុកដាក់ ៖ «មិនថា រស់នៅទីណាទេ បើយើងចេះរៀបចំឱ្យមានសណ្តាប់ធ្នាប់ មានអនាម័យ វានឹងជាទីដែលយើងចង់រស់នៅ ហើយជាសេចក្តីសុខរបស់យើង» និងខ្លះទៀតពោលថា «ទោះមាន ឬក្រ មើលទៅគួរឱ្យចង់រស់នៅណាស់» ។
ទោះបីជាត្រូវចាកចេញពីដីធ្លីចាស់ តែមហាជនបានជំរុញទឹកចិត្តឱ្យពលរដ្ឋទាំងអស់ស៊ូពុះពារ ៖ «ចាប់ផ្តើមស្រស់ស្រាយម្តងបន្តិចៗហើយបង» «ខែវស្សានេះ បងប្អូនរួមគ្នាដាំដំណាំ ទេសភាពនឹងប្រែស្រស់បំព្រងលើទឹកដីថ្មីនៃក្តីសង្ឃឹម ស៊ូទាំងអស់គ្នា» ។
ទន្ទឹមនឹងការសរសើរ ក៏មានបងប្អូនខ្លះបង្ហាញការព្រួយបារម្ភពីស្ថានភាពរស់នៅជាក់ស្តែង ដោយបានសាកសួរពីប្រព័ន្ធទឹក-ភ្លើង និងបារម្ភខ្លាចផ្លូវដីចាក់ថ្មីនឹងមានភាពស្អិតពិបាកធ្វើដំណើរនៅពេលមានភ្លៀងធ្លាក់ខ្លាំងជាដើម ។
ឆ្លើយតបទៅនឹងការចង់ដឹង និងការបារម្ភរបស់មហាជន ជុំវិញលក្ខខណ្ឌរស់នៅរបស់បងប្អូនជនភៀសសឹក ផ្អែកតាមទិន្នន័យផ្លូវការ ពីអាជ្ញាធរខេត្តបន្ទាយមានជ័យ បានឱ្យដឹងថា ផ្ទះបៃតងគំរូខាងលើនេះ គឺស្ថិតនៅក្នុងចំណោមជម្រកបណ្តោះអាសន្ន ដែលរាជរដ្ឋាភិបាលបានសាងសង់រួចរាល់ ផ្ទះសរុប ៣,០០០ខ្នង ស្ថិតនៅឃុំស្លក្រាម ស្រុកស្វាយចេក ។ ទីនេះជាកន្លែងស្នាក់នៅបណ្តោះអាសន្នរបស់ប្រជាពលរដ្ឋភៀសសឹកជាច្រើនរយគ្រួសារ មកពីភូមិនានា នៃតំបន់បឹងត្រកួន ស្រុកថ្មពួក ខេត្តបន្ទាយមានជ័យ ដែលបានចាប់ឆ្នោតជ្រើសរើសដីឡូតិ៍ ចាប់តាំងតែពីខែមីនា ឆ្នាំ២០២៦មកម្ល៉េះ ។ ចំពោះទំហំដីផ្ទះ និងប្រព័ន្ធហេដ្ឋារចនាសម្ព័ន្ធគាំទ្រត្រូវបានរៀបចំឡើងយ៉ាងយកចិត្តទុកដាក់ ដោយផ្ទះនីមួយៗមានទំហំដី ២០គុណនឹង ៣០ ម៉ែត្រ ដែលផ្តល់លំហូរទូលាយអាចឱ្យបងប្អូនដាំដុះបន្លែបង្ការ និងរៀបចំរុក្ខជាតិបៃតងជុំវិញផ្ទះបានយ៉ាងស្រស់ស្អាតដូចផ្ទះគំរូខាងលើ ។
រាល់ខ្នងផ្ទះទាំងអស់សុទ្ធតែមានបន្ទប់ទឹកប្រើប្រាស់ផ្ទាល់ខ្លួន ព្រមទាំងមានការតភ្ជាប់បណ្តាញទឹក និងភ្លើងប្រើប្រាស់គ្រប់គ្រាន់ ។ ដើម្បីសម្រាលបន្ទុក រាជរដ្ឋាភិបាលបានជួយសម្រួលថ្លៃទឹក និងថ្លៃភ្លើងជូនបងប្អូនរយៈពេលពេញមួយឆ្នាំ ដោយកំណត់មួយខ្នងផ្ទះប្រើប្រាស់ត្រឹម៣០គីឡូវ៉ាត់ ក្នុងមួយខែ ។ នៅក្នុងទីតាំងជម្រកស្នាក់នៅបណ្តោះអាសន្ននេះ អាជ្ញាធរក៏បានរៀបចំសាងសង់ហេដ្ឋារចនាសម្ព័ន្ធរួមមាន សាលារៀន មណ្ឌលសុខភាព និងទីស្នាក់ការសន្តិសុខ ដើម្បីបម្រើសេវាជូនបងប្អូនប្រជាពលរដ្ឋភៀសសឹកឱ្យមានភាពកក់ក្តៅ ។
សម្តេចបវរធិបតី ហ៊ុន ម៉ាណែត ធ្លាប់បានគូសបញ្ជាក់យ៉ាងច្បាស់ថា ការផ្តល់ជម្រកបណ្តោះអាសន្នដែលមានការគិតគូរទាំងបរិស្ថាន និងសុខុមាលភាពបែបនេះ គឺដើម្បីធានាការរស់នៅរបស់បងប្អូនពលរដ្ឋ ។ តែទោះជាយ៉ាងណា នេះមិនមែនមានន័យថា រាជរដ្ឋាភិបាលបោះបង់សិទ្ធិទាមទារទឹកដីនោះឡើយ ពោល គឺរាជរដ្ឋាភិបាលនៅតែមានជំហរម៉ឺងម៉ាត់ និងដាច់ខាតក្នុងការការពារបូរណភាពទឹកដី តាមយន្តការការទូតដោយសន្តិវិធី ។
ការចេះច្នៃប្រឌិត និងភាពឧស្សាហ៍ព្យាយាមរបស់គ្រួសារភៀសសឹកគំរូនេះ បានសរបញ្ជាក់ឱ្យឃើញថា ទោះបីជាស្ថិតក្នុងស្ថានភាពលំបាក ឬជាទីជម្រកបណ្តោះអាសន្នក៏ដោយ ឱ្យតែយើងចេះរៀបចំ ទីនោះនឹងក្លាយជាកន្លែងរស់នៅដ៏មានក្តីសុខ និងជាចំណុចចាប់ផ្តើមនៃក្តីសង្ឃឹមដ៏រឹងមាំបំផុតសម្រាប់សហគមន៍ទាំងមូល៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ