អ្នកសិល្បៈ និងមហាជនជាច្រើន បានសម្តែងនូវការកោតសសើរ និងមោទនភាពយ៉ាងខ្លាំងចំពោះតារាចម្រៀងអ្នកនាង ទេព បូព្រឹក្ស និងលោក ជី ដេវីត ដែលបាននាំយកទម្រង់សិល្បៈវប្បធម៌ខ្មែរមួយចំនួនយកទៅសម្តែងនៅលើឆាកតន្ត្រីដ៏ធំមួយ…
អ្នកសិល្បៈ និងមហាជនជាច្រើន បានសម្តែងនូវការកោតសសើរ និងមោទនភាពយ៉ាងខ្លាំងចំពោះតារាចម្រៀងអ្នកនាង ទេព បូព្រឹក្ស និងលោក ជី ដេវីត ដែលបាននាំយកទម្រង់សិល្បៈវប្បធម៌ខ្មែរមួយចំនួនយកទៅសម្តែងនៅលើឆាកតន្ត្រីដ៏ធំមួយ ដែលបានធ្វើឡើង កាលពីថ្ងៃទី១៩ ខែមេសា ឆ្នាំ២០២៦ ។
ទេព បូព្រឹក្ស និងលោក ជី ដេវីត បានក្លាយជាតារាចម្រៀងតំណាងប្រទេសកម្ពុជា នៅក្នុងការចូលរួមកម្មវិធី ASEAN-Korea Music Festival 2026 ROUND ដែលរៀបចំធ្វើនៅក្នុងប្រទេសហ្វីលីពីន ក្នុងនោះ ក៏មានការចូលរួមពីសំណាក់តារាចម្រៀងល្បីៗជាច្រើរូបក្នុងតំបន់អាស៊ីផងដែរ ។ អ្វីដែលជាការចាប់អារម្មណ៍ និងទាក់ទាញសម្រាប់ទស្សនិកជនដែលចូលរួមទស្សនាផ្ទាល់ ជាពិសេស ទស្សនិកជនកម្ពុជានោះ គឺផ្ទាំងទស្សនីយភាពទម្រង់សិល្បៈបុរាណខ្មែរមួយចំនួនត្រូវបានរំលេចឡើងនៅលើឆាកតន្ត្រីដ៏អស្ចារ្យមួយនេះ ។
មិនខុសពីការសម្តែងនាពេលកន្លងមកតារាចម្រៀងអ្នកនាង ទេព បូព្រឹក្ស បានចំណាយថវិកាផ្ទាល់ខ្លួននៅក្នុងនាំយកក្រុមសិល្បៈមកពីសាលាភូមិន្ទវិចិត្រសិល្បៈ ដើម្បីចូលរួមសម្តែងអមជាមួយនឹងការច្រៀងរបស់នាង ។
ជាមួយការឡើងបកស្រាយចម្រៀងបទ ទេវរាជ និង វីរៈនារី តារាចម្រៀងអ្នកនាង ទេព បូព្រឹក្ស ក៏បានរំលេចនូវការសម្តែងទម្រង់សិល្បៈបុរាណមានដូចជា របាំអប្សរា និងល្ខោនខោលជាដើម ។ល។ អមនៅលើឆាកដែលមើលទៅពិតជាអស្ចារ្យ ខណៈពេលដែលការសម្តែងនេះក៏ទទួលបានការគាំទ្រ ទះដៃយ៉ាងកងរំពងពីសំណាក់ទស្សនិកជនដែលចូលរួមទស្សនាដោយផ្ទាល់ផងដែរ ។
ដោយឡែកជាមួយនឹងរូបភាពវីដេអូនៃការសម្តែងមួយនេះតារាចម្រៀងអ្នកនាង ទេព បូព្រឹក្ស ក៏បានភ្ជាប់ជាមួយសំណេរខ្លីបង្ហោះលើបណ្តាញសង្គមថា របាំអប្សរា វប្បធម៌របស់យើង រះ យ៉ាងស្រស់ស្អាតបំផុតនៅលើឆាកអន្តរជាតិ នៅហ្វីលីនពីន ។
យ៉ាងណាក្រោយឃើញការសម្តែងដ៏អស្ចារ្យរបស់តារាចម្រៀងអ្នកនាង ទេព បូព្រឹក្ស និងលោក ជី ដេវីត ជាមួយនឹងការបង្ហាញទម្រង់សិល្បៈដែលជារបស់ខ្មែរនៅលើឆាកអន្តរជាតិដ៏ធំមួយនេះ គេឃើញមានអ្នកសិល្បៈ និងទស្សនិកជនខ្មែរជាច្រើនបាននាំគ្នាចូលរួមអបអរសាទរ និងសម្តែងនូវមោទនភាពយ៉ាងខ្លាំងចំពោះអ្នកសិល្បៈទាំងពីររូបនេះ ។
ជាក់ស្តែង ព្រះអង្គម្ចាស់ក្សត្រិយ៍ ចេណ្ណា បានបង្ហោះសំណេរលើបណ្តាញសង្គមថា ខ្ញុំពិតជារំភើប និងមានមោទកភាពណាស់ ចំពោះការសម្ដែងដ៏អស្ចារ្យរបស់បងទាំងពីរ G-Devith Tep Boprek ពិតជាសិល្បករ សិល្បការិនីកំពូលនៃកម្ពុជា ដែលបាននាំយកព្រលឹងវប្បធម៌ខ្មែរទៅរះយ៉ាងចិញ្ចាំងចិញ្ចាចលើឆាកអន្ដរជាតិASEAN-Korea Music Festival 2026 ROUNDក្នុងប្រទេសហ្វីលីពីនថា នៅក្នុងស្រុក ឬនៅក្រៅប្រទេស បងទាំងពីរតែងតែរំលេច និងលើកបង្ហាញពីសិល្បៈខ្មែរជានិច្ចលើការសម្ដែង ជាពិសេស នៅលើម៉ូដសម្លៀកនីមួយៗ ហើយខ្ញុំសង្ឃឹមថា បងៗទាំងពីរ មានឱកាសកាន់តែច្រើនបន្តទៀត ក្នុងការផ្សព្វផ្សាយពីវប្បធម៌ជាតិទៅកាន់បរទេស ។
ចំណែកតារាសម្តែង និងពិធីករលោក ជា វណ្ណារិទ្ធ ក៏បានបង្ហោះសំណេរលើបណ្តាញសង្គមថា មោទកភាពចំពោះការសម្តែងដ៏អស្ចារ្យរបស់អ្នកទាំងពីរណាស់ ជាពិសេស ការនាំយកព្រលឹងវប្បធម៌ខ្មែរ ទៅរះយ៉ាងចិញ្ចែងចិញ្ចាចលើឆាកអន្ដរជាតិ ASEAN-Korea Music Festival 2026 ROUND ក្នុងប្រទេសហ្វីលីពីន Philippines 🇵🇭។
លោកបញ្ជាក់ថា រាល់ការសម្តែងទាំងស្រុក ឬនៅក្រៅប្រទេស មិនដែលធ្វើឱ្យគ្រប់គ្នាខកបំណងនោះទេ So Proud of both of you idol ។
ជាការកត់សម្គាល់ នេះមិនមែនជាលើកទីមួយទេ ដែលតារាចម្រៀងអ្នកនាង ទេព បូព្រឹក្ស បាននាំយកទម្រង់សិល្បៈបុរាណខ្មែរយកទៅសម្តែងនៅលើឆាកអន្តរជាតិ ពោលកាលពីខែមិថុនា ឆ្នាំ២០២៥ ក៏បាននាំយកផ្ទាំងទស្សនីយភាពសិល្បៈបុរាណខ្មែរមួយចំនួនយកទៅសម្តែងនៅលើឆាកអន្តរជាតិ ក្នុងកម្មវិធីROUND FESTIVAL 2025 ដែលបានរៀបចំធ្វើឡើងនៅក្នុងប្រទេសម៉ាឡេស៊ី ផងដែរ ។
បន្ទាប់ពីការសម្តែងបានបញ្ចប់ ទេព បូព្រឹក្ស បានបង្ហាញក្តីរីករាយ និងមោទនភាពយ៉ាងខ្លាំង ក្នុងពេលដែលនាងមានឱកាសបង្ហាញការសម្តែងរបស់ខ្លួននៅក្រៅប្រទេសជាលើកដំបូង ដោយរួមទាំងនាំយកទម្រង់សិល្បៈបុរាណខ្មែរបង្ហាញអោយអន្តរជាតិបានស្គាល់ថែមទៀត ៕
ចែករំលែកព័តមាននេះ