តេហេរ៉ង់ ៖ តើការសម្លា.ប់សមាជិកគ្រួសារមេដឹកនាំកំពូលអ៊ីរ៉ង់នឹងក្លាយជាភ្លើងបញ្ឆេះកំហឹង ដែលរុញច្រានឱ្យអ៊ីរ៉ង់បើកការវាយប្រហារសងសឹកទ្រង់ទ្រាយធំ នាំអោយសង្គ្រាមរាលដាលពាសពេញតំបន់មជ្ឈិមបូព៌ាឬយ៉ាងណា?
ស្ថានភាពនៅមជ្ឈិមបូព៌ាបានឈានដល់ចំណុចផ្ទុះអាវុធដ៏ស្រួចស្រាវបំផុតមិនធ្លាប់មាន បន្ទាប់ពីមានការបញ្ជាក់ជាផ្លូវការអំពីការបាត់បង់សមាជិកគ្រួសារជិតស្និទ្ធបំផុតរបស់មេដឹកនាំកំពូលអ៊ីរ៉ង់ នៅក្នុងប្រតិបត្តិការយោធាទ្រង់ទ្រាយធំរបស់សហរដ្ឋអាមេរិក និងអ៊ីស្រាអ៊ែល ។
យោងតាមការចុះផ្សាយរបស់ទីភ្នាក់ងារសារព័ត៌មានរដ្ឋអ៊ីរ៉ង់ Fars News និងត្រូវបានដកស្រង់បន្តដោយ REUTERS នៅថ្ងៃអាទិត្យ ទី១ ខែមីនា ឆ្នាំ២០២៦ នេះសមាជិកគ្រួសាររបស់លោក Ayatollah Ali Khamenei ដែលបានបាត់បង់ជីវិតរួមមាន ៖ កូនស្រី របស់លោក Khamenei , កូនប្រសាប្រុស និងកូនប្រសាស្រី , ចៅប្រុស របស់មេដឹកនាំកំពូលរូបនេះ ការបាត់បង់សមាជិកគ្រួសារកម្រិតខ្ពស់បែបនេះត្រូវបានគេចាត់ទុកថា ជាការវាយប្រហារចំ «បេះដូង» នៃរបបដឹកនាំក្រុងតេហេរ៉ង់ ដែលមិនធ្លាប់មានក្នុងប្រវត្តិសាស្ត្ររាប់ទសវត្សរ៍មកនេះ ។
ស្របពេលជាមួយគ្នានេះ ភាពមិនច្បាស់លាស់បានកើតឡើងជុំវិញស្ថានភាពអាយុជីវិយរបស់លោក Khamenei ផ្ទាល់ ព្រោះប្រធានាធិបតី ដូណាល់ ត្រាំ និងមន្ត្រីជាន់ខ្ពស់អ៊ីស្រាអ៊ែល បានប្រកាសថា លោក Khamenei ក៏ស្ថិតក្នុងចំណោមអ្នកស្លា.ប់ផងដែរ នៅក្នុងការវាយប្រហារតាមអាកាសដ៏សន្ធាប់នោះ ។ ប៉ុន្តែរឿងនេះ ត្រូវបានមន្ត្រីរដ្ឋាភិបាលអ៊ីរ៉ង់បានចេញមុខច្រានចោលភ្លាមៗ ដោយសង្កត់ធ្ងន់ថាវាគ្រាន់តែជា «សង្គ្រាមចិត្តសាស្ត្រ» ក្នុងបំណងបង្កឱ្យមានភាពវឹកវរក្នុងប្រទេសតែប៉ុណ្ណោះ ។
ទោះបីជាមានការបាត់បង់ជីវិតជនស៊ីវិល និងសមាជិកគ្រួសារថ្នាក់ដឹកនាំក៏ដោយ យោធាអ៊ីស្រាអ៊ែល (IDF) មិនបានបន្ថយដៃឡើយ ។ នៅថ្ងៃអាទិត្យដដែលនេះ អ៊ីស្រាអ៊ែលបានបើកការវាយប្រហាររលកថ្មីបន្ថែមទៀត ដោយតម្រង់ទៅលើ ៖ ឃ្លាំងមីស៊ីលបាលិស្ទីគ ៖ ដើម្បីកាត់ផ្ដាច់សមត្ថភាពវាយបករបស់អ៊ីរ៉ង់ ។ ប្រព័ន្ធការពារដែនអាកាស ៖ សំដៅគ្រប់គ្រងដែនអាកាសអ៊ីរ៉ង់ទាំងស្រុង ។ មានសេចក្ដីរាយការណ៍អំពីស្នូរផ្ទុះយ៉ាងខ្លាំងៗបន្តបន្ទាប់នៅក្នុងរដ្ឋធានីតេហេរ៉ង់ ដែលបណ្ដាលឱ្យប្រជាពលរដ្ឋមានការភ័យខ្លាចយ៉ាងខ្លាំង ។
សង្គ្រាមនេះ មជ្ឈដ្ឋានអន្តរជាតិកំពុងបារម្ភថា ការសម្លា.ប់សមាជិកគ្រួសារមេដឹកនាំកំពូលនេះ នឹងក្លាយជា «ភ្លើងបញ្ឆេះកំហឹង» ដែលរុញច្រានឱ្យអ៊ីរ៉ង់បើកការវាយប្រហារសងសឹកទ្រង់ទ្រាយធំដែលអាចធ្វើឱ្យសង្គ្រាមនេះរីករាលដាលពាសពេញតំបន់មជ្ឈិមបូព៌ាទាំងមូល ៕
ចែករំលែកព័តមាននេះ