អាមេរិក ៖ លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជា បានលើកឡើងនូវទស្សនៈវិភាគដ៏ស៊ីជម្រៅមួយ នៅថ្ងៃទី២១ ខែកុម្ភៈ ឆ្នាំ២០២៦…
អាមេរិក ៖ លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជា បានលើកឡើងនូវទស្សនៈវិភាគដ៏ស៊ីជម្រៅមួយ នៅថ្ងៃទី២១ ខែកុម្ភៈ ឆ្នាំ២០២៦ ដោយប្រៀបធៀបការផ្ដល់បទសម្ភាសន៍ផ្ទាល់របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ទៅកាន់សារព័ត៌មានអន្តរជាតិខ្នាតយក្ស Reuters និង Fox News ថាជា «ភ្លៀងកក់ខែ» ដែលបានមកជួយស្រោចស្រពភាពស្ងួតហួតហែងនៃព័ត៌មានពិតរបស់កម្ពុជានៅលើឆាកអន្តរជាតិ ។
តាមរយៈការវិភាគដែលចែករំលែកតាមគណនីហ្វេសបុក លោកបណ្ឌិត គិន ភា បានបង្ហាញហេតុផលចម្បងពីរដែលធ្វើឱ្យបទសម្ភាសន៍នេះ មានតម្លៃដូចជា ភ្លៀងកក់ខែ ៖ ទី១. ការបំបែកភាពស្ងប់ស្ងាត់ចំពោះអ្នកសារព័ត៌មានអន្តរជាតិ ៖ លោកបណ្ឌិតសង្កេតឃើញថា កន្លងមកថ្នាក់ដឹកនាំកំពូលៗរបស់កម្ពុជាកម្រនឹងផ្ដល់បទសម្ភាសន៍ផ្ទាល់ដល់អ្នកសារព័ត៌មានណាស់ ។ កង្វះការិយាល័យឆ្លើយឆ្លងព័ត៌មានអន្តរជាតិធំៗនៅក្នុងស្រុកបានធ្វើឱ្យសារព័ត៌មានបរទេសភាគច្រើន ដកស្រង់ប្រភពតែពីខាងភាគី «បច្ចាមិត្ត» ដែលនាំឱ្យការពិតត្រូវបានបិទបាំង កែច្នៃ និងលាបពណ៌បង្ខូចកេរ្តិ៍ឈ្មោះកម្ពុជា។
ទី២. ការផ្តល់សំណើមដល់ការពិត៖ លោកបានបញ្ជាក់ថា ទោះបីភ្លៀងមួយមេនេះមិនទាន់អាចធ្វើឱ្យដីដែលហួតហែងយូរមកហើយជោកជាំបានទាំងស្រុង ប៉ុន្តែវាបានផ្ដល់សំណើមដល់ «រុក្ខជាតិតូចៗ» និងជួយឱ្យពិភពលោកបានដឹងពីសច្ចភាពខ្លះៗដែលកម្ពុជាចង់បង្ហាញ ។ សារៈសំខាន់នៃ «រដូវវស្សាក្នុងរដូវប្រាំង» ក្នុងន័យយុទ្ធសាស្ត្រ លោកបណ្ឌិត គិន ភា បានសង្កត់ធ្ងន់ថា កម្ពុជាមិនត្រូវស្កប់ស្កល់ត្រឹមតែភ្លៀងកក់ខែម្ដងម្កាលនោះទេ ។
លោកបានផ្ដល់អនុសាសន៍ថា៖ «យើងត្រូវតែបង្កើតរដូវវស្សានៅក្នុងរដូវប្រាំង ដើម្បីធានាថា មានទឹកខួបប្រាំងខួបវស្សា ពោលគឺការរក្សាទំនាក់ទំនងវិជ្ជមានជាប្រចាំជាមួយសារព័ត៌មានអាជីពអន្តរជាតិ ដើម្បីកសាងភាពជឿជាក់ និងទំនុកចិត្ត។» មេរៀនប្រវត្តិសាស្ត្រ និងការការពារដែនដី ជាមួយគ្នានេះដែរ អ្នកវិភាគរូបនេះក៏បានរំលឹកពីមេរៀននៃសង្គ្រាមឈ្លានពាន ដែលកម្ពុជាត្រូវតែចងចាំ និងបង្រៀនដល់កូនចៅតកូនតចៅ ។
លោកបានដាស់តឿនថា ការបំភ្លេចប្រវត្តិសាស្ត្រ ឬមិនឱ្យកូនចៅរៀនប្រវត្តិសាស្ត្រ គឺជាកំហុសដ៏ធ្ងន់ធ្ងរដែលនាំឱ្យយើងដើរជាន់ដានដដែលៗ ។
ជាចុងក្រោយ លោកបណ្ឌិតបានរំលឹកជាសីលធម៌ព័ត៌មានថា «ទណ្ឌកម្មដ៏ធ្ងន់ធ្ងរបំផុតសម្រាប់អ្នកនិយាយកុហក គឺសូម្បីតែនិយាយការពិត ក៏គ្មាននរណាជឿ» ដែលនេះជាសារដាស់តឿនដល់ការប្រើប្រាស់អំណាចនៃព័ត៌មានពិត ដើម្បីការពារយុត្តិធម៌សម្រាប់សង្គមជាតិ៕
ចែករំលែកព័តមាននេះ