រាជធានីភ្នំពេញ ៖ ក្នុងនាមជាមិត្តស្និទ្ធិស្នាលមួយរូប តារាចម្រៀងនាង ពេជ្រ សូលីកា បានចូលរួមចំណែកទិញសំបុត្រនៃការប្រគំតន្ត្រីរបស់ ទេព បូព្រឹក្ស ដែលគិតជាទឹកប្រាក់ចំនួន១ពាន់ដុល្លារ…
រាជធានីភ្នំពេញ ៖ ក្នុងនាមជាមិត្តស្និទ្ធិស្នាលមួយរូប តារាចម្រៀងនាង ពេជ្រ សូលីកា បានចូលរួមចំណែកទិញសំបុត្រនៃការប្រគំតន្ត្រីរបស់ ទេព បូព្រឹក្ស ដែលគិតជាទឹកប្រាក់ចំនួន១ពាន់ដុល្លារ ដើម្បីចែកជូនដោយឥតគិតថ្លៃដល់អ្នកគាំទ្រដែលមានបំណងចង់ចូលទស្សនា និងរួមចំណែកជួយឧបត្ថម្ភទៅដល់វីរកងទ័ពកម្ពុជាដែលឈរការពារទឹកដី ។
បើតាមការប្រកាសពីតារាចម្រៀងនាង ទេព បូព្រឹក្ស នៅលើបណ្តាញសង្គមបានបញ្ជាក់ថា មិត្តសំលាញ់របស់ខ្ញុំ Pich Solikah បានចូលរួមទិញសំបុត្រ2000$ ដូចនេះស្អែកFan Fan អាចមកយកសំបុត្រfreeបានណា ឬឆាតចូលpage ដើម្បីយកសំបុត្រfree ។ ចំណែកនាង ពេជ្រ សូលីកា ក៏បានបង្ហោះសំណេរខ្លីមួយនៅលើគណនេយ្យហ្វេសប៊ុករបស់ខ្លួនថា សំបុត្រមួយសន្លឹករបស់បងប្អូន ស្មើនឹងការចូលរួមជួយទៅដល់ស្បៀងកងទ័ពជួរមុខ Top Fan នាងខ្ញុំអាចទាក់ទង Tep Boprek ដើម្បីទទួលសំបុត្រ free ។
ជាការកត់សម្គាល់ ការសម្រេចជួយទិញសំបុត្រការប្រគំតន្ត្រីរបស់ ទេព បូព្រឹក្ស ពីពេជ្រ សូលីកា នាពេលនេះបានធ្វើឡើង បន្ទាប់ពីមានការសំណូមពរ និងចង់បានពីប្រិយមិត្តគាំទ្រមួយចំនួនដែលមានបំណងចង់ចូលទស្សនាការប្រគំតន្ត្រីនេះ តែមិនមានថវិកាគ្រប់គ្រាន់ខណៈពេលដែលនេះ ក៏ជាការរួមចំណែកមួយផ្នែកទៀតរបស់នាងនៅក្នុងសកម្មភាពជួយឧបត្ថម្ភដល់វីរកងទ័ពកម្ពុជាផងដែរ ។
គួរបញ្ជាក់ថា តារាចម្រៀងលោក ជី ដេវីត និងនាង ទេព បូព្រឹក្ស នឹងរៀបចំព្រឹត្តការណ៍វប្បធម៌សហសម័យដ៏ធំមួយដែលមានឈ្មោះថា ខ្លឹមនៃព្រះនគរក្នុងគោលបំណងរំលឹក និងបំផុសយុវជនជំនាន់ក្រោយចូលរួមលើកតម្កើង និងថែរក្សាវប្បធម៌របស់ខ្មែរ ។ ព្រឹត្តការណ៍នេះ គ្រោងនឹងធ្វើឡើងនៅថ្ងៃទី១១ ខែមករា ឆ្នាំ២០២៦ ខាងមុខនេះ នៅសាលប្រហោស្រពកោះពេជ្រ ។
បើតាមការប្រកាសរបស់តារាចម្រៀងនាង ទេព បូព្រឹក្ស តាមបណ្តាញសង្គមបានឱ្យដឹងថា គោលបំណងរបស់យើងខ្ញុំ គឺធ្វើដើម្បីរំលឹក និងលើកតម្កើងសម្បត្តិវប្បធម៌ជាតិជាសញ្ញាមួយនៃការកសាងអត្តសញ្ញាណជាតិអោយកាន់តែរឹងមាំថែមមួយកំរឹតទៀត។ នាងបន្តថា សម្បត្តិវប្បធម៌ដែលជាដួងព្រលឹងជាតិ គឺត្រូវបានយកចិត្តទុកដាក់ថែរក្សាជាមួយនឹងសកម្មភាពយ៉ាងសកម្មអំពីពួកយើងដែលជាកូនចៅនៃព្រះចៅក្រុងកម្ពុជា។
យើងខ្ញុំសូមអំពាវនាវដល់បងប្អូនខ្មែរសូមចូលរួមអោយបានច្រើនកុះករ ដើម្បីជាចលនាវប្បជាតិនិយមដ៏អស្ចារ្យមួយ ចូលខ្មែរមានស្មារតីជាចង្កឹះមួយបាច់ ។ សំបុត្រនឹងដាក់លក់នៅថ្ងៃទី៣ ខែមករា ឆ្នាំ២០២៦ ថវិកាបានពីការលក់សំបុត្រទាំងស្រុងនឹងប្រគល់ជូនមូលនិធិ Brand Miss ដើម្បីជួយដល់វីរកងទ័ពដ៏អង់អាចរបស់យើង «វប្បធម៌រលត់ជាតិរលាយ វប្បធម៌ពណ្ណរាយជាតិថ្កើនថ្កាន» ។
ចំណែកតារាចម្រៀងលោក ជី ដេវីត ក៏បានអះអាងដែរថា បច្ចុប្បន្ន ពួកយើងកំពុងខិតខំព្យាយាមការពារសិល្បៈវប្បធម៌របស់យើងពីចោរ ដែលតែងតែច្បាមយកសិល្បៈ វប្បធម៌ និងប្រាសាទរបស់យើង ។ លោកបញ្ជាក់ថា លោកមានបំណងចង់ធ្វើកម្មវិធីយូរណាស់មកហើយ ដោយពេលនេះយើងធ្វើនៅក្នុងកាលៈទេសៈដ៏លំបាកមួយ ដែលយើងបានជួបរឿងសោកសៅទាំងអស់គ្នា ។
បើតាមលោក ជី ដេវីត ព្រឹត្តការណ៍ខ្លឹមនៃព្រះនគរ គឺយើងមានឆន្ទៈមួយជាគោល គឺយើងចង់ដាស់ស្មារតីស្នេហាជាតិ និងវប្បធម៌ ។ វាជាពេលវេលាដ៏វិសេសវិសាលមួយសម្រាប់ទាំងអស់គ្នាមានឨកាសមកចូលរួម ដើម្បីបង្ហាញពីសាមគ្គីភាព និងភាពជាម្ចាស់ដើមនៃសម្បត្តិវប្បធម៌ដ៏អស្ចារ្យរបស់យើង ។លោករំពឹងថា ព្រឹត្តការណ៍នេះ នឹងមានការចូលរួមគាំទ្រច្រើនពីបងប្អូនជាពលរដ្ឋ ខណៈពេលថវិកាដែលទទួលបានយើងយកទៅចូលរួមក្នុងមូលនិធិជួយដល់វីរកងទ័ពកម្ពុជា ៕
ចែករំលែកព័តមាននេះ