រាជធានីភ្នំពេញ ៖ ជនសង្ស័យ៤នាក់ផ្សេងទៀត ពាក់ព័ន្ធការចែកចាយគ្រឿងញៀនត្រូវបានសមត្ថកិច្ចខណ្ឌសែនសុខឃាត់ខ្លួន បន្ទាប់ពីឃាត់ខ្លួនជនសង្ស័យម្នាក់មុននេះមួយថ្ងៃរួចមក ។ សមត្ថកិច្ចខណ្ឌសែនសុខបានឱ្យដឹងថា កាលពីថ្ងៃទី២០ កក្កដា ២០១១ សមត្ថកិច្ចខណ្ឌសែនសុខបានធ្វើការល្បាតតាមផ្លូវបេតុង ក្រុម១១ ភូមិត្រពាំងឈូក សង្កាត់ទឹកថ្លា ខណ្ឌសែនសុខ ប្រទះឃើញជនសង្ស័យម្នាក់ក៏ហៅឱ្យឈប់ស្រាប់តែជនសង្ស័យនោះព្យាយាមរត់គេចខ្លួន តែត្រូវសមត្ថកិច្ចចាប់ជាប់ ហើយពេលឆែកឆេររកឃើញប្រភេទម៉ាទឹកកក១កូនថង់ ។
ពេលសមត្ថកិច្ចធ្វើការសាកសួរ ជនជាប់សង្ស័យនោះឈ្មោះជា អេង អាយុ៣៥ឆ្នាំ ឆ្លើយថា ខ្លួនបានទិញថ្នាំញៀននេះពីបុរសម្នាក់ទៀតឈ្មោះស្រុង ថា អាយុ៥១ឆ្នាំ នៅក្រុម១១ ភូមិត្រពាំងឈូក សង្កាត់ទឹកថ្លា ខណ្ឌសែនសុខ។ ក្រោយពីបានចម្លើយ សមត្ថកិច្ចបានស្វែងរកជនពាក់ព័ន្ធបន្តទៀត រហូតដល់ថ្ងៃទី២១ កក្កដា ២០១១ វេលាម៉ោង៩និង៣០នាទីព្រឹក សមត្ថកិច្ចក៏ចុះទៅឃាត់ខ្លួនជនសង្ស័យម្នាក់ឈ្មោះស្រុង ថា ដល់ក្នុងផ្ទះ និងថែមទាំងប្រទះឃើញជនពាក់ព័ន្ធ៣នាក់ទៀតកំពុងអង្គុយប្រើប្រាស់ថ្នាំញៀន ប៉ូលិសក៏ឃាត់ខ្លួនទាំងអស់គ្នាតែម្តង។
ជនពាក់ព័ន្ធ៣នាក់នេះមានឈ្មោះ ១-ឈ្មោះផាវ ហូ ភេទប្រុស អាយុ២៦ឆ្នាំ ជាជាងជួសជុលទូរស័ព្ទដៃ ស្នាក់នៅផ្ទះជួលក្នុងសង្កាត់ផ្សារដើមគ ខណ្ឌទួលគោក ២-ឈ្មោះសួន រ៉ា ភេទប្រុស អាយុ៤៨ឆ្នាំ គ្មានមុខរបរពិតប្រាកដ ស្នាក់នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ ៣-ឈ្មោះមុត ស្រីឯក ភេទស្រី អាយុ២៩ឆ្នាំ ។ ពួកគេបានមកប្រមូលផ្តុំគ្នាប្រើប្រាស់ថ្នាំញៀនញឹកញាប់នៅក្នុងផ្ទះស្រុង ថា ហើយពេលនេះត្រូវបានសមត្ថកិច្ចកសាងសំណុំរឿងបញ្ជូនទៅតុលាការចាត់ការតាមនីតិវិធី ៕
ចែករំលែកព័តមាននេះ