ខេត្តកំពង់ធំ ៖ តួលេខអ្នករងគ្រោះស្លាប់ និងរបួសក្នុងឧបទ្ទវហេតុក្រឡាប់រថយន្តធ្លាក់ពីលើស្ពានអូរអំបិល ក្នុងស្រុកសន្ទុក ដែលពីដំបូងបានឱ្យដឹងថា មានអ្នកស្លាប់១៣នាក់ និងរបួស២៤នាក់នោះ ត្រូវបានលោកអភិបាលស្រុកឱ្យដឹងថា អ្នកស្លាប់បានកើនឡើងដល់១៦នាក់…
ខេត្តកំពង់ធំ ៖ តួលេខអ្នករងគ្រោះស្លាប់ និងរបួសក្នុងឧបទ្ទវហេតុក្រឡាប់រថយន្តធ្លាក់ពីលើស្ពានអូរអំបិល ក្នុងស្រុកសន្ទុក ដែលពីដំបូងបានឱ្យដឹងថា មានអ្នកស្លាប់១៣នាក់ និងរបួស២៤នាក់នោះ ត្រូវបានលោកអភិបាលស្រុកឱ្យដឹងថា អ្នកស្លាប់បានកើនឡើងដល់១៦នាក់ និងអ្នករបួសធ្ងន់-ស្រាល២៤នាក់ ដូច្នេះអ្នកជិះក្នុងរថយន្ត ព្រមទាំងអ្នកបើកបរផងទាំងអស់៤០នាក់ ។
គ្រោះថ្នាក់ដ៏ធ្ងន់ធ្ងរនេះ គឺបណ្ដាលមកពីអ្នកបើកបររថយន្តក្រុងរបស់ក្រុមហ៊ុន វីរៈ រិទ្ធី បានបើកទៅបុកបង្កាន់ដៃស្ពាន រួចធ្លាក់ចូលទៅក្នុងទឹកអូរក្បែរផ្លូវជាតិលេខ៦ ក្នុងស្រុកសន្ទុក ខេត្តកំពង់ធំ ដែលមានជម្រៅ៥ម៉ែត្រ នៅវេលាម៉ោងប្រហែល៣និង២០នាទីទៀបភ្លឺ ថ្ងៃទី២០ ខែវិច្ឆិកា ឆ្នាំ២០២៥ ។ នេះបើយោងតាមអាជ្ញាធរមូលដ្ឋាន ។
អភិបាលស្រុកសន្ទុក លោក ឡង គីសឹង បានថ្លែងលើបណ្ដាញហ្វេសប៊ុកនៅល្ងាចថ្ងៃទី២០ ខែវិច្ឆិកាថា «ខ្ញុំសូមសំណូមពរក្រុមហ៊ុនដឹកអ្នកដំណើរទាំងអស់ មេត្តាយកចិត្តទុកដាក់ចំពោះអតិថិជនគ្រប់រូប ហើយត្រូវគិតថា ពួកគាត់គឺជាញាតិមិត្តរបស់យើងម្នាក់ មិនមែនជាភ្ញៀវដែលត្រឹមបង់ប្រាក់សម្រាប់ជិះរថយន្តយើងឡើយ» ។ ពួកគេបានផ្ញើជីវិតលើអ្នកកាន់ចង្កូតនេះហើយ ។
នៅព្រឹកថ្ងៃទី២១ ខែវិច្ឆិកា ឆ្នាំ២០២៥ អាជ្ញាធរមូលដ្ឋានបាននិមន្តព្រះសង្ឃសូត្រធម៌ និងប្រោះទឹកមន្ត ដើម្បីបណ្ដេញឧបទ្រពចង្រៃឱ្យចាកចេញឆ្ងាយពីកន្លែងកើតហេតុ និងលើស្ពានអូរប្រាសាទ ដោយបានជញ្ជាត់ព្រលឹងអ្នករងគ្រោះចាកចេញទៅកាន់ភូមិស្រុករបស់ខ្លួន និងសូមឱ្យសិរីសួស្តីកើតមាននៅកន្លែងកើតហេតុឡើងវិញផងដែរ ។
តាមលោកឧត្តមសេនីយ៍ទោ ហេង សុផល កម្លាំងសមត្ថកិច្ចជំនាញ បានចុះទៅអន្តរាគមន៍សង្គ្រោះជនរងគ្រោះចេញពីក្នុងទឹក តាំងពីក្រោយពេលកើតហេតុភ្លាមៗ នៅចំណុចស្ពានអូរប្រាសាទ ភូមិជ័យជំនះ ឃុំកកោះ ស្រុក
សន្ទុក ខេត្តកំពង់ធំ ជាតុល្យការចុងក្រោយបានបញ្ជាក់ថា ករណីរថយន្តក្រុងបើកបរពេលយប់ ចេញពីខេត្តសៀមរាបឆ្ពោះមកភ្នំពេញ ដែលបានបុកបង្កាន់ដៃស្ពាននេះ បានបណ្តាលឱ្យមនុស្សស្លាប់កើនឡើងដល់១៦នាក់ ។ គឺរថយន្តនោះមានផ្ទុកមនុស្សសរុប៤០នាក់ ។
ជាការសន្និដ្ឋានរបស់សមត្ថកិច្ចជំនាញ ករណីគ្រោះថ្នាក់ចរាចរណ៍ដែលរថយន្តក្រុងបើកបុកបង្កាន់ដៃស្ពាននេះ អាចមកពីអ្នកបើកបរស្ថិតក្នុងស្ថានភាព«ងងុយដេក» ពីព្រោះគ្រោះថ្នាក់នេះ មិនបានបង្កការប៉ះពាល់ទៅលើអ្វីផ្សេងទៀតឡើយ ។
យោងតាមគណៈកម្មាធិការជាតិសុវត្ថិភាពចរាចរណ៍ផ្លូវគោក ក្នុងឆមាសទី១ ឆ្នាំ២០២៥ គ្រោះថ្នាក់ចរាចរណ៍នៅទូទាំងប្រទេស បានកើតឡើងចំនួន១ ០៦៦លើក ។ ក្នុងនោះបណ្តាលឲ្យមនុស្សស្លាប់ជិត៧០០នាក់ និងរបួសជាង១ពាន់នាក់ ។ បើធៀបនឹងរយៈពេលដូចគ្នាកាលពីឆ្នាំ២០២៤ គ្រោះថ្នាក់ចរាចរណ៍បានថយចុះ៣១% ខណៈចំនួនអ្នកស្លាប់ថយចុះ១២% ។
តាមរបាយការណ៍ដដែលនេះ មូលហេតុបង្កគ្រោះថ្នាក់រួមមាន បើកបរល្មើសល្បឿនមានរហូតដល់៥០% មិនគោរពសិទ្ធិគ្នា២១% មិនប្រកាន់ស្តាំ១១% ប្រជែងក្នុងស្ថានភាពគ្រោះថ្នាក់៧% បើកបរក្នុងស្ថានភាពស្រវឹង៥% និងបើកបរក្នុងស្ថានភាពងងុយដេក១% ៕
ចែករំលែកព័តមាននេះ