ខេត្តកំពង់ចាម ៖ នៅក្នុងរដូវបិទនេសាទ និងរដូវបើកនេសាទ កម្លាំងជំនាញជលផលខេត្តបានសហការជាមួយនគរបាលអាវុធហត្ថ ព្រមទាំងអាជ្ញាធរមូលដ្ឋានដោយបង្ក្រាបបានច្រើនករណី។ ជាក់ស្ដែង នៅថ្ងៃទី១១ វិច្ឆិកា ឆ្នាំ២០២៥…
ខេត្តកំពង់ចាម ៖ នៅក្នុងរដូវបិទនេសាទ និងរដូវបើកនេសាទ កម្លាំងជំនាញជលផលខេត្តបានសហការជាមួយនគរបាលអាវុធហត្ថ ព្រមទាំងអាជ្ញាធរមូលដ្ឋានដោយបង្ក្រាបបានច្រើនករណី។
ជាក់ស្ដែង នៅថ្ងៃទី១១ វិច្ឆិកា ឆ្នាំ២០២៥ ជំនាញជលផលបានចុះបង្ក្រាបពីរគោលដៅ ក្នុងនោះ មាននៅបឹងធំ និងបឹងកេះ ដែលមានព្រំប្រទល់ជាប់ស្រុកបី គឺកងមាស ព្រៃឈរ និងកំពង់សៀម ដោយរឹបអូសបានវត្ថុតាងជាច្រើន ត្រូវបានកាប់បំផ្លាញចោលនៅនឹងកន្លែង ដោយក្រុមប្រព្រឹត្តបទល្មើសដាក់នៅទីតាំងឆ្ងាយៗ ចៀសវាងកុំឱ្យអ្នកភូមិដឹង។
លោកលី ស្រ៊ី នាយខាងរដ្ឋបាលជលផលខេត្តបានឲ្យដឹងថា ដោយមានការចង្អុលបង្ហាញពីសំណាក់ឯកឧត្តមអភិបាលខេត្ត ប្រធានមន្ទីរកសិកម្មខេត្តព្រមទាំងពីសំណាក់រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានឲ្យកម្លាំងជំនាញយកចិត្តទុកដាក់បង្ក្រាបបទល្មើសនេសាទ ដែលមាននៅតាមតំបន់ផ្សេងៗ ក្នុងនោះមានព្រែកជាប់ទន្លេមេគង្គ។ សកម្មភាពបានធ្វើឡើងបន្តបន្ទាប់ ក្រោយពីមានកម្លាំងសហគមន៍មូលដ្ឋានរាយការណ៍មកជំនាញរបស់ខេត្ត។
លោកនាយខណ្ឌរដ្ឋបាលជលផលខេត្តបន្តឲ្យដឹងទៀតថា ជាក់ស្ដែង នៅថ្ងៃទី១១ ខែវិច្ឆិកា ឆ្នាំ២០២៥ សកម្មភាពខណ្ឌរដ្ឋបាលជលផលកំពង់ចាម សហការជាមួយអាជ្ញាធរស្រុកព្រៃឈរ កម្លាំងកងរាជអាវុធហត្ថស្រុកព្រៃឈរ និងកម្លាំងប៉ុស្តិ៍នគរបាលរដ្ឋបាលមៀន ដោយមានការសម្របសម្រួលពីឯកឧត្តម ព្រះរាជអាជ្ញានៃអយ្យការអមសាលាដំបូងខេត្តកំពង់ចាម បានចុះបង្ក្រាបបទល្មើសជលផល រុះរើ និងបំផ្លាញចោលឧបករណ៍ខុសច្បាប់បានចំនួន០៣ករណី នៅចំណុចរលំពោធិ៍,ចំណុចបឹងកេះ និងចំណុចក្របបាយ ឃុំមៀន ស្រុកព្រៃឈរ ខេត្តកំពង់ចាម។
ក្នុងកិច្ចប្រតិបត្តិការបង្ក្រាបសមត្តកិច្ចសម្រេចកំទេចវត្ថុតាងបំផ្លាញចោល នៅនិងកន្លែង រួមមាន ៖
-ឧបករណ៍លូស្បៃមុងចំនួន ៣៣មាត់
-របាំងស្បៃមុងប្រវែង ១ ៧៥៥ ម៉ែត្រ
-បង្គោលចម្រឹងចំនួន ៨៨០ដើម
-ចាក់លែងត្រីចម្រុះទម្ងន់ ៦២គីឡូក្រាម ចាក់ចូលបឹងធម្មជាតិវិញផងដែរ ។
សូមបញ្ជាក់ថា រយៈពេលកន្លងមក ករណីប្រើប្រាស់ឧបករណ៍ឆក់ដោយខុសច្បាប់ ក្នុងនោះបានមកបង្ក្រាប៦ករណី ស្មើមនុស្ស៨នាក់ បញ្ជូនទៅឲ្យតំណាងអយ្យការអមសាលាដំបូងខេត្តសម្រេចដាក់ពន្ធនាគារ។ ពិន័យអន្តរកាលចំនួន៥ករណីបានទឹកប្រាក់ចំនួន៣៩លានរៀលចូលរដ្ឋ។
ចែករំលែកព័តមាននេះ