រាជធានីភ្នំពញ ៖ លោកសាពូន មីដាដា បានបង្ហាញតម្រុយវិលមកកាន់អាជីពចម្រៀង និងតន្ត្រីជាថ្មីឡើងវិញ បន្ទាប់ពីលោកខានខាន និងបាត់វត្តមានពីវិស័យមួយនេះអស់រយៈពេលប្រមាណជា១២ឆ្នាំ ក្រោយលោកបានចាប់ឈោងភាពល្បីល្បាញមួយរយៈ កាលពីពេលកន្លងទៅ…
រាជធានីភ្នំពញ ៖ លោកសាពូន មីដាដា បានបង្ហាញតម្រុយវិលមកកាន់អាជីពចម្រៀង និងតន្ត្រីជាថ្មីឡើងវិញ បន្ទាប់ពីលោកខានខាន និងបាត់វត្តមានពីវិស័យមួយនេះអស់រយៈពេលប្រមាណជា១២ឆ្នាំ ក្រោយលោកបានចាប់ឈោងភាពល្បីល្បាញមួយរយៈ កាលពីពេលកន្លងទៅ ។
បើទោះបីជាមិនបានប្រឡូកក្នុងអាជីពសិល្បៈអោយពេញដៃដូចមុន និងការខកខានមិនបានចេញបទចម្រៀងថ្មីៗ ប៉ុន្តែសាពូន មីដាដា ក៏ហាក់មិនទៅណាឆ្ងាយពីវិស័យមួយនេះឡើយ ពោលតារារូបនេះក៏នៅបង្ហាញវត្តមានច្រៀងខ្លះៗដែលបានចាក់ផ្សាយតាមស្ថានីយទូរទស្សន៍ក្នុងស្រុកផងដែរ ។
យ៉ាងណា នាពេលនេះ លោក សាពូន មីដាដា ក៏បានបង្ហាញតម្រុយនឹងវិលចូលសិល្បៈចម្រៀងសារជាថ្មីឡើងវិញ ដើម្បីជាការឆ្លើយតបទៅតាមការចង់បានពីប្រិយមិត្តដែលធ្លាប់និយម និងគាំទ្របទចម្រៀងរបស់លោកនាពេលកន្លងមក ។
ការបង្ហាញពីតម្រុយការខាងលើនេះបានធ្វើឡើង បន្ទាប់ពីលោកបានបង្ហាញវត្តមានច្រៀងលើកដំបូងក្នុងកម្មវិធីមួយកាលពីពេលថ្មីៗនេះ ដោយរួមជាមួយតារាចម្រៀង និងតន្ត្រីករជើងចាស់មួយចំនួន ។
ការចូលរួមច្រៀងកម្មវិធីនេះ ត្រូវបានលោក សាពូន មីដាដា ចាត់ទុកគឺជាការបើកទំព័រថ្មី និងដំបូងរបស់លោកក្នុងអាជីពសិល្បៈ បន្ទាប់ពីលោកបានខកខានបាត់មុខពីវិស័យនេះអស់ពេលប្រមាណ១២ឆ្នាំ ខណៈពេលដែលលោកនៅតែចាត់ទុកចម្រៀងតន្ត្រី គឺមានតម្លៃស្មើជីវិតរបស់លោក ។
ជាមួយនឹងរូបភាពថតជុំគ្នាជាមួយតារាចម្រៀងមួយចំនួនក្នុងការច្រៀងរួមគ្នាក្នុងពិធីមួយតារាចម្រៀងលោក សាពូន មីដាដា បានភ្ជាប់ជាមួយនឹងសំណេរបង្ហោះលើបណ្តាញសង្គមថា ចូលរួមចៀងកម្មវិធីដំបូងក្រោយពីការរយាលខកខានអស់រយះពេល១២ឆ្នាំ 🥰 អាជីពសិល្បៈសម្តែងតែងនិពន្ធ ចម្រៀងតន្ត្រី មានតម្លៃស្មើជីវិតខ្ញុំ ។
ជាការកត់សម្គាល់ បន្ទាប់ពីបង្ហោះរូបភាព និងសំណេរខាងលើនេះ គេឃើញមានមហាជនបានចូលខំមិនដោយបានសាកសួរថា តើលោកត្រឡប់ចូលសិល្បៈវិញឬយ៉ាងណា ក្នុងពេលនោះ លោក សាពូន មីដាដា បានឆ្លើយតបច្បាស់ៗថា បាទ ។
ក្រោយដឹងថា លោក សាពូន មីដាដា នឹងវិលចូលសិល្បៈជាថ្មីឡើងវិញនាពេលនេះ មហាជន ជាពិសេស បណ្តាអ្នកគាំទ្ររូបលោកបានសម្តែងការអបអរសាទរ និងជូនពរឲ្យលោកសម្រេចជោគជ័យនៅក្នុងដំណើរវិលមកក្នុងអាជីពសិល្បៈជាថ្មីនាពេលនេះ ។
គួរបញ្ជាក់ថា តារាចម្រៀងលោក សាពូន មីដាដា ធ្លាប់បានចាប់ឈោងភាពល្បីល្បាញកាលពីអំឡុងឆ្នាំ២០០៤ តាមរយៈបទចម្រៀង ដើម្បីអ្វីទៅអូន និយមន័យស្នេហ៍ គ្រប់យ៉ាងដើម្បីអូន រួមនឹងបទចម្រៀងមួយចំនួនទៀត ។
កន្លងមកតារាចម្រៀងរូបនេះក៏ធ្លាប់បានលើកឡើងដែរថា ការងារសិល្បៈគឺជាអ្វីដែលរូបលោកស្រលាញ់ហើយមិនមានបំណងថានឹងឈប់ឡើយ ប៉ុន្តែគ្រាន់តែចង់ផ្អាកមួយរយៈហើយពេលវេលាណាសមរម្យរូបលោកនឹងចូលច្រៀងវិញ ៕
ចែករំលែកព័តមាននេះ