ខេត្តព្រៃវែង ៖ មន្ត្រីជំនាញ និងអាជ្ញាធរស្រុកពារាំង នៅព្រឹកថ្ងៃទី៦ តុលានេះ បានចេញសេចក្តីជូនដំណឹងមួយដោយប្រកាសផ្អាកការធ្វើចរាចរណ៍ឆ្លងកាត់លើផ្លូវកៅស៊ូពីភូមិតាំងស្នាយ ទៅភូមិមេសរប្រចាន់ ជាបណ្តោះអាសន្ន ដោយសារតែផ្លូវនេះត្រូវទឹកជំនន់ហូរច្រោះខ្លាំង…
ខេត្តព្រៃវែង ៖ មន្ត្រីជំនាញ និងអាជ្ញាធរស្រុកពារាំង នៅព្រឹកថ្ងៃទី៦ តុលានេះ បានចេញសេចក្តីជូនដំណឹងមួយដោយប្រកាសផ្អាកការធ្វើចរាចរណ៍ឆ្លងកាត់លើផ្លូវកៅស៊ូពីភូមិតាំងស្នាយ ទៅភូមិមេសរប្រចាន់ ជាបណ្តោះអាសន្ន ដោយសារតែផ្លូវនេះត្រូវទឹកជំនន់ហូរច្រោះខ្លាំង បណ្ដាលឲ្យដាច់ផ្លូវ ។
ផ្លូវមួយខ្សែនេះមានទទឹង៥ម៉ែត្រ និងបណ្ដោយជាង៥ គីឡូម៉ែត្រ ឆ្លងកាត់ភូមិចំនួន ៤ ក្នុងឃុំរកា និងឃុំមេសរប្រចាន់ បច្ចុប្បន្នផ្លូវនេះត្រូវទឹកជំនន់ហូរបុកដាច់ផ្លូវមួយកន្លែងទំហំជាង៧ ម៉ែត្រ និងមានស្នាមរុនហូរច្រោះជាច្រើនកន្លែងទៀត ។
អាជ្ញាធរស្រុកពារាំងបានបញ្ជាក់ថា ដោយសារតែផ្លូវកៅស៊ូមួយខ្សែនេះ ត្រូវទឹកជំនន់ហូរកាត់ផ្ដាច់ទាំងស្រុង មិនអាចធ្វើចរាចរណ៍ឆ្លងកាត់បាន ទើបនៅព្រឹកថ្ងៃទី៦ តុលានេះ អាជ្ញាធរស្រុកពារាំង បានប្រកាសបិទការធ្វើចរាចរណ៍តាមកំណាត់ផ្លូវនេះជាបណ្ដោះអាសន្នសិន ដើម្បីបញ្ជៀសគ្រោះថ្នាក់ផ្សេងៗជាយថាហេតុ ។ ហើយការបើកឲ្យដំណើរការឆ្លងកាត់វិញ អាជ្ញាធរស្រុក និងជូនដំណឹងនៅពេលក្រោយ ។
គួរបញ្ជាក់ផងដែរថា ប៉ុន្មានថ្ងៃមុនពេលផ្លូវកៅស៊ូមួយខ្សែនេះ ត្រូវទឹកហូរដាច់ អាជ្ញាធរស្រុកក៏បានដឹកនាំកម្លាំងចុះមកជួយចាក់ដីទប់ផ្លូវនេះផងដែរ ប៉ុន្តែដោយសារតែឆ្នាំនេះ ទឹកជំនន់ជន់ឡើងខ្លាំងហើយកម្លាំងទឹកហូរខ្លាំងពេក ទប់មិនឈ្នះ ទើបនៅព្រឹកថ្ងៃទី៦ តុលានេះ កំណត់ផ្លូវមួយខ្សែនេះត្រូវបានទឹកហូរកាត់ផ្ដាច់ មិនអាចធ្វើចរាចរណ៍ឆ្លងកាត់បានតែម្ដង ៕
ចែករំលែកព័តមាននេះ