អ្នកចម្រៀងអាយ៉ៃជើងចាស់លោក ព្រហ្ម ម៉ាញ បានឡើងជាឯកឧត្តមហើយ បន្ទាប់ពីលោកត្រូវបានព្រះមហាក្សត្រចេញព្រះរាជ្យក្រឹតប្រកាសតែងតាំង ជាទីប្រឹក្សាសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា មានឋានៈស្មើរដ្ឋលេខាធិការ…
អ្នកចម្រៀងអាយ៉ៃជើងចាស់លោក ព្រហ្ម ម៉ាញ បានឡើងជាឯកឧត្តមហើយ បន្ទាប់ពីលោកត្រូវបានព្រះមហាក្សត្រចេញព្រះរាជ្យក្រឹតប្រកាសតែងតាំង ជាទីប្រឹក្សាសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា មានឋានៈស្មើរដ្ឋលេខាធិការ ។
យោងតាមព្រះរាជក្រឹតដែលត្រូវបានផ្សព្វផ្សាយតាមបណ្តាញសង្គម បានបញ្ជាក់ថា ព្រះមហាក្សត្របានត្រាស់បង្គាប់តែងតាំង និងផ្តល់ឋានៈឯកឧត្តម ព្រហ្ម ម៉ាញ ជាទីប្រឹក្សាសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នីតិកាលទី៥ មានឋានៈស្មើរដ្ឋលេខាធិការ ។
ព្រះរាជក្រឹតនេះត្រូវបានឡាយព្រះព្រហ្ថលេខា កាលពីថ្ងៃទី២២ ខែកក្កដា ឆ្នាំ២០២៥ ។ ដំណឹងខាងលើនេះ ត្រូវបានមហាជនជាច្រើនសម្តែងការអបអរសាទរ ត្បិតលោក ព្រហ្ម ម៉ាញ បានចូលរួមចំណែកលើកស្ទួយវិស័យសិល្បៈខ្មែរអស់ជាច្រើនឆ្នាំ ជាពិសេសទម្រង់ចម្រៀងអាយ៉ៃ ខណៈពេលដែលកេរ្តិ៍ឈ្មោះរបស់លោក ក៏មានភាពល្បីសុះសាយទូទាំងប្រទេស ។
ជាការកត់សម្គាល់ នៅមុនទទួលបានតួនាទីជាទីប្រឹក្សាសម្តេចតេជោ នាពេលនេះលោកព្រហ្ម ម៉ាញ ក៏មានឋាន្តរស័ក្តិថ្នាក់វរសេនីយ៍ឯក ក្នុងកងអង្គរក្សផងដែរ ។ គេនៅចាំបានថា ក្នុងឱកាសជួបសំណេះសំណាលជាមួយនឹងសហគមន៍ខ្មែរនៅអាមេរិក និងខ្មែរ នៅកាណាដា នៅវ៉ាស៊ីនតោនឌីស៊ី សហរដ្ឋអាមេរិក កាលពីថ្ងៃទី១១ ខែឧសភា ឆ្នាំ២០២២ លោកព្រហ្ម ម៉ាញ បានស្នើសុំសម្តេចតេជោ ហ៊ុន សែន ឡើងពីស័ក្តិ៥ ទៅផ្កាយមួយ ។
ក្នុងអំឡុងពេលនោះលោកព្រហ្ម ម៉ាញ បានបញ្ជាក់នៅចំពោះមុខសម្តេចតេជោថា ៖«ឥលូវឡើងគោរមងាហើយ គួរឡើងស័ក្តិទៀត ដោយសារសព្វថ្ងៃនេះ មានតួនាទីជាវរសេនីយ៍ឯក ដោយចង់បានឋានៈជាឧត្តមសេនីយ៍ត្រី» ។
ដោយឡែក ក្រៅពីការផ្តល់ឋានៈខាងលើនេះ លោក ព្រហ្ម ម៉ាញ ក៏ធ្លាប់ទទួលការទំនុកបម្រុងពីសម្តេចតេជោផងដែរ ដោយកន្លងមកសម្តេច បានផ្តល់ថវិកាចំនួន២ម៉ឺនដុល្លារសម្រាប់លោកព្យាបាលជំងឺ ។
ជាងនេះទៀត កាលពីថ្ងៃទី១១ ខែមេសា ឆ្នាំ២០២២ អតីតប្រមុខរដ្ឋស្ដីទីសម្ដេចវិបុលសេនាភក្ដី សាយ ឈុំ បានត្រាស់បង្គាប់ផ្ដល់គោរមងារកិត្តិយសនៃរាជបណ្ឌិត្យសភាកម្ពុជា ជូនលោក ព្រហ្ម ម៉ាញ ជា «កិត្តិឧទ្ទេសបណ្ឌិត»ផងដែរ ។
គួរបញ្ជាក់ថា លោក ព្រហ្ម ម៉ាញ ហៅស្មៀន ម៉ាញ មានស្រុកកំណើតនៅខេត្តកំពង់ស្ពឺ ហើយបានកើតក្នុងឆ្នាំ១៩៥០ ក្នុងត្រកូលគ្រួសារកសិករមួយ ។ លោក ព្រហ្ម ម៉ាញ បានបោះជំហានចូលសិល្បៈតាំងពីអាយុ៣០ឆ្នាំ រហូតមកទល់បច្ចុប្បន្ន ហើយលោកជាអ្នកចម្រៀងអាយ៉ៃ ដែលមានកេរ្តិ៍ឈ្មោះល្បីសុះសាយទាំងក្នុងប្រទេស និងក្រៅប្រទេស ព្រមទាំងទទួលបានការកោតសរសើរមិនដាច់ពីមាត់ពីមហាជនទាំងក្មេងចាស់ ប្រុស ស្រី ហើយដៃគូដ៏ស៊ីចង្វាក់របស់លោក គឺអ្នកស្រី នួន សារី ហៅ យាយយ៉យ ។
លោក ព្រហ្ម ម៉ាញ ក៏បានបង្កើតសាលាបង្រៀនផ្នែកសិល្បៈបុរាណ ពោល គឺបង្កើតសាលាបង្រៀនអាយ៉ៃ និងចម្រៀងភ្លេងការ ដោយឥតគិតថ្លៃដល់កូនខ្មែរជំនាន់ក្រោយ ដែលចង់សិក្សាក៏ដូចជាដើម្បីចួលរួមថែរក្សា និងលើកស្ទួយនូវសិល្បៈបុរាណខ្មែរ ៕
ចែករំលែកព័តមាននេះ