ទីក្រុងកៀវ៖ នៅទីបំផុត អ៊ុយក្រែនចាប់បានហើយជនសង្ស័យនៅក្នុងអំពើឃាតកម្មទៅលើអតីតប្រធានសភាអ៊ុយក្រែន លោកអេនឌ្រី ប៉ារូប៊ី (Andriy Parubiy) កាលពីថ្ងៃសៅរ៍។ នេះបើយោងតាមការបញ្ជាក់របស់លោកហ្សេឡិនស្គី។ អ៊ុយក្រែនកំពុងកើតមានសង្គ្រាមស្រាប់ផង…
ទីក្រុងកៀវ៖ នៅទីបំផុត អ៊ុយក្រែនចាប់បានហើយជនសង្ស័យនៅក្នុងអំពើឃាតកម្មទៅលើអតីតប្រធានសភាអ៊ុយក្រែន លោកអេនឌ្រី ប៉ារូប៊ី (Andriy Parubiy) កាលពីថ្ងៃសៅរ៍។ នេះបើយោងតាមការបញ្ជាក់របស់លោកហ្សេឡិនស្គី។ អ៊ុយក្រែនកំពុងកើតមានសង្គ្រាមស្រាប់ផង ហើយថែមកើតមានអំពើឃាតកម្មបុគ្គលសំខាន់បែបនេះទៀតប្រៀបបាននឹងទុក្ខជាន់លើទុក្ខ។
លោកហ្សេឡិនស្គីបានបង្ហោះសារនៅលើតេឡេក្រាមថាជនសង្ស័យរូបនោះបានផ្ដល់ចម្លើយសារភាពបឋម។ លោកថាអាជ្ញាធរកំពុងបើកការស៊ើបអង្កេតស៊ីជម្រៅដើម្បីប្រមូលភស្តុតាងគ្រប់ស្ថានភាពពាក់ព័ន្ធនឹងអំពើមនុស្សឃាតនេះ។ លោកប៉ារូប៊ី វ័យ៥៤ឆ្នាំ ត្រូវឃាតករបាញ់ជាច្រើនគ្រាប់បណ្ដាលឱ្យស្លាប់ភ្លាមៗនៅនឹងកន្លែងកើតហេតុនៅទីក្រុងល្វីវ (Lviv)។ លោកហ្សេឡិនស្គីចាត់ទុកថានេះជាឃាតកម្មដ៏សាហាវ និងជាបញ្ហាពាក់ព័ន្ធនឹងសន្តិសុខជាតិទាំងមូល។
លោកប៉ារូប៊ីធ្លាប់ធ្វើជាប្រធានរដ្ឋសភាចាប់ពីខែមេសា ឆ្នាំ២០១៦ដល់ខែសីហា ឆ្នាំ២០១៩។ កាលពីអំឡុងពេលហែបាតុកម្មឆ្នាំ២០១៣-២០១៤ គាត់ជាអ្នកដឹកនាំចលនាដ៏សំខាន់ម្នាក់ដែលអំពាវនាវឱ្យអ៊ុយក្រែនពង្រឹងទំនាក់ទំនងជាមួយសហភាពអឺរ៉ុប។ លោកហ្សេឡិនស្គីថ្លែងថាលោកសូមអរគុណមន្ត្រីអនុវត្តច្បាប់ដែលបានសហការគ្នាយ៉ាងល្អឈានទៅចាប់ខ្លួនជនសង្ស័យ។ លោកថាយើងត្រូវតែស្រាវជ្រាវរាល់អង្គហេតុពាក់ព័ន្ធនឹងអំពើឃាតកម្មនេះ។
ជនសង្ស័យត្រូវបានចាប់ខ្លួននៅតំបន់ឃ្មេលនីតស្គី ភាគខាងលិចអ៊ុយក្រែន។ នេះបើយោងតាមការបង្ហើបឱ្យដឹងពីរដ្ឋមន្ត្រីក្រសួងមហាផ្ទៃអ៊ុយក្រែនបង្ហោះសារនៅលើតេឡេក្រាម។ លោកថ្លែងថាសម្រាប់ពេលនេះ សមត្ថកិច្ចមិនទាន់អាចលាតត្រដាងការពិតឱ្យបានគ្រប់ជ្រុងជ្រោយទេព្រោះត្រូវលាក់ការណ៍សម្ងាត់ខ្លះ។ លោកសូមសង្ខេបដោយខ្លីថាអំពើឃាតកម្មនេះបានរៀបចំទុកជាមុនយ៉ាងល្អិតល្អន់។ ខាងលើនេះជាការដកស្រង់ប្រភពពីទីភ្នាក់ងារព័ត៌មានរ៉យទ័រ និងប្រភពដទៃទៀត៕
ចែករំលែកព័តមាននេះ