ប្រទេសឥណ្ឌា ៖ ក្មេងប្រុសជនជាតិឥណ្ឌាអាយុ១ឆ្នាំម្នាក់ កំពុងទទួលការចាប់អារម្មណ៍យ៉ាងខ្លាំងពីបណ្តាប្រព័ន្ធផ្សព្វផ្សាយក្នុងស្រុក ក៏ដូចជាអន្តរជាតិ ដោយសារតែក្មេងប្រុសរូបនោះ បានខាំពស់វែក១ក្បាលរហូតដល់ងាប់ បន្ទាប់ពីសត្វអាសិរពិស១ក្បាលនោះ ព្យាយាមរុំដៃរបស់គេពេលកំពុងអង្គុយលេងក្នុងផ្ទះ។ ហេតុការណ៍នេះ…
ប្រទេសឥណ្ឌា ៖ ក្មេងប្រុសជនជាតិឥណ្ឌាអាយុ១ឆ្នាំម្នាក់ កំពុងទទួលការចាប់អារម្មណ៍យ៉ាងខ្លាំងពីបណ្តាប្រព័ន្ធផ្សព្វផ្សាយក្នុងស្រុក ក៏ដូចជាអន្តរជាតិ ដោយសារតែក្មេងប្រុសរូបនោះ បានខាំពស់វែក១ក្បាលរហូតដល់ងាប់ បន្ទាប់ពីសត្វអាសិរពិស១ក្បាលនោះ ព្យាយាមរុំដៃរបស់គេពេលកំពុងអង្គុយលេងក្នុងផ្ទះ។ ហេតុការណ៍នេះ បានកើតឡើងកាលពីថ្ងៃទី២៥ ខែកក្កដា ឆ្នាំ២០២៥ នៅក្នុងភូមិមួយក្បែរទីក្រុង Bettiah រដ្ឋ Bihar ហើយក្មេងប្រុសដ៏ក្លាហានរូបនោះ ត្រូវបានស្គាល់ឈ្មោះថា Govinda Kumar ដូចដែលត្រូវបានចេញផ្សាយដោយសារព័ត៌មាន India Times និង India Today។
យោងតាមសេចក្តីរាយការណ៍ពីកាសែត The Independent បានរាយការណ៍ថា តាមឪពុកម្តាយកុមារ Govinda Kumar បានឱ្យដឹងថា ពស់វែក១ក្បាលបានមករុំដៃកូនប្រុស ហើយជាការឆ្លើយតប Govinda បានខាំពស់នោះដល់ងាប់។ ជីដូន Govinda បានប្រាប់សារព័ត៌មានក្នុងស្រុកថា ឪពុកម្តាយរបស់ Govinda តក់ស្លុត និងភ្ញាក់ផ្អើលយ៉ាងខ្លាំង នៅពេលបានឃើញពស់វែក១ក្បាលរុំដៃកូនប្រុស ហើយបានស្ទុះទៅរកកូន ប៉ុន្តែពេលទៅដល់បែរជាឃើញពស់នោះមានស្នាមខាំ និងងាប់បាត់ទៅហើយ។
យ៉ាងណាមិញ បន្ទាប់ពីខាំពស់វែកឱ្យងាប់ហើយ Govinda ក៏បានដួលសន្លប់ ហើយត្រូវបានគ្រួសារបញ្ជូនទៅសង្គ្រោះបន្ទាន់នៅមណ្ឌលសុខភាពតំបន់ដើម្បីសង្គ្រោះបឋម មុនពេលបញ្ជូនបន្តទៅកាន់មន្ទីរពេទ្យមហាវិទ្យាល័យវេជ្ជសាស្ត្ររដ្ឋាភិបាលទីក្រុង Bettiah។ អគ្គនាយកមន្ទីរពេទ្យបានប្រាប់សារព័ត៌មាន Indian Express ថា Govinda Kumar បានដួលសន្លប់ភ្លាមៗ បន្ទាប់ពីគេបានខាំសត្វពស់ពិសដែលនៅរស់ត្រង់ក្បាល និងមាត់ ប៉ុន្តែឥទ្ធិពលពិសរបស់ពស់នោះ មិនធ្ងន់ធ្ងររហូតប៉ះពាល់ដល់ជីវិតរបស់ Govinda នោះទេ ដោយគ្រាន់តែធ្វើឱ្យគេសន្លប់តែប៉ុណ្ណោះ គួបផ្សំនឹងការព្យាបាលទាន់ពេលវេលា។ ក្រុមគ្រូពេទ្យកំពុងផ្តល់ថ្នាំជាបន្តបន្ទាប់ ហើយ Govinda ស្ថិតក្រោមការសង្កេតពីយ៉ាងយកចិត្តទុកដាក់ បង្ការការបង្ហាញរោគសញ្ញាមិនប្រក្រតីណាមួយ។
សូមជម្រាបថា ប្រទេសឥណ្ឌាមានពស់ប្រហែល៣០០ប្រភេទ រួមទាំងសត្វពស់ដែលមានពិសខ្លាំងចំនួន៦០ប្រភេទ។ យោងតាមការសិក្សាដែលបានចេញផ្សាយក្នុងឆ្នាំ២០២០ ដោយទស្សនាវដ្តី eLife ប្រទេសឥណ្ឌាបានកត់ត្រាករណីស្លាប់ដោយសារពស់ចឹកជាង១លាននាក់ក្នុងរយៈពេលត្រឹម២ទសវត្សចាប់ពីឆ្នាំ ២០០០ ដល់ ២០១៩៕
ចែករំលែកព័តមាននេះ