ទីក្រុងតេអេរ៉ង់៖ អ៊ីរ៉ង់កំពុងស្វះស្វែងរកខ្នងបង្អែកពីប្រទេសមហាអំណាចចិន និងរុស្ស៊ីបន្ទាប់ពីខ្លួនទទួលរងការវាយប្រហារពីអ៊ីស្រាអែល និងអាមេរិក។ រដ្ឋមន្ត្រីការបរទេសអ៊ីរ៉ង់ លោកអាបាស់ អារ៉ាកឈី (Abbas Araghchi) ជំរុញឱ្យមានកិច្ចសម្របសម្រួលផ្នែកសន្តិសុខជាតិពីក្រុមប្រទេសមហាអំណាច។…
ទីក្រុងតេអេរ៉ង់៖ អ៊ីរ៉ង់កំពុងស្វះស្វែងរកខ្នងបង្អែកពីប្រទេសមហាអំណាចចិន និងរុស្ស៊ីបន្ទាប់ពីខ្លួនទទួលរងការវាយប្រហារពីអ៊ីស្រាអែល និងអាមេរិក។ រដ្ឋមន្ត្រីការបរទេសអ៊ីរ៉ង់ លោកអាបាស់ អារ៉ាកឈី (Abbas Araghchi) ជំរុញឱ្យមានកិច្ចសម្របសម្រួលផ្នែកសន្តិសុខជាតិពីក្រុមប្រទេសមហាអំណាច។ លោកថ្លែងដូច្នេះនៅឯវេទិកានៃកិច្ចសហប្រតិបត្តិការសៀងហៃ (SCO) ដែលមានប្រទេសរុស្ស៊ី និងចិនចូលរួមនៅក្នុងកិច្ចប្រជុំកំពូលនោះដែរ។
កិច្ចប្រជុំនេះរំលេចឱ្យឃើញថាអ៊ីរ៉ង់ និងចិនកាន់តែមានទំនាក់ទំនងជិតស្និទ្ធជាមួយគ្នា រុស្ស៊ីក៏ដូចគ្នាដែរ បន្ទាប់ពីអ៊ីរ៉ង់មានជម្លោះប្រដាប់អាវុធដោយបាញ់មីស៊ីលឆ្លើយឆ្លងគ្នាជាមួយអ៊ីស្រាអែល។ នៅក្នុងជម្លោះនោះ អាមេរិកក៏បានចូលរួមទម្លាក់គ្រាប់បែកទៅលើទីតាំងនុយក្លេអ៊ែររបស់អ៊ីរ៉ង់ផងដែរ។ ជំនួយរបស់ចិនជួយទ្រទ្រង់សេដ្ឋកិច្ចអ៊ីរ៉ង់ និងក៏ជួយផ្នែកយោធាផងដែរ។ ដូច្នេះ ធ្វើឱ្យទណ្ឌកម្មដែលអាមេរិកដាក់ទៅលើអ៊ីរ៉ង់មិនសូវមានប្រសិទ្ធភាព និងមិនអាចគាបសង្កត់អ៊ីរ៉ង់បានឡើយ។
លោកអារ៉ាកឈីស្នើសុំបង្កើតយន្តការជាចិន្ត្រៃយ៍ដើម្បីឃ្លាំមើល, កត់ចំណាំទុក និងសម្របសម្រួលវិធានការឆ្លើយតបបែបណាមួយនៅពេលមានអំពើឈ្លានពានផ្នែកយោធា, ការបំផ្លិចបំផ្លាញទ្រព្យសម្បត្តិ, អំពើភេរវកម្មដែលប្រព្រឹត្តឡើងដោយរដ្ឋ និងការបំពានអធិបតេយ្យភាពជាតិរបស់រដ្ឋណាមួយ។ នៅក្នុងកិច្ចកិច្ចប្រជុំកំពូលនោះ លោកចាត់ទុកថាការវាយប្រហារពីសំណាក់អ៊ីស្រាអែល និងអាមេរិកទៅលើអ៊ីរ៉ង់ជាអំពើឈ្លានពាន។
លោកអារ៉ាកឈីបានជួបប្រធានាធិបតីចិន និងរដ្ឋមន្ត្រីការបរទេសរុស្ស៊ីជាលក្ខណៈទ្វេភាគីដាច់ដោយឡែកៗពីគ្នានៅខាងក្រៅកិច្ចប្រជុំកំពូល។ អ៊ីរ៉ង់យល់ឃើញថាវេទិកានៃកិច្ចសហប្រតិបត្តិសៀងហៃ (SCO) នេះជាឱកាសសម្រាប់ខ្លួនពង្រឹងទំនាក់ទំនងការទូត និងសេដ្ឋកិច្ច និងជួយរំដោះខ្លួនពីភាពឯកោ។ កាលពីសប្ដាហ៍មុន អ៊ីរ៉ង់បានជំរុញទំនាក់ទំនងការទូតយ៉ាងសម្បើមនៅពេលចូលរួមវេទិកាប្រ៊ីក (BRICS) នៅប្រេស៊ីល។
ប្រទេសចិន និងរុស្ស៊ីមានជំហរស្របគ្នានៅក្នុងបញ្ហាវាយប្រហារអ៊ីរ៉ង់ថ្មីៗនេះ។ រុស្ស៊ីចាត់ទុកថានោះជាការវាយប្រហារដែលឥតសមហេតុផល។ ប្រធានាធិបតីអ៊ីរ៉ង់ថ្លែងថាលោកនៅតែបើកចំហជានិច្ចសម្រាប់ការសន្ទនាគ្នាដើម្បីដោះស្រាយបញ្ហានុយក្លេអ៊ែរ។ ប៉ុន្តែទន្ទឹមនឹងនោះ អ៊ីរ៉ង់សម្រេចព្យួរទុកកិច្ចសម្របសម្រួលពីស្ថាប័នសង្កេតការណ៍នុយក្លេអ៊ែររបស់អង្គការសហប្រជាជាតិ៕
ចែករំលែកព័តមាននេះ