ទីក្រុងម៉ូស្គូ៖ រុស្ស៊ីចាប់ផ្ដើមចេញសារព្រមានជាបណ្ដើរៗហើយដើម្បីក្រើនរំលឹកក្រុមសម្ព័ន្ធមិត្តរបស់អាមេរិកនៅអាស៊ីបូព៌ាដែលមានជប៉ុន និងកូរ៉េខាងត្បូងជាដើមកុំធ្វើជ្រុលដៃពេកដែលអាចប៉ះពាល់សន្តិសុខជាតិកូរ៉េខាងជើង។ គេមិនត្រូវភ្លេចទេថាម៉ូស្គូ និងព្យុងយ៉ាងបានចុះហត្ថលេខាលើកតិកាសញ្ញាមិត្តភាព-សហការលើគ្រប់វិស័យ ជាពិសេសយោធា និងសេដ្ឋកិច្ច។
នៅក្នុងកិច្ចព្រមព្រៀងនោះ មានចំណុចមួយនិយាយថាភាគីហត្ថលេខីត្រូវបញ្ជូនកងទ័ព ឬអាវុធទៅជួយភាគីមួយទៀតដែលជាប់ដៃធ្វើសង្គ្រាម ឬរងការវាយប្រហារ។ ថ្ងៃនេះ ប្រមុខការទូតរុស្ស៊ី លោកឡាវរ៉ូស (Lavrov) ថ្លែងថាអាមេរិក កូរ៉េខាងត្បូង និងជប៉ុនមិនត្រូវបង្កើតសម្ព័ន្ធត្រីភាគីដែលធ្វើឱ្យប៉ះពាល់កូរ៉េខាងជើងនោះទេ។ ការថ្លែងដូច្នេះនៅពេលលោកបំពេញទស្សនកិច្ចនៅកូរ៉េខាងជើងដើម្បីពិភាក្សាអំពីការពង្រឹងទំនាក់ទំនងយោធា និងកិច្ចសហការការនៅក្នុងវិស័យដទៃទៀត។
លោកឡាវរ៉ូសបានធ្វើដំណើរទៅទីក្រុងវុនសាន (Wonsan) នៅភាគខាងកើតដើម្បីជួបសមភាគីរបស់លោក។ ប៉ុន្មានឆ្នាំចុងក្រោយនេះ គេសង្កេតឃើញថាទំនាក់ទំនងប្រទេសទាំង២រីកលូតលាស់ដូចផ្កាត្រូវទឹកសន្សើម។ កូរ៉េខាងជើងក៏ប្រកាសទទួលស្គាល់រួចហើយថាខ្លួនពិតជាបានបញ្ជូនកងទ័ពទៅជួយរុស្ស៊ីនៅតំបន់ខឺស (Kursk) និងជួយអាវុធយុទ្ធភ័ណ្ឌ និងគ្រាប់រំសេវក៏មិនតិចដែរ។ ជាថ្នូរត្រឡប់មកវិញ រុស្ស៊ីជួយបំពេញបន្ថែមបច្ចេកវិទ្យាដែលកូរ៉េខាងជើងខ្វះខាត និងជួយផ្នែកសេដ្ឋកិច្ច។
នេះមិនមែនជាសញ្ញាល្អប៉ុន្មានទេសម្រាប់កូរ៉េខាងត្បូង និងសម្ព័ន្ធមិត្ត។ ដ្បិតអីពួកគេបារម្ភថារុស្ស៊ីអាចនឹងចែករំលែកបច្ចេកវិទ្យាយោធាសំខាន់ៗ។ ឧទាហរណ៍ សព្វថ្ងៃនេះ កូរ៉េខាងជើងមិនទាន់ឈានដល់ផលិតក្បាលគ្រាប់នុយក្លេអ៊ែរបំពាក់នៅលើគ្រាប់មីស៊ីលអន្តរទ្វីបសម្រាប់បាញ់បានឆ្ងាយៗរហូតដល់ជាងមួយម៉ឺនគីឡូម៉ែត្រនៅឡើយទេ។ បើរុស្ស៊ីជួយបំពេញបន្ថែមត្រង់ចំណុចនេះនឹងក្លាយជាគ្រោះថ្នាក់កាន់តែខ្លាំងសម្រាប់ក្រុមប្រឆាំង។
ងាកមកកិច្ចជំនួបរវាងប្រមុខការទូតរុស្ស៊ី និងកូរ៉េខាងជើងនៅទីក្រុងវុនសាន លោកឡាវរ៉ូសបានឆ្លៀតយកឱកាសនោះចោទប្រកាន់អាមេរិក កូរ៉េខាងត្បូង និងជប៉ុនថាពួកគេកំពុងកសាងកម្លាំងយោធាហ៊ុមព័ទ្ធជុំវិញកូរ៉េខាងជើង។ ដូច្នេះលោកសូមព្រមានថាពួកគេមិនត្រូវឆ្លៀតបង្កើតសម្ព័ន្ធភាពនេះដើម្បីប្រឆាំងនឹងរដ្ឋដទៃឡើយ រួមទាំងកូរ៉េខាងជើង និងរុស្ស៊ីផងដែរ។
ការថ្លែងរបស់ប្រមុខការទូតរុស្ស៊ីចំពេលដែលអាមេរិក ជប៉ុន និងកូរ៉េខាងត្បូងចាប់ផ្ដើមធ្វើសមយុទ្ធយោធារួមគ្នាទ្រង់ទ្រាយធំកាន់តែញឹកញាប់ជាងមុននៅក្នុងអ្វីដែលពួកគេអះអាងដើម្បីត្រៀមទប់ទល់នឹងលទ្ធភាពនៃការវាយប្រហារដោយនុយក្លេអ៊ែរពីសំណាក់កូរ៉េខាងជើង។ ការធ្វើសមយុទ្ធនេះត្រូវគេបកស្រាយផ្សេងគ្នា។ ថ្វីដ្បិតសម្ព័ន្ធមិត្តត្រីភាគីអះអាងថាជាសមយុទ្ធការពារខ្លួន ប៉ុន្តែទីក្រុងព្យុងយ៉ាងយល់ថានេះជាការគំរាមកំហែងមកលើសន្តិសុខជាតិរបស់ខ្លួន និងជាការហាត់សមដើម្បីត្រៀមវាយប្រហារទៅលើខ្លួន៕
ចែករំលែកព័តមាននេះ