រាជធានីភ្នំពេញ ៖ ទើបតែចូលរោងការមិនបានប៉ុន្មានផងនោះ តារាចម្រៀងនាង ទេព បូព្រឹក្ស បានបង្ហើបគម្រោងចេញទៅច្រៀងនៅក្រៅប្រទេសជាលើកដំបូងនៅក្នុងអាជីពសិល្បៈរបស់ខ្លួន ខណៈពេលដែលនោះក៏ជាឱកាសដែលនាងអាចពាំនាំនូវសិល្បៈវប្បធម៌របស់ខ្មែរទៅបង្ហាញផងដែរ ។ បើតាមការបញ្ជាក់ពីតារាស្រីរូបនេះ…
រាជធានីភ្នំពេញ ៖ ទើបតែចូលរោងការមិនបានប៉ុន្មានផងនោះ តារាចម្រៀងនាង ទេព បូព្រឹក្ស បានបង្ហើបគម្រោងចេញទៅច្រៀងនៅក្រៅប្រទេសជាលើកដំបូងនៅក្នុងអាជីពសិល្បៈរបស់ខ្លួន ខណៈពេលដែលនោះក៏ជាឱកាសដែលនាងអាចពាំនាំនូវសិល្បៈវប្បធម៌របស់ខ្មែរទៅបង្ហាញផងដែរ ។
បើតាមការបញ្ជាក់ពីតារាស្រីរូបនេះ តាមគម្រោងនាងនឹងចេញទៅច្រៀងសម្តែងនៅក្នុងប្រទេសម៉ាឡេស៊ី នៅថ្ងៃទី២២ ខែមិថុនា ឆ្នាំ២០២៥ ខាងមុខនេះ ។ នៅក្នុងពិធីជួបជុំអ្នកគាំទ្រ កាលពីពេលថ្មីៗនេះ អ្នកនាង ទេព បូព្រឹក្ស បានអះអាងថា ឱកាសចេញទៅសម្តែងនៅក្រៅប្រទេសនាពេលនេះ គឺជាបំណងប្រាថ្នាដ៏ធំមួយសម្រាប់រូបនាង ដែលនាងបានបុណ្យស្រន់ចាប់តាំងពីនាងធ្វើបទចម្រៀងដោយខ្លួនឯងជាបន្តបន្ទាប់ ។
នាងបញ្ជាក់ថា អ្វីដែលនាងមានបំណងចេញទៅសម្តែងនៅក្រៅប្រទេសនោះ គឺដោយសារតែនាងអាចសម្រេចបំណងដោយសារនាងអាចនាំយករបាំបុរាណខ្មែរមួយចំនួន បូករួមជាមួយនឹងក្បាច់គុនល្បុក្តោទៅសម្តែងជាមួយនាង ដែលនោះគឺនាងពិតជារំភើបខ្លាំង ។
បើតាមអ្នកនាង ទេព បូព្រឹក្ស កន្លងមក នាងតែងតែធ្វើបទបែបបុរាណលាយជាមួយនឹងសហសម័យ ហើយតាំងពីកន្លងមកមិនមានអ្នកណាម្នាក់គាំទ្រឡើយ ថែមទាំងគេរិះគន់មកលើរូបនាងថា បានបំផ្លាញសិល្បៈវប្បធម៌ខ្មែរថែមទៀតផង ។
យ៉ាងណា រហូតមកទល់នាពេលនេះ នាងពិតជារំភើបខ្លាំង ព្រោះនេះគឺជាប្រទេសទីមួយ ដែលនាងមានឱកាសបានចេញទៅច្រៀង ហើយវាក៏បានបំពេញបំណងរបស់នាងដែលនាំយកសិល្បៈ វប្បធម៌ខ្មែរយកទៅបង្ហាញនៅលើឆាកអន្តរជាតិ ។
តារាចម្រៀងនាង ទេព បូព្រឹក្ស បានលើកឡើងបន្ថែមទៀតថា ការសម្រេចក្តីប្រាថ្នាជាបន្តបន្ទាប់នាពេលនេះ គឺដោយសារនាងបានការជួយជ្រោមជ្រែងពីក្រុមគ្រួសារ ជាពិសេស បណ្តាអ្នកគាំទ្រទាំងអស់របស់នាង ។
ជាការកត់សម្គាល់ កាលពីឆ្នាំ២០២១ កន្លងទៅ តារាចម្រៀងនាង ទេព បូព្រឹក្ស បានចេញជា MV បទ TOP OF THE LADY (វីរៈនារី) ដែលបទចម្រៀងនោះបានផលិតឡើង ដោយមានឈុតឆាកលើកតម្កើននូវកេរ្តិ៍មរតកដ៏មហិមានៃវប្បធម៌ខ្មែរ ជាពិសេស គឺបង្ហាញពីឥទ្ធិពល និងអំណាចដ៏អស្ចារ្យរបស់ស្ត្រី ។
បទចម្រៀងខាងលើ បានទទួលការកោតសរសើរយ៉ាងខ្លាំងពីសំណាក់មហាជន ព្រោះនាងបានចំណាយ លុយ៦០០លានរៀល ឬស្មើនឹងលុយជាង១៥ម៉ឺនដុល្លារ មកផលិត MV មួយនេះ ។
យ៉ាងណា បន្ទាប់ពីបានមើលវីដេអូចម្រៀងឈុតខ្លីរបស់ ទេព បូព្រឹក្ស ហើយមានអ្នកគាំទ្រជាច្រើន រួមទាំង K-POP បានបង្ហោះសារកោតសរសើរពីស្នាដៃ និងការលះបង់របស់នាង ៕
ចែករំលែកព័តមាននេះ