ទីក្រុងម៉ូស្គូ៖ ប្រទេសចំនួនបីនៅក្បែរៗគ្នាបានបរិហាររិះគន់យ៉ាងចាស់ដៃចំពោះផែនការសាងសង់ខែលការពារដែនអាកាសដ៏ទំនើបចុងក្រោយរបស់អាមេរិកឈ្មោះហ្គោលដឹនដូម (Golden Dome)។ ប្រទេសចិន កូរ៉េខាងជើង និងរុស្ស៊ីព្រួតគ្នារិះគន់ផែនការនេះ។ អ្នកនាំពាក្យក្រសួងការបរទេសរុស្ស៊ី លោកស្រីម៉ារីយ៉ា សាការ៉ូវ៉ា…
ទីក្រុងម៉ូស្គូ៖ ប្រទេសចំនួនបីនៅក្បែរៗគ្នាបានបរិហាររិះគន់យ៉ាងចាស់ដៃចំពោះផែនការសាងសង់ខែលការពារដែនអាកាសដ៏ទំនើបចុងក្រោយរបស់អាមេរិកឈ្មោះហ្គោលដឹនដូម (Golden Dome)។ ប្រទេសចិន កូរ៉េខាងជើង និងរុស្ស៊ីព្រួតគ្នារិះគន់ផែនការនេះ។ អ្នកនាំពាក្យក្រសួងការបរទេសរុស្ស៊ី លោកស្រីម៉ារីយ៉ា សាការ៉ូវ៉ា (Maria Zakharova) ចាត់ទុកហ្គោលដឹនដូមធ្វើឱ្យប៉ះពាល់យ៉ាងធ្ងន់ធ្ងរចំពោះបាតគ្រឹះនៃស្ថិរភាពពិភពលោកព្រោះវាជាប្រព័ន្ធដែលបូកបញ្ចូលគ្នានូវខែលការពារនៅលើដីទាំងអស់បញ្ជូនទិន្នន័យទៅមូលដ្ឋានធំដែលហោះសំកាងនៅក្នុងទីអវកាស។
កាលពីមុននេះ កូរ៉េខាងជើង និងប្រទេសចិនក៏បានបញ្ចេញប្រតិកម្មតបផងដែរ។ ប្រភពខ្លះបង្ហើបឱ្យដឹងថាផែនការរបស់លោកត្រាំបង្កើតឡើងដើម្បីទប់ទល់នឹងការគំរាមកំហែងពីសំណាក់ប្រទេសចិន និងរុស្ស៊ី។ កាលពីម្សិលមិញ ក្រសួងការបរទេសកូរ៉េខាងជើងរិះគន់ប្រព័ន្ធការពារនេះ និងចាត់ទុកថាវាជាផែនការដ៏គ្រោះថ្នាក់ដែលមានចរិតគំរាមកំហែងប្រទេសដទៃ។
កាលពីថ្ងៃទី២០ ខែឧសភា លោកត្រាំប្រកាសថាលោកបានជ្រើសរើសការគូសវាសប្លង់ (ឌីហ្សាញ) ដើម្បីស្ថាបនាខែលការពារហ្គោលដឹនដូមជាបណ្ដើរៗហើយ ហើយក៏បានជ្រើសរើសអ្នកដឹកនាំគម្រោងនេះរួចហើយដែរ។ គ្រាន់តែគិតត្រួសៗតែប៉ុណ្ណោះ ផែនការនេះត្រូវចំណាយថវិកា១៧៥ពាន់លានដុល្លារ ហើយត្រូវធ្វើឱ្យបានចប់សព្វគ្រប់ និងដាក់ឱ្យដំណើរការនៅចុងអាណត្តិដឹកនាំរបស់លោកនាដើមឆ្នាំ២០២៩។
របបក្រុងព្យុងយ៉ាងពន្លះវ៉ាស៊ីនតោនយ៉ាងចាស់ដៃ។ ទូរទស្សន៍កូរ៉េខាងជើង ខេស៊ីអឹនអេ (KCNA) ចាត់ទុកហ្គោលដឹនដូមជាផលិតផលនៃនយោបាយតម្កល់ផលប្រយោជន៍អាមេរិកជារឿងសំខាន់ទី១, ជាចរិតដែលគិតថាខ្លួនឯងធ្វើអ្វីក៏ត្រឹមត្រូវជានិច្ច, ជាចរិតច្រឡោងខាម និងជាចរិតអត្តនោម័ត-ផ្ដាច់ការ ធ្វើអ្វីទៅតាមចិត្តចង់ដោយមិនស្ដាប់យោបល់អ្នកដទៃ។ កូរ៉េខាងជើងចាត់ទុកថានេះជាការរៀបជើងព្រួលដើម្បីធ្វើសង្គ្រាមនុយក្លេអ៊ែរ។
នៅក្នុងសេណារីយោនេះ គោលដៅរបស់អាមេរិកក្នុងការស្ថាបនាហ្គោលដឹនដូមគឺដើម្បីពង្រឹងប្រព័ន្ធផ្កាយរណបរាប់រយគ្រឿងដែលកំពុងហោះហើរពេញផ្ទៃមេឃជុំវិញផែនដី។ ឧបករណ៍នេះបំពាក់ប្រព័ន្ធត្រួតពិនិត្យសឹនសឺ (censor) និងប្រព័ន្ធរ៉ាដាតាមចាប់ និងបាញ់កម្ទេចគ្រាប់មីស៊ីលដែលហោះចេញពីទីណាមួយនៃភពផែនដី។ ឧទាហរណ៍បាញ់ចេញពីប្រទេសចិន អ៊ីរ៉ង់ កូរ៉េខាងជើង ឬរុស្ស៊ីជាដើម។ ប្រទេសចិនបញ្ចេញប្រតិកម្មតបមុនគេ។ កាលពីសប្ដាហ៍មុន ចិនបង្ហាញការខ្វាយខ្វល់យ៉ាងខ្លាំង និងអំពាវនាវឱ្យទីក្រុងវ៉ាស៊ីនតោនបោះបង់ចោលផែនការនេះវិញ។ ខាងលើនេះជាការស្រង់ប្រភពពីយូអែសអេធូដេ (USA Today) និងប្រភពដទៃទៀត៕
ចែករំលែកព័តមាននេះ