ផលិតករភាពយន្តលោក លៀក លីដា បានបង្ហាញទស្សនៈដល់ឃើញផ្ទាល់ខ្លួនរបស់លោកថា វិស័យភាពយន្តកម្ពុជានឹងដើរថយក្រោយនៅក្នុងឆ្នាំ២០២៥នេះ បន្ទាប់ពីលោកមើលឃើញពីបញ្ហាប្រឈមមួយចំនួនដែលកំពុងកើតមាននៅក្នុងវិស័យមួយនេះ ។ លោកបញ្ជាក់ថា កត្តាដែលនាំឲ្យវិស័យភាពយន្តនៅកម្ពុជាដើរថយក្រោយនៅក្នុងឆ្នាំនេះ គឺដោយសារនៅមិនទាន់ឃើញសញ្ញាពីផលិតករណាមួយវិនិយោគផលិតរឿងធំៗ…
ផលិតករភាពយន្តលោក លៀក លីដា បានបង្ហាញទស្សនៈដល់ឃើញផ្ទាល់ខ្លួនរបស់លោកថា វិស័យភាពយន្តកម្ពុជានឹងដើរថយក្រោយនៅក្នុងឆ្នាំ២០២៥នេះ បន្ទាប់ពីលោកមើលឃើញពីបញ្ហាប្រឈមមួយចំនួនដែលកំពុងកើតមាននៅក្នុងវិស័យមួយនេះ ។
លោកបញ្ជាក់ថា កត្តាដែលនាំឲ្យវិស័យភាពយន្តនៅកម្ពុជាដើរថយក្រោយនៅក្នុងឆ្នាំនេះ គឺដោយសារនៅមិនទាន់ឃើញសញ្ញាពីផលិតករណាមួយវិនិយោគផលិតរឿងធំៗ និងមានស្តង់ដារសម្រាប់ក្រៅប្រទេស ក្នុងពេលដែលភាពយន្តបរទេសល្អកំពុងហូរចូលយ៉ាងច្រើននៅក្នុងឆ្នាំ២០២៥នេះ ។
លោក លៀក លីដា បានលើកឡើងតាមរយៈសំណេរបង្ហោះលើបណ្តាញសង្គមថា បើទោះបីជារឿ
ភ្លើងឆេះក្លឹបក្រោមដីទទួលបានជោគជ័យខ្លាំងក៏ដោយ ក៏ខ្ញុំនៅតែយល់ថា វិស័យភាពយន្តរបស់យើងក្នុងឆ្នាំ២០២៥ និងដើរថយក្រោយ ពីព្រោះខ្ញុំមិនទាន់ឃើញសញ្ញានៃផលិតករណាមួយដែលគ្រោងនឹងវិនិយោគផលិតរឿងធំៗ និងគម្រោងចំណាយស្តង់ដាសម្រាប់ទីផ្សារក្រៅប្រទេសឡើយ ។
តែខ្ញុំបែរជាឃើញកុនបរទេសយ៉ាងសម្បូរបែបបកប្រែយ៉ាងល្អចូលទីផ្សារយើងយ៉ាងច្រើនក្នុងឆ្នាំ២០២៥ នេះ សូមបងប្អូនផលិតករយើងរួមគ្នាដើម្បីផលិតកុនធំៗដែលមានស្តង់ដារត្រឹមត្រូវដែលអាចចូលទីផ្សារបរទេសបានត្រឹមត្រូវដោយមិនអៀនខ្មាស់🎬💚🇰🇭🙏សូមជូនពរ ផលិតករខ្មែរទាំងអស់ទទួលបានជោគជ័យ ។
ជាការកត់សម្គាល់ស្រដៀងនឹងការលើកឡើងខាងលើនេះ កន្លងមក ផលិតករលោក លៀក លីដា ក៏បានធ្វើការស្នើដល់ក្រសួងគួរពិចារណាកាត់បន្ថយភាពយន្តបរទេសនាំចូល ដើម្បីសង្គ្រោះភាពយន្តក្នុងស្រុកខណៈពេលការគាំទ្រភាពយន្តក្នុងស្រុកពីសំណាក់ទស្សនិកជនហាក់នៅមានកម្រិតនៅឡើយ។
ផលិតករភាពរូបនេះ បានលើកឡើងថា ក្នុងរយៈពេល៣ឆ្នាំងខាងមុខនេះ បើប្រសួងមិនចេញវិធានការទប់ស្កាត់ការបកប្រែ និងកាត់បន្ថយចំនួនភាពយន្តបរទេសទេ នោះវិស័យភាពយន្តជាតិ (រឿងចាក់តាមរោងកុន) នឹងអាចដួលសារជាថ្មី នេះបើយោងតាមបទពិសោធន៍របស់ខ្ញុំដែលជួបបញ្ហា និងដោះស្រាយបញ្ហាលើវិស័យនេះជាង១០ឆ្នាំ)។
លោកបញ្ជាក់ថា វាគ្មានប្រទេសណា ដែលមានរឿងបរទេសយកជាង៩០% នៃ market share ឯរឿងជាតិមានមិនដល់ ១០% នៃ market share ផងនោះ, សូមគិតមើលទៅ ។
ពាក់ព័ន្ធការលើកឡើងពីលោក លៀក លីដា ខាងលើនេះ កោះសន្តិភាពនៅមិនទាន់អាចស្វែងរកការបកស្រាយពីប្រធាននាយកដ្ឋានភាពយន្តនៃក្រសួងវប្បធម៌លោក ប៉ុក បូរ័ក្ស បាននៅឡើយទេ ក្នុងពេលដែលការសាកសួរមិនមានការឆ្លើយតប ។
យ៉ាងណា តាមរយៈបទសម្ភាសន៍ជាមួយអ្នកសារព័ត៌មានក្នុងស្រុកមួយ លោក ប៉ុក បូរ័ក្ស ធ្លាប់បានគូសបញ្ជាក់ថា ការបិទ ឬការកាត់បន្ថយការនាំចូលភាពយន្តបរទេសនោះ គឺមិនមែនជាបញ្ហាធំដែលនាំអោយភាពយន្តក្នុងស្រុកចុះខ្សោយនោះឡើយ ខណៈពេលភាពយន្តនៅក្នុងស្រុកបច្ចុប្បន្ន គឺការផលិតនៅមានកម្រិតនៅឡើយ។
ប្រធាននាយកដ្ឋានភាពយន្តរូបនេះបានលើកឡើងថា ទោះបីបិទការនាំចូលភាពយន្តបរទេស ក៏មិនប្រាកដថា ភាពយន្តខ្មែរខ្លាំងនោះដែរ។ លោកថា វិស័យភាពយន្តខ្មែរអាចរីចម្រើន និងមានការគាំទ្រពីមហាជន មិនមែនជាបញ្ហាយើងត្រូវបិទពីក្រៅនោះទេ ដោយនៅក្នុងវិស័យភាពយន្តមានធាតុផ្សំសំខាន់៤យ៉ាង គឺផលិតករភាពយន្តក្រុមហ៊ុនចែកចាយ រោងភាពយន្ត និងស្ថាននីយទូរទស្សន៍។ មិនមែនយើងបិទភាពយន្តបរទេស ហើយឱ្យយើងរីកចម្រើន១០០%នោះទេ។
យ៉ាងណា លោកទទួលស្គាល់ថា កាលណាយើងនាំចូលភាពយន្តបរទេសច្រើនពេក វាក៏មានបញ្ហាដូចគ្នា ព្រោះនៅក្នុងបរិបទយើងនៅខ្សោយ ដូច្នេះ យើងត្រូវការទប់ស្កាត់ខ្លះដែរ មិនអាចបណ្តោយពេកទេ ។
លោក ប៉ុក បូរក្ស បានលើកឡើងបន្ថែមថា ក្នុងសម័យបច្ចេកវិទ្យា ភាពយន្តបរទេសអាចចូលមកកម្ពុជាតាមរូបភាពជាច្រើន ដែលយើងពិបាកនឹងទប់ស្កាត់បានផងដែរ ដូច្នេះ យើងមានតែពង្រឹងខ្លួនឯងទេ ទើបជារឿងសំខាន់ដំបូងបំផុត។
បើតាមលោក ប៉ុក បូរក្ស កន្លងមក យើងមានការស្នើសុំទៅរដ្ឋាភិបាលឱ្យបន្ធូរបន្ធយលើការអនុវត្តន៍កាតព្វកិច្ចពន្ធមួយចំនួនដែលពាក់ព័ន្ធនឹងវិស័យភាពយន្តពន្ធលើការចាក់បញ្ចាំងពន្ធកាត់ទុកលើសេវាកម្មផ្សេងៗពន្ធលើចំណូលបៀវត្ស យើងបានធ្វើការងារទាំងនេះបានច្រើន និងការជំរុញទីផ្សារភាពយន្តខ្មែរទៅតាមបណ្តាខេត្តផងដែរ ដែលពីមុនយើងមានតែនៅតាមទីក្រុងប៉ុណ្ណោះ៕
ចែករំលែកព័តមាននេះ