សង្គ្រាមអ៊ុយក្រែន ៖ ក្នុងសន្និសីទសារព័ត៌មានមួយកាលពីថ្ងៃទី១៣មីនា អមដោយលោកអាឡិចសាន់ដ្រ៍លូកាឆេនកូប្រធានាធិបតីបេឡារុសជាសម្ព័ន្ធមិត្ត ប្រធានាធិបតីរុស្ស៊ី លោកវ្ល៉ាឌីមៀរពូទីនថ្លែងថា លោកគាំទ្រទាំងស្រុងបទឈប់បាញ់គ្នារយៈពេល៣០ថ្ងៃ នៅលើខ្សែរណសិរ្សអ៊ុយក្រែន បន្ទាប់ពីសំណើបែបនោះរបស់សមភាគីអាមេរិកលោកដូណាល់ត្រាំ។ ផ្ទុយទៅវិញលោកបានលើកពីការត្រៀមបំរុងមួយចំនួន។…
សង្គ្រាមអ៊ុយក្រែន ៖ ក្នុងសន្និសីទសារព័ត៌មានមួយកាលពីថ្ងៃទី១៣មីនា អមដោយលោកអាឡិចសាន់ដ្រ៍លូកាឆេនកូប្រធានាធិបតីបេឡារុសជាសម្ព័ន្ធមិត្ត ប្រធានាធិបតីរុស្ស៊ី លោកវ្ល៉ាឌីមៀរពូទីនថ្លែងថា លោកគាំទ្រទាំងស្រុងបទឈប់បាញ់គ្នារយៈពេល៣០ថ្ងៃ នៅលើខ្សែរណសិរ្សអ៊ុយក្រែន បន្ទាប់ពីសំណើបែបនោះរបស់សមភាគីអាមេរិកលោកដូណាល់ត្រាំ។
ផ្ទុយទៅវិញលោកបានលើកពីការត្រៀមបំរុងមួយចំនួន។ លោកថាប្រសិនបើយើងចូលក្នុងបទឈប់បាញ់គ្នា៣០ថ្ងៃ តើនោះមានន័យថាទាហានទាំងអស់ដែលមានវត្តមានអាចចាកចេញពីទីតាំងពួកគេដោយគ្មានការប្រយុទ្ធឬ? តើយើងត្រូវទុកឲ្យពួកគេចាកចេញទោះជាពួកគេប្រព្រឹត្តបទឧក្រិដ្ឋនានាឬ?តាមប្រមុខវិមានក្រឹមឡាំងនិងបន្ទាប់ពីរយៈពេល៣ឆ្នាំនៃសង្គ្រាម ការឈប់បាញ់គ្នាត្រូវតែឲ្យផលដើម្បីឲ្យទទួលបានសន្តិភាពស្ថិតស្ថេរមួយនិងលុបចោលឲ្យអស់នូវអ្វីៗដែលជាប្រភពនៃជម្លោះ។
លោកបន្តថាតើត្រូវធានាបែបណាដើម្បីកុំឲ្យសភាពការណ៍បែបនោះកើតមានទៀត? តើការត្រួតពិនិត្យនឹងត្រូវរៀបចំបែបណា? ទាំងអស់នេះដែលជាបញ្ហាចោទ។ យើងត្រូវនិយាយរឿងទាំងនោះជាមួយដៃគូអាមេរិក ហើយទាក់ទងតាមទូរស័ព្ទជាមួយលោកដូណាល់ត្រាំ។
លោកពូទីនអរគុណលោកត្រាំ
លោកពូទីននាថ្ងៃទី១៣មីនាបានសម្ដែងការអរគុណចំពោះលោកដូណាល់ត្រាំ ដែលបានខិតខំនិងយកចិត្តទុកដាក់ំខ្លាំងបំផុត ក្នុងការដោះស្រាយជម្លោះជាមួយអ៊ុយក្រែន។ ក្នុងសន្និសីទសារព័ត៌មានរួមជាមួយសមភាគីបេឡារុសលោកពូទីនបន្តថា ខ្ញុំសូមអរគុណលោកត្រាំដែលយកចិត្តទុកដាក់ក្នុងការជួយដោះស្រាយជម្លោះនោះ។ យើងមានអ្វីដែលត្រូវធ្វើជាច្រើន ហើយលោកក៏អរគុណផងដែរដល់ចិន ឥណ្ឌានិងប្រេស៊ីលដែលខិតខំចំំណាយពេលគិតគូពីរឿងនេះដែរ។ យើងសម្ដែងការដឹងគុណខ្ពស់បំផុត។ ការខិតខំប្រឹងប្រែងរបស់ពួកគេមានទិសដៅបញ្ឈប់សង្គ្រាមនិងការបាត់បង់ជីវិតមនុស្ស។
នៅសេតវិមានកន្លែងដែលលោកទទួលអគ្គលេខាធិការអូតង់ នាថ្ងៃទី១៣មីនា លោកត្រាំយល់ថា សេចក្ដីថ្លែងការណ៍របស់លោកពូទីនលើសំណើឈប់បាញ់គ្នាពិតជាចម្លើយស្ថាបនាតែមិនពេញលេញ។ លោកក៏ថាដែរបើសំណើនោះត្រូវបដិសេធវាពិតជាការខកចិត្ត៕
ចែករំលែកព័តមាននេះ