រាជធានីភ្នំពេញ ៖ ថ្ងៃទី១១ ខែមីនា ឆ្នាំ២០២៥ ជាថ្ងៃកំណើតចូលវ័យ១៣ឆ្នាំ ព្រះនាងជេនណា បានថ្លែងអំណរគុណដល់ទស្សនិកជនទាំងអស់ ដែលបានគាំទ្រព្រះលើការងារសិល្បៈនានាកន្លងមក ខណៈពេលដែលព្រះនាងបានសន្យាថា…
រាជធានីភ្នំពេញ ៖ ថ្ងៃទី១១ ខែមីនា ឆ្នាំ២០២៥ ជាថ្ងៃកំណើតចូលវ័យ១៣ឆ្នាំ ព្រះនាងជេនណា បានថ្លែងអំណរគុណដល់ទស្សនិកជនទាំងអស់ ដែលបានគាំទ្រព្រះលើការងារសិល្បៈនានាកន្លងមក ខណៈពេលដែលព្រះនាងបានសន្យាថា នឹងធ្វើដំណើរលើវិថីមួយនេះបន្តទៀត ដើម្បីបំរើឧត្តមប្រយោជន៍ជាតិ ។
ជាមួយរូបភាពជាច្រើនសន្លឹកដែលបានរចនាម៉ូដរ៉ូបជាមួយរូបផ្ការំដួលតំណាងនៅប្រទេសកម្ពុជាក្នុងថ្ងៃពិសេសបង្ហោះលើបណ្តាញសង្គម ព្រះនាង ជេនណា បានភ្ជាប់ជាមួយនឹងសំណេរថា 🎂ថ្ងៃដ៏ពិសេសនេះ ខ្ញុំរីករាយណាស់ គ្មានអ្វីក្រៅពីអរព្រះគុណព្រះមាតាខ្ញុំ ដែលបានបង្កើតនិងថែរក្សាការពារខ្ញុំ ពិសេស សម្តេចតាក្រុមព្រះ ដែលតែងតែអប់រំទូន្មានចៅគ្រប់នាទី ។ 🙏🏻
ទន្ទឹមនេះ ការចម្រើនវ័យក៏ជាពេលដ៏រីករាយដោយខ្ញុំមានសេចក្តីសុខប្រកបដោយស្នាមញញឹមកើតឡើងពីការគាំទ្រពីសំណាក់ពុកម៉ែបងប្អូនដែលស្រឡាញ់រាប់អាន និងគាំទ្រកិច្ចការងារសិល្បៈរបស់ខ្ញុំ ។
ព្រះនាងបញ្ជាក់ថា 🙏ខ្ញុំនឹងធ្វើដំណើរលើវិថីសិល្បៈដែលខ្ញុំស្រឡាញ់ ដើម្បីបំរើឧត្តមប្រយោជន៍ជាតិនិងពុកម៉ែបងប្អូនទាំងអស់គ្នាជាបន្តទៀត! ។
ព្រះនាងនរោត្ដម ជេនណា ប្រសូតនៅថ្ងៃទី១១ ខែមីនា ឆ្នាំ ២០១២ គឺជាសមាជិកនៃ ព្រះរាជវង្សានុវង្សកម្ពុជា ដោយព្រះនាងជាបុត្រីទីពីររបស់ព្រះបាទនរោត្តម បុប្ផារី និងជាចៅស្រីរបស់អតីតព្រះមហាក្សត្រ នរោត្តម សីហនុ ព្រះបរមរតនៈកោដ្ឋ ។
បិតារបស់ព្រះនាងជាជនជាតិបារាំង ដោយក្រុមគ្រួសារបានផ្លាស់មករស់នៅព្រះរាជាណាចក្រកម្ពុជាវិញនៅពេលដែលព្រះនាងមានវ័យ៣ឆ្នាំ ។ ព្រះនាងអាចចេះប្រាំភាសាដូចជា ភាសាបារាំង ខ្មែរ ថៃ ចិន និងអង់គ្លេស ហើយព្រះនាងវ័យក្មេងចូលចិត្ត និងតែងតែមានទំនោរទៅរកតន្ត្រី ព្រះនាងក៏បានធ្វើជាតារាសម្តែងតារាចម្រៀង អ្នករាំរបាំ និងអ្នកបង្ហាញម៉ូតតាំងពីពេលព្រះនាងវ័យ៦ឆ្នាំមកម្ល៉េះ ខណះពេលព្រះនាងជេនណា អាចច្រៀងបានគ្រប់ប្រាំភាសាដែលព្រះនាងបានរៀនផងដែរ ។
ក្នុងដំណើរលើវិថីសិល្បៈ ព្រះនាង ជេនណា បានបង្ហាញវត្តមានសម្តែង និងច្រៀងនៅក្នុងកម្មវិធីធំៗជាបន្តបន្ទាប់មិនថា កម្មវិធីថ្នាក់ជាតិ និងអន្តរជាតិនោះឡើយ ជាពិសសេសនោះព្រះនាងក៏ត្រូវបានការអញ្ជើញជាពិសេសនៅក្នុងសម្តែង និងច្រៀងក្នុងកម្មវិធីនានាក្នុងប្រទេសចិននាពេលកន្លងមកដែរ ។
ក្រៅពីការច្រៀង ព្រះនាងជេនណា ក៏ធ្លាប់បានចូលរួមសម្តែងភាពយន្តភាគទូរទស្សន៍ និងភាពយន្តខ្នាតធំផងដែរ ដោយនៅក្នុងនោះមានរឿង ទេពធីតាព្កុលមាស និងរឿង នគរមាស ដែលបានចាក់ផ្សាយតាមកញ្ចក់ទូរទស្សន៍ CTN និងរឿង បណ្តាសានាងរាត្រី ដែលផលិតឡើងដោយផលិតកម្ម LD ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ