រហូតមកទល់ពេលនេះ តារាចម្រៀង គឺអនាង ទូច ស៊ុននិច នៅតែចញ្ចឹមចិត្តនឹងវិលមកឆាកតន្ត្រីជាថ្មីឡើងវិញ ក្នុងអំឡុងពេលដែលស្ថានភាពសុខភាពរបស់នាងកាន់តែល្អប្រសើរ ។ បើទោះបីជាកំពុងសម្រាកព្យាបាលនៅឯក្រៅប្រទេសក៏ដោយ ប៉ុន្តែជារឿយៗ…
រហូតមកទល់ពេលនេះ តារាចម្រៀង គឺអនាង ទូច ស៊ុននិច នៅតែចញ្ចឹមចិត្តនឹងវិលមកឆាកតន្ត្រីជាថ្មីឡើងវិញ ក្នុងអំឡុងពេលដែលស្ថានភាពសុខភាពរបស់នាងកាន់តែល្អប្រសើរ ។
បើទោះបីជាកំពុងសម្រាកព្យាបាលនៅឯក្រៅប្រទេសក៏ដោយ ប៉ុន្តែជារឿយៗ ទូច ស៊ុន នៅតែរំលឹកពីអនុស្សាវរិយ៍ចាស់ៗរបស់ខ្លួនតាមរយៈរូបភាព និងវីដេអូកាលពេលដែលនាងកំពុងប្រឡូកក្នុងអាជីពចម្រៀងខណៈពេលដែលនាងក៏បានសម្តែងការនឹករលឹកមកកាន់ទស្សនិកជន ដែលធ្លាប់គាំទ្ររូបនាងផងដែរ ។
ឆ្លើយតបទៅកាន់ការនឹករលឹកពីមហាជន និងការរំពឹងចង់ឃើញនាងត្រឡប់មកច្រៀងជាថ្មីឡើងវិញនោះ ទូច ស៊ុននិច បានខិតខំតស៊ូព្យាបាល និងថែសុខភាពអោយបានល្អ ក្នុងក្តីសង្ឃឹមថា អំឡុងពេលណាមួយនាងនឹងវិលមកឆាកតន្ត្រីជាថ្មីឡើងវិញ ។
ក្នុងន័យនេះ តារាចម្រៀងនាង ទូច ស៊ុននិច បានរំលេចនូវរូបភាពមួយសន្លឹកចាស់មួយសន្លឹកក្នុងអំឡុងពេលនាងបានចូលរួមច្រៀងនៅក្នុងមង្គលការបងប្អូនខ្មែរយើងនៅលើទឹកដីអាមេរិក ដោយអមជាមួយសំណេរបង្ហោះលើបណ្តាញសង្គមថា ថ្ងៃនេះថ្ងៃល្អ សូមអោយនាងខ្ញុំមានសុខភាពល្អហើយឆាប់បានធ្វើ concert ដើម្បីច្រៀងជូនបងប្អូនទស្សនាស្ដាប់កំសាន្តឆាប់ៗៗនេះ សូមអោយបងប្អូនទាំងអស់គ្នាប្រាថ្នាអ្វីៗសូមអោយបានសម្រេចដូចក្ដីបំណង រូបថតអនុស្សាវរីយ៍ទៅច្រៀងខួបអាពាហ៍ពិពាហ៍បងស្រីនៅ Stockton, California USA. ស្រលាញ់បងប្អូនទាំងអស់គ្នា ។
តាមរយៈការបង្ហោះខាងលើនេះ គេបានឃើញទស្សនិចជនជាច្រើនបាននាំគ្នាចូលទៅខំមិនពីក្រោយអ្វីដែល ទូច ស៊ុននិច បានបង្ហោះដោយម្នាក់ៗបានជូនពរអោយនាងឆាប់ជាសះស្បើយ និងបង្ហាញក្តីរំពឹងថា តារាចម្រៀងរូបនេះនឹងអាចឡើងឆាកតន្ត្រី និងបកស្រាយចម្រៀងជាថ្នីឡើងវិញឆាប់ៗនេះ ។
ជាការកត់សម្គាល់ នេះមិនមែនជាលើកទីមួយទេដែនាង ទូច ស៊ុននិច បានបង្ហាញបំណងពីការវិលមកឆាកចម្រៀងជាថ្មី នៅក្នុងអំឡុងពេលណាមួយ បើទោះបីជាកំពុងសម្រាកព្យាបាលជំងឺនៅឯបរទេសក៏ដោយ ។ ទូច ស៊ុននិច តែងតែបង្ហាញនូវគោលបំណងមួយនេះតាមរយៈការបង្ហោះសកម្មភាពសម្តែងច្រៀងរាំកាលពីអតីតកាលរបស់នាង ។
ជាមួយនឹងការបង្ហោះរូបភាពចាស់ៗនេះដែរ ទូច ស៊ុននិច ក៏បានសម្តែងពីការនឹករលឹកមកកាន់បងប្អូនប្រជាពលរដ្ឋខ្មែរផងដែរ ។ ដោយឡែក កាលពីពេលកន្លងទៅ អតីតតារាចម្រៀងដ៏ល្បីល្បាញនាង ទូច ស៊ុននិច បានបង្ហាញអារម្មណ៍ចង់វិលមកមាតុប្រទេសជាថ្មី នៅក្នុងអំឡុងពេលណាមួយផងដែរ ។
ទូច ស៊ុន ហាក់មានការនឹករលឹកមកដល់ប្រទេសកម្ពុជា ជាពិសេសខេត្តសៀមរាប ដែលមានប្រាសាទអង្គរវត្ត ដែលនាងធ្លាប់មានអនស្សាវរីយ៍កាលពីប៉ុន្មានឆ្នាំកន្លងទៅ ដែលនាងបានសម្តែងច្រៀងនៅទីនោះ។
ជាក់ស្តែង កាលពីពេលកន្លងទៅ ទូច ស៊ុននិច បានបង្ហោះសារតាមគណនីហ្វេសប៊ុករបស់ខ្លួនដោយភ្ជាប់ជាមួយរូបថតកាលពីអតីតកាលនៅលើទឹកដីអច្ឆរិយថា រូបថតអនុស្សាវរីយ៍កាលពីឆ្នាំ២០០២ពេលដែលនាងខ្ញុំទៅសំដែង concert នៅខេត្តសៀមរាប ហើយឆ្លៀតពេល ក្រុមគ្រួសារខ្ញុំមានលោកប៉ាអ្នកម៉ាក់ប្អូនប្រុសនិងនាងខ្ញុំបានទៅទស្សនាកំសាន្តនៅតាមប្រាសាទបុរាណដ៏អច្ឆៈរិយៈ ដែលជាកេរ្ដិ៍តំណែលរបស់បុព្វបុរសខ្មែរយើងបន្សល់ទុកអោយ។
នាងបញ្ជាក់ថា នាងខ្ញុំស្រលាញ់និងនឹករលឹកទៅដល់ទឹកដីសុវណ្ណភូមិខ្មែរជានិច្ច ហើយថ្ងៃណាមួយនាងខ្ញុំនឹងទៅគោរពសក្ការៈ និងបានដើរទស្សនានៅតាមប្រាសាទបុរាណដ៏អច្ឆៈរិយៈដែលជាកេរ្ដិ៍តំណែលរបស់បុព្វបុរសខ្មែរយើងវិញទៀតជាក់ជាមិនខាន ។
គួរបញ្ជាក់ថា បច្ចុប្បន្ន តារាចម្រៀងនាង ទូច ស៊ុននិច បាននឹងកំពុងសម្រាកព្យាបាលជំងឺរបស់នាងនៅទឹកដីអាមេរិក ។ នាងបានធ្លាក់ខ្លួនពិការសម្រាកតែនៅលើគ្រែក្នុងផ្ទះរបស់នាង ក្នុងទីក្រុង Sacramento នៃរដ្ឋCalifornia សហរដ្ឋអាមេរិកអស់ជាច្រើនឆ្នាំ ក្រោមការមើលថែពីឪពុករបស់
នាង ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ