រាជធានីភ្នំពេញ ៖ មហាជន ជាពិសេសបណ្តាអ្នកលេងបណ្តាញសង្គម បានសម្តែងការភ្ញាក់ផ្អើលយ៉ាងខ្លាំង ក្នុងពេលដែលគេបានឃើញមានការបង្ហោះពីតារាសម្តែង លោក ប៉ែន ចាន់សិទ្ធិ បានទទួលមរណភាពហើយនៅថ្ងៃទី០៣…
រាជធានីភ្នំពេញ ៖ មហាជន ជាពិសេសបណ្តាអ្នកលេងបណ្តាញសង្គម បានសម្តែងការភ្ញាក់ផ្អើលយ៉ាងខ្លាំង ក្នុងពេលដែលគេបានឃើញមានការបង្ហោះពីតារាសម្តែង លោក ប៉ែន ចាន់សិទ្ធិ បានទទួលមរណភាពហើយនៅថ្ងៃទី០៣ មីនា ២០២៥ នេះ ។
អតីតតារាសម្តែង លោក ថៃ នរៈពិទូ បានបង្ហោះរូបភាពរបស់ ប៉ែន ចាន់សិទ្ធិ ដោយភ្ជាប់ជាមួយសំណេរថាសូមប្អូនទៅអោយបានសុខ កើតជាតិក្រោយ សូមកុំអោយ អភ័ព្វ ដូចជាតិនេះ ទៀត 😔😔😔 RIP ។
យ៉ាងណា ភ្លាមៗនោះគេនៅមិនទាន់បានដឹងច្បាស់ទេថា លោក ប៉ែន ចាន់សិទ្ធិ បានទទួលមរណភាពដោយសារអ្វី ខណៈពេលដែលមហាជនមានការសាកសួរទៅកាន់លោក ថៃ នរៈពិទូ តែមិនទាន់មានការឆ្លើយតប ។ បើតាមប្រភពចុងក្រោយ ពីលោកអ៊ឹម ជីវ៉ា បានប្រាប់ថា «ដោយសាររោគាពាធ» ។
ទោះជាយ៉ាងណា ដំណឹងពីមរណភាពរបស់តារាសម្តែងលោក ប៉ែន ចាន់សិទ្ធិ នេះ បានក្លាយជាដំណឹងដ៏រន្ធត់មួយសម្រាប់អ្នកសិល្បៈ និងអ្នកគាំទ្រ ក្នុងពេលដែលលោកធ្លាប់បង្ហាញខ្លួនសម្តែងជាបន្តបន្ទាប់ ទើបតែបាត់មុខមួយរយៈពេលប៉ុណ្ណោះ ។
ជាការកត់សម្គាល់នៅមុនពេលដែលទទួលមរណភាពនាពេលនេះតារាសម្តែងលោក ប៉ែន ចាន់សិទ្ធិ បានធ្វើឲ្យមហាជនមានកាភ្ញាក់ផ្អើលខ្លាំង ដោយសារតែលោកបានធ្លាក់ខ្លួនស្គមស្លេកស្លាំងខ្លាំង ដោយខុសប្លែកពីរូបរាងពីមុន ។
ការធ្លាក់ខ្លួនស្គមខុសពីធម្មតារបស់តារាសម្តែងរូបនេះ មិនត្រូវបានប្រភពណាមួយបញ្ជាក់ថា ដោយសារអ្វីនោះឡើយ ប៉ុន្តែគេបានដាក់ការសង្ស័យថា តារារូបនេះទំនងជាមានបញ្ហាសុខភាព ឬក៏មានជំងឺប្រចាំកាយដែលនាំឲ្យលោកធ្លាក់ខ្លួនស្គមបែបនេះ ។
យ៉ាងណា ការទទួលមរណភាពរបស់លោក ប៉ែន ចាន់សិទ្ធិ នាពេលនេះ គេឃើញមានអ្នកសិល្បៈជាបន្តបន្ទាប់ បានបង្ហោះសារចូលរួមរំលែកទុក្ខចំពោះក្រុមគ្រួសារលោក និងសូមអោយវិញ្ញាណខន្ឌរបស់លោកទៅកាន់សុគិតភព ។
គួរបញ្ជាក់ថា លោក ប៉ែន ចាន់សិទ្ធិ គឺជាអតីត Freshie Boy ចំណាត់ថ្នាក់លេខ១ ក្នុងឆ្នាំ ២០០៩ ហើយលោកក៏បានវិវត្តន៍ខ្លួនមកជាតារាសម្តែង និងបានចូលរួមសម្តែងភាពយន្តជាបន្តបន្ទាប់ផងដែរ នៅមុនពេលលោកបានបាត់មុខពីសិល្បៈក្នុងរយៈពេលប៉ុន្មានឆ្នាំចុងក្រោយនេះ ។
ទោះជាយ៉ាង បើទោះបីជាបានបាត់វត្តមានសម្តែងក៏ពិតមែន ប៉ុន្តែលោកក៏ត្រូវបានគេដឹងថា លោកបានក្លាយជា BA ផលិតផលល្បីៗមួយចំនួន ហើយជារឿយៗលោកក៏តែងតែបង្ហាញវីដេអូផ្សព្វផ្សាយផលិតផលគ្រឿងសម្អាងផងដែរ ៕
ចែករំលែកព័តមាននេះ