រាជធានីភ្នំពេញ ៖ ពិធីករលោក តាប៊ុយ និងតារាសម្តែងអ្នកនាង ចន ច័ន្ទលក្ខិណា បានបង្ហាញដូចគ្នាពីការឆ្អែតចិត្តចំពោះភាពខ្មើតរបស់អ្នកសិល្បៈមួយចំនួន ដែលខ្លួនបានជួប អំឡុងពេលចូលរួមជួបជុំកម្មវិធីអ្នកសិល្បៈម្តងៗ…
រាជធានីភ្នំពេញ ៖ ពិធីករលោក តាប៊ុយ និងតារាសម្តែងអ្នកនាង ចន ច័ន្ទលក្ខិណា បានបង្ហាញដូចគ្នាពីការឆ្អែតចិត្តចំពោះភាពខ្មើតរបស់អ្នកសិល្បៈមួយចំនួន ដែលខ្លួនបានជួប អំឡុងពេលចូលរួមជួបជុំកម្មវិធីអ្នកសិល្បៈម្តងៗ ។ អ្នកទាំងពីរបានចាត់ទុកទង្វើនេះ គឺការមិនអោយតម្លៃគ្នា បើទោះបីធ្លាប់ស្និតស្នាលគ្នាពីមុនក៏ដោយ ខណៈពេលការរាប់អានគ្នាកន្លងមក គឺដើម្បីតែផលប្រយោជន៍ ។
ពិធីករលោក តាប៊ុយ បានលើកឡើងតាមរយៈសំណេរបង្ហោះលើបណ្តាញសង្គមថា ម្សិលមិញបានចូលរួមកម្មវិធីសម្ភោធអគារថ្មី របស់សមាគមសិល្បៈករខ្មែរ ហើយមានតារាច្រើនមែនទែន បានចូលរួម ហើយក៏បានជួបតារាដែលធ្លាប់តែស្និទ្ធិស្នាល តែគេធ្វើសឹងតែមិនឃើញយើងពិសេសទឹកមុខ ។
លោកបញ្ជាក់ថា ក្នុងចិត្តដូចគេធ្លាប់ប្រាប់មែន ពេលយើងមានប្រយោជន៍អោយគេ គឺគេមកអែបអបហើយ ពេលយើងគ្មានប្រយោជន៍ គឺគេលេងទឹកមុខដាក់ហើយ សំខាន់មនុស្សដែលល្អដាក់គ្នាសោះមិនដែលមានរឿងទេ តែមកជួបចឹង ។
ដោយឡែក ក្រោយឃើញការលើកឡើងពីតាប៊ុយ នាពេលនេះតារាសម្តែង និងអតីតប្រធានសមាគមសិល្បៈករខ្មែរអ្នកនាង ចន ច័ន្ទលក្ខិណា ក៏បានចែកចាយបន្តដោយភ្ជាប់ជាមួយសំណេរផ្ទាល់ខ្លួនថា ជួបឆ្អែតហើយ ហើយក៏ជាមូលហេតុដែលខ្ញុំកាត់បន្ថយការចូលរួមកម្មវិធីសិល្បៈមួយចំនួនធំលែងយកចិត្តយកបេះដូងទៅប្រើទៀតហើយ ។
អ្នកនាងថា ខ្ញុំដើរផ្លូវផ្សេងដោយស្ងៀមស្ងាត់ លែងដឹងលឺអ្វីទាំងអស់ អ្នកណាមកទូលពិតរាយការណ៌អ្វីក៏ខ្ញុំមិនយកខ្លួនទៅពាក់ព័ន្ធដែរ អ្នកណាមានការអី ឬមានបញ្ហាអី រកវិធីដោះស្រាយដោយខ្លួនឯងទៅដល់ពេលដែលខ្ញុំធ្វើមនុស្សអាត្មានិយមម្តង ។ អ្នកនាងបញ្ជក់ថា ប្រឹងរកស៊ីអោយខ្លួនឯងកាន់តែរីកចម្រើន ជួយមនុស្សអោយចំគោលដៅ ។
ជាការកត់សម្គាល់ ចាត់ទុកថា នេះមិនមែនជាលើកទីមួយទេដែលមានអ្នកសិល្បៈបានលើកឡើងពីភាពខ្មើតរបស់អ្នកសិល្បៈដូចគ្នា ពោលកន្លងមក តារាពហុជំនាញក៏ធ្លាប់បានលើកឡើងពីរឿងរ៉ាវស្រដៀងគ្នានេះផងដែរ ។
អ្នកនាង ខាត់ សុឃីម ធ្លាប់បានលើកឡើងថា អ្នកសិល្បៈសម័យនេះហាក់មានការបែងចែកផែនគ្នា ដូចទឹក និងប្រេង ខណៈពេលនាងគិតថា ទង្វើនេះមិនបានធ្វើអោយសិល្បៈមានការរីកចម្រើននោះឡើយ ។
អ្នកនាង ខាត់ សុឃីម បានលើកឡើងតាមរយៈសំណេរដែលបង្ហោះលើបណ្តាញសង្គមថា ខ្ញុំគិតថា សិល្បៈខ្មែរ គឺចែកផែនគ្នានៅដូចទឹក និងប្រេង គ្មានរីកចម្រើនអីទេបើយ៉ាងនឹង ។ អ្នកនាងហាក់ហួសចិត្ត ព្រោះនាងបានជួបអ្នកសិល្បៈទាំងចាស់ ទាំងថ្មី និងគ្រប់វិស័យ មើលទៅដូចជា មិនមែនសិល្បៈរួមប្រទេសតែមួយ ពោល គឺមានការបែកចែកជាក្រុម ជាបក្ស ។
អ្នកនាងថា ជាឧទាហរណ៍ដូចអ្នកសិល្បៈបែបមរតកដើម គឺនៅតែក្រុមនឹងទៅ ហើយអ្នកសិល្បៈថ្មីដែលល្បីៗ គឺគេនៅតែគ្នាគេ ខណៈពេលអ្នកដើរម៉ូតបវរកញ្ញា និងតារាសម្តែង គឺគេនៅតែក្រុមគ្នាគេចឹងដែរទៅ មើលទៅដូចជា បែកចែកគ្នាដូចទឹក និងប្រេង ហើយធ្វើចឹងធ្វើអី វារីកចម្រើនទៅណា ។
អ្នកនាងបញ្ជាក់ថា នាងរស់នៅជាមួយសិល្បៈនេះយូរឆ្នាំហើយ ពោលតាំងពីក្មេង ហើយពីដើមមក នាងមើលឃើញអ្នកសិល្បៈចេះស្រឡាញ់គ្នាណាស់ ទោះស្គាល់ ឬមិនស្គាល់គ្នាក៏ដោយ ប៉ុន្តែពួកគាត់ព្យាយាមរាប់អានគ្នាណាស់ ព្រោះវាស្ថិតក្នុងចង្កោមសិល្បៈដូចគ្នា ។
អ្នកនាងបន្តថា ចំឡែកតែអ្នកសិល្បៈជំនាន់នេះមួយចំនួនតូច គឺខុសប្លែក ពេលជួបរៀមច្បងសិល្បៈចាស់ៗមិនសូវរាក់ទាក់ ទោះបីមិនបានជម្រាបសួរ សូម្បីញញឹមដាក់បន្តិចក៏គ្មាន ។
យ៉ាងណា អ្នកនាង ខាត់ សុឃីម បានសំណូមពរសូមអោយប្អូនៗអ្នកសិល្បៈជំនាន់ក្រោយត្រូវចេះស្រឡាញ់គ្នា និងរាប់អានគ្នា និងផ្តល់ស្នាមញញឹម និងការរាក់ទាក់ចំពោះអ្នកសិល្បៈរៀមច្បងផងព្រោះគ្រាន់តែកាយវិការ និងទឹកចិត្តប៉ុណ្នឹង គឺវាមិនអស់ថវិកាឡើយ ៕
ចែករំលែកព័តមាននេះ