ខេត្តបាត់ដំបង ៖ អគ្គិភ័យដែលគេរកមិនឃើញមូលហេតុ បានឆេះរាលដាលព្រៃនៅក្បែរផ្លូវឡើងទៅកាន់ អាស្រមគិរីរម្យ លើខ្នងភ្នំសំពៅ បង្កឲ្យមានការភ្ញាក់ផ្អើលទាំងសមត្ថកិច្ចទាំងព្រះសង្ឃនៅវេលាម៉ោងប្រមាណ៧យប់ថ្ងៃទី០៦ កុម្ភ: ដែលជាផ្នែកមួយនៃតំបន់រមណីយដ្ឋានភ្នំសំពៅ ស្ថិតនៅឃុំភ្នំសំពៅ…
ខេត្តបាត់ដំបង ៖ អគ្គិភ័យដែលគេរកមិនឃើញមូលហេតុ បានឆេះរាលដាលព្រៃនៅក្បែរផ្លូវឡើងទៅកាន់ អាស្រមគិរីរម្យ លើខ្នងភ្នំសំពៅ បង្កឲ្យមានការភ្ញាក់ផ្អើលទាំងសមត្ថកិច្ចទាំងព្រះសង្ឃនៅវេលាម៉ោងប្រមាណ៧យប់ថ្ងៃទី០៦ កុម្ភ: ដែលជាផ្នែកមួយនៃតំបន់រមណីយដ្ឋានភ្នំសំពៅ ស្ថិតនៅឃុំភ្នំសំពៅ ស្រុកបាណន់ តែត្រូវកម្លាំងចម្រុះមានព្រះសង្ឃផងចូលវាយពន្លត់ និងទប់ស្កាត់មិនឲ្យឆេះរាលដាលបន្តបាននាប៉ុន្មានម៉ោងក្រោយ ។
សេចក្ដីរាយការណ៍ពីទីតាំងកើតហេតុបានឲ្យដឹងថា អគ្គិភ័យនេះបានឆេះ០២កន្លែងក្នុងពេលតែមួយ នៅជុំវិញ «អាស្រមគិរីរម្យ» ។ កម្លាំងសមត្ថកិច្ច កម្លាំងប្រជាការពារក្នុងមូលដ្ឋាន និងប្រជាពលរដ្ឋ រួមទាំងព្រះសង្ឃដែលគង់នៅអាស្រមគិរីរម្យផងប្រមាណជិត២០នាក់/អង្គ បានព្រួតគ្នាប្រើកម្លាំងបាយវាយពន្លត់ដោយមេកឈើ ខណ:រថយន្តពន្លត់អគ្គិភ័យរបស់សមត្ថកិច្ចមិនអាចបើកឡើងលើភ្នំ ដើម្បីជួយអន្តរាគមន៍បាន ។ បើតាមក្រុមចូលប្រយុទ្ធជាមួយភ្លើងព្រៃនេះបានឲ្យដឹងថា ក្នុងចំណោមអគ្គិភ័យឆេះព្រៃលើភ្នំទាំង០២កន្លែងខាងលើនេះ មួយកន្លែងត្រូវវាយពន្លត់បានភ្លាមៗ តែមួយកន្លែងទៀត ហាក់ពិបាកបន្តិចក្នុងការចូលវាយពន្លត់។
ប៉ុន្តែបើតាមលោក រឿម រាំង អធិការរងទទូលបន្ទុកផ្នែកអគ្គីភ័យបានប្រាប់ថា អគ្គិភ័យនោះត្រូវបានកម្លាំងចម្រុះប្រើកម្លាំងបាយវាយពន្លត់ និងគ្រប់គ្រងបានទាំងស្រុងនាប៉ុន្មានម៉ោងក្រោយមក ។ លោក រឿម រាំង បានបញ្ជាក់ថា នៅព្រឹកថ្ងៃទី០៧ កុម្ភ: នេះ លោកមិនបានចុះទៅពិនិត្យកន្លែងកើតហេតុទេ តែមន្ត្រីមូលដ្ឋានបានពិនិត្យ ក្រែងមានអគ្គីភ័យនៅសេសសល់ ។ ប៉ុន្តែលោកថា រហូតមកដល់ពេលនេះ យើងមិនទាន់ដឹងពីមូលហេតុ ដែលបង្កឲ្យមានអគ្គិភ័យឆាបឆេះព្រៃនៅក្បែរ«អាស្រមគិរីរម្យ» ដែលជាតំបន់«រមណីយដ្ឋានប្រវត្តិសាស្ត្រ ភ្នំសំពៅ» ដ៏ល្បីល្បាញនោះនៅឡើយទេ ។
សូមបញ្ជាក់ថា ប៉ុន្មានថ្ងៃកន្លងមកនេះ ភ្លើងព្រៃដែលគ្មានប្រភពច្បាស់លាស់បានឆេះព្រៃលើកំពូលភ្នំចំនួន០៣លើកជាបន្តបន្ទាប់នៅក្នុងស្រុកបាណន់ តែសមត្ថកិច្ចនៅតែរកមូលហេតុមិនទាន់ឃើញនៅឡើយ។ លើកទី១ ឆេះរាលដាលព្រៃនៅលើកំពូលភ្នំក្ដោង ស្ថិតនៅប៉ែកខាងត្បូងភ្នំសំពៅ លើកទី២ ឆេះរាលដាលព្រៃនៅលើភ្នំជីហង្ស ដែលស្ថិតនៅប៉ែកខាងលិចភ្នំប្រាសាទបាណន់ និង លើកទី៣នេះ ភ្លើងបានរាលដាលព្រៃនៅក្បែរ អាស្រមគិរីរម្យ ស្ថិតនៅជាប់រមណីយដ្ឋានភ្នំសំពៅ ក្នុងឃុំភ្នំសំពៅ ស្រុកបាណន់ ប៉ុន្តែត្រូវបានកន្លងសមត្ថកិច្ច និង ប្រជាពលរដ្ឋ ជួយអន្តរាគមន៏ទប់ស្កាត់ និង គ្រប់គ្រងបានទាន់ពេលវេលា៕
ចែករំលែកព័តមាននេះ