រាជធានីភ្នំពេញ ៖ ប្រធាននាយកដ្ឋានភាពយន្តនៃក្រសួងវប្បធម៌ និងវិចិត្រសិល្បៈ លោក ប៉ុក បូរក្ស បានអះអាងថា ខាងនាយកដ្ឋានរបស់លោកនឹងចូលរួមដោះស្រាយសម្របសម្រួលជុំវិញវិវាទរឿងលុយជំពាក់រវាងអ្នកសិល្បៈ និងផលិតករមួយចំនួន…
រាជធានីភ្នំពេញ ៖ ប្រធាននាយកដ្ឋានភាពយន្តនៃក្រសួងវប្បធម៌ និងវិចិត្រសិល្បៈ លោក ប៉ុក បូរក្ស បានអះអាងថា ខាងនាយកដ្ឋានរបស់លោកនឹងចូលរួមដោះស្រាយសម្របសម្រួលជុំវិញវិវាទរឿងលុយជំពាក់រវាងអ្នកសិល្បៈ និងផលិតករមួយចំនួន ក្នុងករណីដែលមានសំណើរពីគ្រប់ភាគីពាក់ព័ន្ធ ។
លោក ប៉ុក បូរក្ស បានអះអាងប្រាប់កោះសន្តិភាពថា ក្នុងរយៈពេលថ្មីៗនេះ លោកក៏បានឃើញពីការផ្សព្វផ្សាយជុំវិញរឿងនេះដែរ ប៉ុន្តែជាផ្លូវការលោកនៅមិនទាន់បានទទួលពីការរំលោទកិច្ចសន្យានោះយ៉ាងដូចម្តេច ហើយពីផលិតករណាឲ្យបានច្បាស់លាស់ ហេតុដូចនេះ លោកមិនទាន់មានព័ត៌មានជាក់លាក់ ដើម្បីចូលខ្លួនជួយសម្របសម្រួលនោះឡើយ ។
លោកបញ្ជាក់ថា ក្នុងនាម នាយកដ្ឋានយើងអាចធ្វើការសម្របសម្រួលបាន ក្នុងករណីដែលមានសំណើពីខាងពួកគាត់មក ប៉ុន្តែករណីនេះ គឺជាករណីនៃកិច្ចសន្យារវាងបុគ្គលទាំងពីរពោលរវាងផលិតករ និងអ្នកសិល្បៈ ។
លោកថា ក្នុងនាមប្រធាននាយកដ្ឋាន ខ្ញុំអាចធ្វើការសម្របសម្រួលបាន ដោយពិនិត្យទៅលើកិច្ចសន្យារវាងភាគីទាំងសងខាង តែដោយឡែកផ្លូវច្បាប់លើកិច្ចសន្យាគឺគាត់អាចធ្វើការប្តឹងទៅតាមនីតិវិធីតុលានោះជារឿងផ្សេងទៀត ។
យ៉ាងណា បើតាមលោក ប៉ុក បូរក្ស ប្រសិនបើមានសំណើរមកកាន់រូបលោកនោះ លោកនឹងពិនិត្យលើសំណើរនោះថាតើរឿងហេតុនេះ វាកើតឡើងយ៉ាងដូចម្តេចរវាងផលិតករ និងតារាសម្តែងដែលពួកគាត់ជាជនរងគ្រោះ ។ លោកនឹងពិនិត្យមើលថាតើវាកើតឡើងដោយសារអ្វី មានកុងត្រាយ៉ាងម្តេច ហើយផលិតកម្មដែលគាត់ធ្វើការជាមួយនឹងវាស្របច្បាប់ឬយ៉ាងណា ដូច្នេះ ប្រសិនបើយើងពិនិត្យលើឯកសារនោះគ្រប់គ្រាន់ យើងអាចនឹងចូលរួមត្រឹមសម្របសម្រួល ។
លោកបញ្ជាក់ថា ក្នុងករណីដែលផលិតកម្មនោះបានចុះបញ្ជីត្រឹមត្រូវលោកអាចនឹងកោះហៅម្ចាស់ផលិតកម្មនោះមកដោះស្រាយ ប៉ុន្តែបើផលិតករ ឬម្ចាស់ផលិតកម្មនោះមិនបានចុះបញ្ជីនៅខាងលោក ឬក៏ជាផលិតករដែលមិនមានច្បាប់ទម្លាប់ត្រឹមត្រូវនោះ ខាងលោកក៏មិនមាននីតិវិធីណានៅក្នុងការកោះហៅឡើយ ព្រោះវាមិនមែនស្ថិតតនៅក្នុងការគ្រប់គ្រងរបស់លោក ។
ជាការកត់សម្គាល់ ពាក់ព័ន្ធបញ្ហាខាងលើនេះដែរ កន្លងមកតារាសម្តែងដែលជនរងគ្រោះអ្នកស្រី
រ៉េត រ៉ូស បានអះអាងថា រឿងផលិតករជំពាក់លុយថតនេះ អ្នកស្រីបានសុំទៅខាងសមាគមន៍ដែរតាមរយៈលោកសុវណ្ណមករា ប៉ុន្តែមិនទាន់មានការឆ្លើយតបណាមួយនៅឡើយទេរហូតដល់ពេលនេះ ។
ចំណែកតារាសម្តែងរងគ្រោះម្នាក់ដែរគឺអ្នកនាង ភីយ៉ា ក៏បានអះអាងដែរថា បញ្ហានេះអ្នកនាងក៏ដូចអ្នកសិល្បៈមួយចំនួនទៀតដែរ គឺនៅមិនទាន់លើកឡើងទៅកាន់ប្រធានសមាគមសិល្បៈករនៅឡើយទេ ដោយសារសមាគមមានការងារមមាញឹកច្រើន ។
យ៉ាងណា បើតាមអ្នកនាង ភីយ៉ា នាងនឹងលើកឡើងពីបញ្ហានេះទៅកាន់លោកជំទាវជាប្រធានសមាគមសិល្បៈខ្មែរឲ្យបានដឹង ក្នុងពេលដែលនាងមានឱកាសបានជួបប្រជុំ ឬបានជួបដោយផ្ទាល់ជាមួយលោកជំទាវប្រធាន ៕
ចែករំលែកព័តមាននេះ